Seera Ba'uu 24:1-18 GAZB1997 - Bible AI

¹Waaqayyo yommus Museedhaan, ?Ati, Aaron, Naadaab, Abiihuu, jaarsolii Israa'el keessaa torbaatamni as gara koo gara Waaqayyo kottaa, fagoo dhaabadhaatii sagadaa*!

²Ati kophaan as gara koo gara Waaqayyootti dhi'aadhu malee, warri kaan hin dhi'aatin! Sabni matumaa sii wajjin ol hin ba'in!? jedhe.[125]

³Museen dhufee wanta Waaqayyo jedhe hundumaa, seera isaas hundumaa saba sanatti in hime; sabni immoo sagalee tokkichaan deebisanii, ?Nuyi dubbii Waaqayyo dubbate kana hundumaa in goona? jedhan*.

⁴Museen dubbii Waaqayyo dubbate hundumaa in caafe; ganama barii immoo ka'ee tullicha jalatti iddoo aarsaa ijaaree, akka lakkoobsa gosa Israa'el warra kudha lamaaniitti utubaa dhagaa kudha lama in dhaabe*.

⁵Israa'eloota keessaas dargaggoonni qalma gubamuu fi qalma araaraafis tuntunoota qalanii Waaqayyoof dhi'eessuudhaaf akka ergaman in godhe.

⁶Museen immoo dhiiga sana walakkaa waciitotatti naqee, walakkaa isa hafe immoo iddoo aarsaa sanatti in facaase.

⁷Yommus macaafa kakuu sanaa fuudhee, akka sabni sun dhaga'utti dubbise; isaan immoo, ?Wanta Waaqayyo dubbate hundumaa in dhageenya, in goonas? jedhan*.

⁸Museen dhiigicha fuudhee, namootatti facaasee, ?Ilaa dhiiga kakuu isa Waaqayyo akka dubbii kana hundumaatti isiniif dhaabe? jedhe*.[126]

⁹Yommus Museen, Aaron, Naadaab, Abiihun, jaarsolii Israa'el keessaas namoonni torbaatamni ol in ba'an;

¹⁰isaan Waaqayyo isa kan Israa'el in argan; miilla isaa jala wanta akka dhagaa Safiiros, isa qullaa'aa akka bantii waaqaatu ture*.

¹¹Inni harka isaa gurguddoota saba Israa'el kanatti hin buufne; isaan Waaqayyoon in argan, achitti walii wajjin in nyaatan, in dhuganis.[127]

¹²Ammas Waaqayyo Museedhaan, ?Tulluutti ol ba'ii gara koo kottu, achi turi! Ani gabatoota dhagaa, seeraa fi abboommii sabni kun akka ittiin gorfamuuf, ani irratti caafee sitti nan kenna? jedhe*.

¹³Kana irratti Museen, Iyaasuu gargaartuu isaa wajjin ka'ee, tulluu Waaqayyootti ol in ba'e*.

¹⁴Inni jaarsolii sanaan, ?Hamma nuyi deebinee gara keessan dhufnutti, asitti nu eegaa! Kunoo Aaronii fi Huur isin bira jiru, namni dubbiin isa argate immoo isaan biratti haa dhi'aatu!? jedhe ture.[128]

¹⁵Museen tulluutti erga ol ba'ee booddee, duumessi tullicha in uffise*.

¹⁶Ulfinni Waaqayyoo tulluu Siinaa irra in buufate, duumessis guyyaa ja'a tullicha in uffise; gaafa guyyaa torbaffaa Waaqayyo duumessa sana gidduudhaa Musee in waame*.

¹⁷Yeroo kanatti ulfinni Waaqayyoo akka ibidda xaph godhutti, fiixee tuulu sanaa irraa saba Israa'el duratti in mul'ata ture*.

¹⁸Museen tulluu sanatti ol ba'ee, duumessa sana gidduu lixee, guyyaa afurtamaa fi halkan afurtama tulluu sana irra ture*.[129]