1Kutanni raajotaa gaaf tokko Elsaa'iidhaan, ?Kunoo, iddoon nuyi si duratti itti wal geenyu baay'ee waan nutti dhiphateef,
2hadaraa tokkon tokkon keenya gara Yordaanos dhaqnee, dhaabaa murree mana itti wal geenyu akka ijaarrannuuf ?Tole? nuuf jedhi!? jedhan; innis, ?Dhaqaa!? isaaniin jedhe.
3Isaan keessaa inni tokko, ?Hadaraa atis immoo nuyi garboota kee wajjin hin dhaqxuu?? jedhe; inni immoo deebisee, ?Nan dhaqa? jedhee,
4isaanii wajjin in dhaqe; yommus isaan Yordaanos dhaqanii mukkeetii murmuruu in jalqaban.
5Isaan keessaa tokko muka muruutti utuu jiruu, qarri qottoo ittii buqqa'ee bishaan keessa duraa in bu'e; yommus iyyee, ?Wayyoo kaa yaa gooftaa ko! Kanaa immoo qottoo ergisaa ti? jedhe.
6Namni Waaqayyoo immoo, ?Qixa kamiin keessa bu'e?? jedhee in gaafate; namichi qixa isaa isatti argisiifnaan, inni immoo muka cabsee bishaanichatti darbatee, bishaanichi qotticha ol baasee of irratti akka baatu in godhe.
7Namichaanis, ?Fudhadhu!? jedhe; yommus namichi hiixatee in fudhate.
8Yeroo tokko mootiin Sooriyaa Israa'eloota lolaa utuu jiruu hojjetoota isaa warra gurguddootaa wajjin mari'atee, ?Buufanni koo iddoo akkasii fi akkasii haa ta'u!? jedhe.
9Namni Waaqayyoo immoo, ?Warri Sooriyaa karaa sana gad dhufaa jiru waan ta'eef, karaa sana akka hin darbine!? jedhee, mootii Israa'elitti in dhaame.
10Mootiin Israa'el gara iddoo isa namni Waaqayyoo isatti hime sanatti namoota ergee, of eeggachiisa isaa sanaan yeroo baay'ee of in oolche.
11Waa'ee kanaatiif mootiin Sooriyaa garaa isaatti aaree bobba'ee, hojjetoota isaa warra gurguddoota walitti waamee, ?Nuyi keessaa eenyu mootii Israa'eliif akka dhaabate anatti hin himtanii?? jedhee, in gaafate.
12Hojjetoota isaa sana keessaa inni tokko, ?Yaa gooftaa ko! Yaa mootii! Wanta ati diinqa keetti dubbattu hundumaa Elsaa'i raajicha isa Israa'el keessaatu mootii Israa'elitti hima malee, nuyi keessaa miti? jedhe.
13Mootichi, ?Namoota ergee akkan isa qabsiisutti dhaqaatii iddoo inni jiru ilaalaa!? jedhe; warri ergamanis Elsaa'in, mandara Dootaan keessa akka jiru mootichatti in himan.
14Mootichi yommus loltoota baay'ee fardeenii fi konkolaattotaa wajjin achitti in erge; isaanis halkaniin dhaqanii mandarattii in marsan.
15Borumtaa isaa hojjetaan nama Waaqayyoo ganama obboroo ka'ee yommuu gad ba'e, kunoo, loltoonni fardeenii fi konkolaattotaan mandarichatti naanna'anii waan argeef, ?Wayyoo kaa yaa gooftaa ko! Maal goonu?? jedhee in gaafate.
16Elsaa'in immoo deebisee, ?Warri nuu wajjin jiran, warra isaanii wajjin jiran irra in caaluutii hin sodaatin!? jedheen.
17Itti fufees, ?Yaa Waaqayyo, akka inni argutti hadaraa ija isaa baniif!? jedhee in kadhate; Waaqayyo yommus ija naa'ichaa in baneef; naa'ichis gaaronni naannoo Elsaa'i jiran guutummaatti fardeenii fi konkolaattota ibiddaatiin guutamanii in arge*.
18Loltoonni Sooriyaa gara isaatti yeroo gad bu'anitti, Elsaa'in, ?Yaa Waaqayyo! Jarreen kana dhooftee jaamaa akka isaan gootu sin kadhadha? jedhe; akkuma Elsaa'in kadhate, Waaqayyo dha'ichaan jaamaa isaan in godhe.
