Macaafa Moototaa Isa Lammaffaa 23:1-37 GAZB1997 - Bible AI

¹Yommus Yosiyaas mootichi geggeessitoota Yihudaa fi Yerusaalem hundumaa walitti in qabe.

²Namoota Yihudaa, namoota Yerusaalem keessa jiraatan hundumaa, luboota, raajota, isa xinnaadhaa hamma isa guddaatti namoota hundumaa fudhatee gara mana qulqullummaatti ol in ba'e; achittis dubbii abdii kakaadhaan kenname, isa macaafa mana qulqullummaa keessaa argame keessatti caafamee jiru hunduma isaa akka isaan dhaga'anitti in dubbiseef*.

³Mootichi Waaqayyo duukaa bu'uudhaaf, abboommii isaa, gorsa isaa, seerrata isaas garaa guutuudhaan, yaada isaa guutuudhaanis eeguudhaaf, dubbii abdii kakaadhaan kennamee macaafa kana keessatti caafames jabeessuudhaaf utubicha bira dhaabatee Waaqayyo duratti in kakate; namoonni achi turanis guutummaatti kakaa sanatti waliif in galan*.

⁴Kana booddee mootichi mi'a Ba'aalii fi Asheeraaf, macca waaqa keessaa hundumaaf hojjetame guutummaatti mana qulqullummaa keessaa akka gad baasaniif Hilqiiyaa angafa lubootaa, luboota warra angafa lubichaatti aananii fi warra balbala mana qulqullummaa eegan in abboome; mootichi mi'a sana hundumaa Yerusaalem duubatti, dachaa Qedroon keessatti in gube, daaraa isaa immoo Bet'elitti in geesse*.

⁵Inni luboota waaqayyolii tolfamoo warra iddoowwan ol ka'oo mandaroota Yihudaa irratti, naannoo Yerusaalemittis aarsaa akka dhi'eessaniif, akkasumas Ba'aalii fi biiftuudhaaf, ji'aaf, urjootaa fi macca waaqa keessaa hundumaafis ixaana akka aarsaniif mootonni Yihudaa fo'atan hundumaa in balleesse.

⁶Bifa waaqayyittii tolfamtuu ishee ?Asheeraa? jedhamtu mana qulqullummaa keessaa gad baasee Yerusaalem duubatti laga Qedroonitti geessee achitti in gube; kana booddees daakee bulleessee daaraa isaa awwaala namootaa irra in firfirse*.

⁷Da'oo ejjitoota warra dhiiraatiif mana qulqullummaa keessatti hojjetame, isa warri dubartootaas immoo keessatti Asheeraaf golgaa hojjetan diigee in balleesse*.

⁸Yosiyaas luboota mandaroota Yihudaa keessaa hundumaa walitti qabee, Gebaadhaa hamma Bersheebaatti galma iddoowwan ol ka'oo irra jiran lafa luboonni itti ixaana aarsaan hundumaa isaan duraa in balleesse; iddoowwan aarsaa warra karra Iyaasuu isa mandarattii bulchu biratti ijaaramanis in diige; karri Iyaasuu kun immoo karra mandarattii isa guddaadhaan yommuu ol lixan gara harka bitaatti kan argamuu dha.

⁹Luboonni warri iddoowwan ol ka'oo irratti waaqayyolii tolfamoodhaaf hojjechaa turan, iddoo aarsaa mana qulqullummaa Yerusaalem keessaa irratti aarsaa yoo dhi'eessuu dhabaatan iyyuu luboota akka isaanii wajjin bixxillee hin bukaa'in in nyaatu turan.

¹⁰Yosiyaas mootichi namni tokko illee ilma isaa yookiis intala isaa aarsaa ibiddaan gubamee dhi'eeffamu godhee Moleek Waaqayyo tolfamaadhaaf akka hin dhi'eessineef, Tofet iddoo ibiddaa, isa dachaa Hiinom keessa jiru sanas in balleesse*.

¹¹Bifa fakkeenya fardeenii warra mootonni Yihudaa biiftuudhaaf addaan baasanii balbala mana qulqullummaatti ol galchu irra mana Naataan-Melek isa xu'aashichaatti dhi'oo dhaaban sana buqqisee in calaasise; kana booddee immoo Yosiyaas konkolaattota biiftuudhaaf addaan baafaman in gubsiise.

