Macaafa Yo'el Raajichaa 2:1-32 GAZB1997 - Bible AI

¹Xiyoon gaara koo isa qulqulluu irratti fiinoo afuufaa, sagalee nama dammaqsu dhageessisaa! Guyyaan Waaqayyoo waan dhufuuf, ammuma iyyuu waan dhi'aateef, warri biyyicha keessa jiraatan hundinuu haa hollatan*!

²Guyyichi guyyaa dukkanaa fi guyyaa ifa hin qabnee dha, guyyaa duumessaa fi guyyaa dukkana limixii ti; inni akka boruu tulloota irra darbee bal'achaa adeemuu ti; sabni baay'eenii fi jabaan kan akka isaa dur kan hin turin, si'achis kan akkasii kan hin argamne in dhufa*.[8]

³Fuula isaanii duraa arrabni ibiddaa gubaa in adeema; isaan booddeedhaanis ibiddi waxalaan gubaa in adeema; biyyi fuula isaanii duraa iddoo dhaabaa Eden fakkaata, biyyi isaan booddee immoo lafa onaa barbadaa'aa fakkaata; kan isaan jalaa ba'us tokko illee hin jiru*.

⁴Isaan farda fakkaatu, akka farda lolaas in kaatu;

⁵isaan akka konkolaataa fiiguutti, akka ibidda yommuu qarmii gubu xaaxa'uutti, akka loltoota jajjaboo lolaaf of qopheessaniitti, sagalee isaanii dhageessisaa, fiixee tullootaa irra in quruphisu*.

⁶Sabni lafa irraa yommuu isaan argan in rom'u, namoonni hundinuus na'anii fuula in badu;

⁷isaan akka namoota jajjabootti in fiigu, akka loltootaattis masaraa in yaabu; hundumti isaaniis karaa isaanii irraa utuu hin jal'atin, tarreetti in yaa'u.

⁸Tokkon tokkon isaanii karaadhuma isaanii irra adeemu malee, inni tokko isa kaanitti hin bu'u; tarree isaanii utuu wal irraa hin kutin, humnaan cabsatanii waraana gidduu in darbu;

⁹fiiganii mandarattii irra in ba'u, masaraa irra in fiigu, manneetii in yaabbatu, akka hattuus qaawwa manaatiin ol in lixu*.[9]

¹⁰Lafti isaan ga'an fuula isaanii duraa in rom'iti, waaqnis in socho'a; aduunii fi jiini in dukkanaa'u, urjoonnis ifa hin kennan*.

¹¹Waaqayyo fuula macca isaa duratti sagalee isaa in dhageessisa; humni waraanaa isaa sonaan baay'ee dha; warri isaaf abboomamanis jajjaboo dha; guyyaan Waaqayyoo guddaa dha, sodaachisaa dhas; eenyutu fuula isaa dura dhaabachuu danda'a ree*?[10]

¹²Waaqayyo garuu, ?Ammuma iyyuu garaa keessan guutuudhaan, soomuudhaan, boo'ichaan, gadduudhaanis gara kootti deebi'aa!? jedha.

¹³Egaa garaa keessan tarsaasaa malee, uffata keessan hin tarsaasinaa! Gara Waaqayyo gooftaa keessaniitti deebi'aa! Inni araara-qabeessaa fi oo'a-qabeessa waan ta'eef, dheekkamsatti hin ariifatu, gaarummaan isaas baay'ee dha, wanta hamaa namatti erguu irraas of in qusata*.

¹⁴Maaltu beeka, tarii Waaqayyo gooftaan keessan isa yaade in dhiisa, in oo'as; kennaa midhaanii fi kennaa dhugaatii akka isaaf dhi'eessuu dandeessanitti, isin in eebbisa ta'a*![11]

¹⁵Xiyoon keessatti fiinoo afuufaa, soomii qulqullaa'aa labsaa! Wal ga'ii qulqullaa'aas waamaa*!

¹⁶Namoota walitti qabaa, waldaa qulqulleessaa! Maanguddootaa fi ijoollee, daa'imota harma hodhanis walitti sassaabaa! Dhirsi misirroo mana isaa keessaa gad haa ba'u, misirroonis diinqa ishee keessaa gad haa baatu!