19Elsaa'in jaraan, ?Karichi, mandarichis kana miti, ana duukaa bu'aa gara nama isa isin barbaaddaniitti isin nan geessa? jedhee, gara Samaariyaatti isaan in geesse.
20Akkuma isaan mandarichatti galaniin immoo Elsaa'in, ?Yaa Waaqayyo, namoonni kun akka arganitti ija isaanii bani!? jedhe; Waaqayyo yommus ija isaanii in baneef; isaanis ilaalanii Samaariyaa keessa akka jiran in argan.
21Mootiin Israa'el yommuu isaan arge, ?Isaan fixuu? Yaa abbaa ko! Isaan fixuu?? jedhee, Elsaa'in in gaafate.
22Inni immoo deebisee, ?Namoota billaa keetii fi iddaa keetiin boojite iyyuu hin fixxu erga ta'ee, isaan kun nyaatanii, dhuganiis gara gooftaa isaanii akka dhaqaniif, buddeenaa fi bishaan dhi'eessisiif malee, isaan hin fixin!? jedhe.
23Mootiin Israa'el kana irratti nyaachisa guddaa isaaniif in qopheessise; erga nyaatanii, dhuganii booddee gad isaan in dhiise; isaan gara gooftaa isaaniitti erga deebi'anii, namoonni Sooriyaa saamichaaf gara biyya Israa'elitti hin deebine.
24Takka turee garuu Ben-Hadaad mootiin Sooriyaa loltoota isaa hundumaa walitti qabatee, ol ba'ee mandara Samaariyaatti in marse*.
25Mandarattiin akkuma marfamtetti waan turteef guddaa beeloftee, mataan harree tokkoo meetii akka kiilo graamii tokko miijanu, udaan gugee akki rubii liitrii meetii akka graamii shantamii shanii miijanu hamma baasutti in ga'e.
26Gaaf tokko mootiin Israa'el dallaa dhagaa mandarichaa irra darbaa utuu jiruu, dubartiin tokko sagalee ishee ol fudhattee, ?Yaa gooftaa ko! Yaa mootii! Na gargaari!? jetteen.
27Inni deebisee, ?Ani oobdii midhaanii moo yookiis iddoo cuunfaa wayniin qaba ree? Waaqayyo yoo si gargaaruu dhabaate, eessaa fuudhee si gargaaru ree?? jedheen.
28Itti fufees, ?Rakkinni kee maali?? jedhee ishee in gaafate; isheen immoo deebiftee, ?Dubartiin kun, ?Har'a ilma kee fidi in nyaannaa, bor immoo ilma koo nyaanna? naan jette;
29kana irratti ilma koo affeellee in nyaanne; borumtaa isaa ani immoo, ?Ilma kee fidi kaa in nyaannaa? nan jedheen; isheen garuu ilma ishee sana in dhoksite? jette*.
30Mootichi dubbii dubartittii yommuu dhaga'e, gadda irraa kan ka'e uffata isaa in tarsaase; utuu inni dallaa dhagichaa irra darbaa jiruu, namoonni isa ilaalanii uffata gaddaa dhagna isaatti aansee akka uffate in argan.
31Mootichi itti fufee, ?Har'a mataan Elsaa'i ilma Shaafaax yoo isa irra buleef Waaqayyo ana immoo haa dha'u, kana irra kan caalus anatti haa fidu!? jedhe.
32Elsaa'in mana isaa keessa in taa'a ture; jaarsoliinis isaa wajjin in taa'u turan; mootichi of dura nama isatti in erge; utuma namichi isatti ergame isa bira hin ga'in Elsaa'in jaarsolii sanaan, ?Ilmi waraan-dhiigessaa kun morma koo ana irraa kuchisiisuuf akka inni nama anatti erge argituu! Egaa yeroo namichi dhufee ol lixuuf jedhu, balbala itti cufaa, jabeessaatii balbalichatti isa miciriqsaa! Gooftaan isaa iyyuu isa booddeedhaan dhufaa jira mitii ree?? jedhe.
33Utuu inni isaanitti dubbachaa jiruu, mootichi ofii isaatii gara isaatti gad bu'ee, ?Badiisi kunoo Waaqayyo biraa dhufe, si'achi maalan isa irraa eeggadha ree?? jedhe.