¹²Mootichi iddoowwan aarsaa, mootonni Yihudaa mana mana irraa isa kan Ahaaz irratti ijaaranii turan akkasumas iddoowwan aarsaa, mootichi Minaaseen oobdii mana qulqullummaa sanaa lamaanuu keessatti ijaares in diige; inni achii isaan buqqisee, hamma hurraa'anitti isaan caccabsiisee, daaraa isaanii dachaa Qedroonitti in gate*.

¹³Itti dabalees mootichi, iddoowwan aarsaa warra Solomoon mootiin Israa'el boruu Yerusaalem, harka mirgaa tulluu badiisaatti Ashtaarot waaqayyittii tolfamtuu Sidooniif, Kemosh Waaqayyo tolfamaa Mo'aabiif, Moleek Waaqayyo tolfamaa Amoonotaafis hojjetee ture diigee in balleesse*.

¹⁴Utuboota dhagaa qullaa'ootti ilaalaman caccabsee in hurreesse, bifa fakkeenya Asheeraa waaqayyittii tolfamtuus buqqisee iddoo isaa lafee namootaatiin in guute.

¹⁵Akkasumas iddoowwan aarsaa Bet'el keessaa, iddoowwan ol ka'oo lafa Waaqayyo tolfamaadhaaf itti sagadan, warra Yerobi'aam ilmi Nebaat ijaaree ittiin Israa'eloota cubbuu hojjechiise caccabsee, daaraa in godhe; bifa Asheeraa waaqayyittii tolfamtuus in gube*.

¹⁶Yerobi'aam gaafa cidhaa tokko iddoo aarsaa bukkee dhaabachaa utuu jiruu, namni Waaqayyoo tokko akka dubbatee turetti, Yosiyaas gara galee awwaalota tulluu irratti yommuu arge, namoota ergee awwaalota sana keessaa lafee baasisee iddoo aarsaa sana irratti gubee isa in xureesse*.

¹⁷Ergasiis, ?Dhagaan awwaala irra dhaabame ani argu kun maali?? jedhee namoota in gaafate; namoonni mandarattii immoo, ?Kun awwaala nama Waaqayyoo isa Yihudaadhaa dhufe tokkoo ti, inni isa ati amma iddoo aarsaa Bet'el diigde kana duraan dursee dubbatee ture? jedhanii in deebisaniif.

¹⁸Mootichi immoo, ?Lafeen isaa haa boqotu, dhiisaa awwaala isaa hin tuqinaa!? jedhe; isaanis awwaala isaa fi awwaala raajicha isa Samaariyaadhaa dhufee hin tuqne*.

¹⁹Yosiyaas mootichi Bet'elitti akkuma hojjete, akkasuma galma mootonni Israa'el iddoowwan ol ka'oo mandaroota Samaariyaa keessa jiran irratti ijaaranii ittiin Waaqayyoon dheekkamsiisan hundumaa diigee in balleesse.

²⁰Luboota warra galma waaqayyolii tolfamoo sana keessaa hojjechaa turan hundumaas iddoowwan aarsaa sana irratti gogorra'ee, lafee namaa isaan irratti in gube; kana booddees Yerusaalemitti in deebi'e.

²¹Yosiyaas mootichi akka seera macaafa kakuu kana keessatti caafametti sabichi guutummaatti ayyaana Faasiikaa Waaqayyo gooftaan isaa isaaf kenne akka ayyaaneffatuuf abboommii in baase*.

²²Erga bara abboota firdii warra saba Israa'el geggeessaa turaniitii jalqabee hamma bara kanaatti iyyuu, mootota Israa'el keessaa, mootota Yihudaa keessaas namni akkasitti ayyaana Faasiikaa qopheesse hin jiru*.

²³Amma garuu Yosiyaas mo'ee waggaa kudha saddeettaffaa isaatti ayyaanni Faasiikaa inni Waaqayyo isaaniif kenne Yerusaalemitti in ayyaaneffatame.