¹⁷Luboonni warri Waaqayyoof hojjetan, buusaa mana qulqullummaa fi iddoo aarsaa gidduutti haa boo'an! Isaan, ?Yaa Waaqayyo saba keetiif oo'i, saba kee warra dhuunfaa kee ta'an, saba warra kaan gidduutti nama ga'oo fi nama mammaaksaa hin godhin! Maaliifis isaan namoota warra kaan gidduutti, ?Waaqayyoon isaanii eessa jira?? jedhu ree?? haa jedhan*![12]

¹⁸Waaqayyo biyya isaatiif in hinaafa, saba isaatiifis in oo'a*.

¹⁹Waaqayyo saba isaatiif deebisee, ?Kunoo ani midhaan, waynii haaraa fi dhadhaa ejersaa isiniif nan kenna, isin in quuftu; si'achis saba lafa irraa gidduutti akka isin yeellaatan hin godhu*;

²⁰loltoota warra gara bitaa jiranis isinittii nan fageessa, warra fuula duraa, gara galaana ba'a-biiftuutti, warra dugda duubaa immoo, gara galaana lixa-biiftuutti, gara lafa gogaa fi onaatti isaan nan oofa; sababii isaan of gurguddisuudhaan wanta akkasii isin irratti hojjetaniif, ani isaan nan balleessa, reeffi isaanii in xiraa'a, in ajaa'as.[13]

²¹?Ani Waaqayyo dhugumaan wanta guddaa isaa waanan godhuuf, yaa lafaa hin sodaatin! Gammadi, ililchis!

²²Bakkeedhaa iddoon dheedumsaa lalisaa, mukkeetiin ija naqachaa, mukti harbuuf dhaabaan waynii, baay'inatti ija kennaa waan jiraniif, isin yaa horii bakkee keessaa hin sodaatinaa!

²³?Isin yaa ijoollee Xiyoon! Waaqayyo qajeelummaa isaa irraa kan ka'e bokkaa isa duraa isiniif kenneera; bokkaa isa duraa, isa booddees akkuma kanaan duraatti waan isiniif kennuuf, Waaqayyo gooftaa keessanitti gammadaa, ililchaas*![14]

²⁴?Oobdiin midhaaniin in guuta, iddoon waynii itti cuunfanis daadhii wayniitii fi dhadhaa ejersaatiin in guuta.

²⁵Isa gurmuun hawaannisaa, ilmaan hawaannisaa, geeriin hawaannisaa, qorophisii fi loltoonni jajjaboonni ani isinitti erge sun dur isin duraa fixan, amma iddootti isiniif nan deebisa*.

²⁶Yommus isin nyaattanii in quuftu; maqaa ana Waaqayyo gooftaa keessanii isa dinqii isiniif hojjetees in jajattu; isin sabni koo si'achi deebitanii hin yeellaasifamtan*.

²⁷Yommus ani Israa'el keessa akkan jiru, Waaqayyo gooftaa keessan akkan ta'e, ana malees kan biraa akka hin jirre in beektu; isin sabni koos si'achi deebitanii hin yeellaasifamtan? jedhe*.[15]

²⁸Waaqayyo ammas, ?Bara booddeetti ani hafuura koo nama hundumaa irratti nan dhangalaasa; ilmaan keessanii fi intaloonni keessan raajii in dubbatu, maanguddoonni keessan abjuu in abju'atu, dargaggoonni keessanis mul'ata in argu;

²⁹bara sanatti, ani hojjetoota koo warra dhiirotaa fi warra dubartootaa irratti iyyuu hafuura koo nan dhangalaasa.

³⁰Waaqa irratti, lafa irrattis milikkita, dhiigaa fi ibidda, utubaa aaraas nan argisiisa.

³¹Guyyaan koo inni guddaanii fi sodaachisaan sun utuu hin dhufin dura, aduun dukkanatti, jiinis dhiigatti in diddiiramu.

³²Maqaa Waaqayyoo warri waammatan hundinuu garuu in oolu; akkuma ani Waaqayyo jedhee ture, warri ani waame tulluu Xiyoon irratti, Yerusaalem keessattis hafanii in fayyu? jedhe*.[16]