²⁴Itti dabalees Yosiyaas warra ekeraa dubbisan, warra ayyaana hedan, waaqayyolii mana keessaa fi bifa waaqayyolii tolfamoo akkasumas wanta ciiggaasisaa ta'an Yerusaalemii fi Yihudaa keessa kan jiran hundumaa in balleesse; kana gochuun isaas immoo dubbii macaafa seeraa isa Hilqiiyaan lubichi mana qulqullummaa keessaa argate keessatti caafame sana raawwachuuf ture*.

²⁵Mootiin akka Yosiyaasitti garaa isaa hundumaan, yaada isaa hundumaan, humna isaa hundumaanis akka seera Museetti, gara Waaqayyootti deebi'e isa dura, isa booddees hin turre*.

²⁶Haa ta'u iyyuu malee, sababii Minaaseen karaa baay'eedhaan Waaqayyoon aarsaa tureef, dheekkamsi isaa inni guddaanii fi sodaachisaan inni Yihudaa irratti boba'e amma iyyuu hin qabbanoofne*.

²⁷Kanaaf Waaqayyo, ?Mootummaa Israa'el akkuman balleesse, akkasuma mootummaa Yihudaa fuula koo duraa nan balleessa; Yerusaalem mandara ishee ani fo'adhe, mana qulqullummaa isa ani, ?Kan koo ti? ittiin jedhee ture nan gata? jedhe*.

²⁸Wanta Yosiyaas bara mootummaa isaa keessatti dubbatee fi waan inni hojjete hundumaa keessaa warri hafan macaafa seenaa mootota Yihudaa keessatti caafamaniiru mitii ree?

²⁹Yosiyaas mootummaa irra utuu jiruu, Nekoon mootiin Gibxii mootii Asor gargaaruudhaaf karaa laga Efraaxiis ol in ba'e; yommus Yosiyaas mootiin Yihudaa isa loluuf itti in duule; Nekoon garuu yommuu isa arge Megidootti isa in ajjeese.

³⁰Kana booddee hojjetoonni Yosiyaas reeffa isaa Megidoodhaa konkolaataadhaan Yerusaalemitti geessanii, iddoo awwaalaa isa inni ofii isaatii qopheeffate keessatti in awwaalan; sabni Yihudaas iddoo isaa ilma isaa Yeho'ahaazin dibanii in moosifatan*.

³¹Yeho'ahaaz dhalatee waggaa digdamii sadiitti mootii ta'ee, Yerusaalem keessa taa'ee, ji'a sadii in mo'e; maqaan haadha isaatii ?Hamutaal? jedhama; isheen intala Ermiyaas nama mandara Liibnaa turte.

³²Yeho'ahaaz akkuma mootota warra abbaa isaa dura turanii Waaqayyo duratti waan hamaa in hojjete.

³³Mootiin kun mootummaa isaa irra akka hin turreef, Nekoon mootiin Gibxii isa qabee biyya Haamaat keessaa iddoo ?Riiblaa? jedhamutti isa in hiisise; namoonni biyya isaa immoo meetii kiilo graamii kuma sadii fi dhibba afur akkasumas immoo warqee kiilo graamii soddomii afur akka baasan itti in mure.

³⁴Kana booddee Nekoon mootiin Gibxii Elyaaqiim ilma Yosiyaas iddoo Yosiyaas abbaa isaatii biyya Yihudaa irratti moosisee, maqaa isaa immoo Yehoyaaqiimitti in geddare; Yeho'ahaazin garuu fuudhee biyya Gibxiitti in geesse, innis achitti in du'e*.

³⁵Yehoyaaqiim mootichi meetii fi warqee Nekoo mootiin Gibxii namoonni Yihudaa akka baasaniif itti muree ture sana akka humna qabeenya isaaniitti namoota irraa sassaabee in baase*.

³⁶Yehoyaaqiim dhalatee waggaa digdamii shanitti mootii ta'ee, Yerusaalem keessa taa'ee, waggaa kudha tokko in mo'e; maqaan haadha isaatii ?Zabudaa? jedhama; isheen intala Phedaayaa nama mandara Rumaa turte;

³⁷Yehoyaaqiimis akkuma mootota warra abbaa isaa dura turanii Waaqayyo duratti waan hamaa in hojjete.