Seera Keessa Deebii 32:1-52 GAZB1997 - Bible AI

¹Yaa bantiiwwan waaqaa ani nan dubbadhaa mee dhaga'aa! Yaa lafaa dubbii afaan kootii dhaggeeffadhu*!

²Barsiisi koo akka bokkaa haa coccophu! Dubbachuun koos akka fixeensaa gad haa bu'u! Akka bokkaa coccophus biqiltuu xobbee irratti, akka tiifuus marga irratti gad haa bu'u*!

³Ani maqaa Waaqayyoo nan labsa, isinis guddina Waaqayyo keenyaa beeksisaa!

⁴Inni kattaa jabaa dha, wanti inni godhus mudaa hin qabu, karaan isaa hundinuus qajeelaa dha, inni Waaqayyo amanamaa dha, jal'innis isa keessa hin jiru, inni dhuga-qabeessaa fi qajeelaa dha*.[161]

⁵Isaan isa irratti balleessaa hojjechuu isaaniitiin waan yeellaasifamaniif, si'achi ijoollee isaa hin jedhaman; isaan dhaloota jal'aa fi micciiramaa dha*;

⁶ati yaa saba gowwaadhaa fi qalbii hin qabne, kan ati Waaqayyoof deebiftu kanaa? Inni abbaa kee fi isa si uume mitii? Isa mitii kan si tolche, kan si dhaabes*?[162]

⁷Guyyoota durii yaadadhu! Waggoota dhaloota baay'ee duraas ilaali! Abbaa kee gaafadhu, innis sitti in hima; jaarsoliis gaafadhu, isaanis siif in ibsu;

⁸inni hundumaa gara irraa jiru, saba garaa garaaf dhaala isaanii yeroo kenneef, ijoollee namootaas yommuu gargar hire, isaaniif immoo akka lakkoobsa ilmaan Israa'elitti daarii in dhaabeef*.

⁹Waaqayyo ofii isaatiif immoo saba isaa ga'aa isaa in godhate, Yaaqoobiin dhuunfaa isaa godhee fudhate*.[163]

¹⁰Lafa onaattis isa arge, iddoo onaa bineensonni wacan keessatti, isa golboobee gargaare; akka agartuu ija isaattis isa eege*;

¹¹akka joobira isa mann'ee isaa eeggatuu, akka isa qoochoo isaa ilmoo isaa irra golboobee balali'uu, akka isa baallee isaa bal'isee isa qabuu, isa fiixee baallee isaa irrattis isa baatuu ti*,

¹²Waaqayyo duwwaatu isa geggeesse malee, waaqayyoliin ormaa isaa wajjin hin turre*.[164]

¹³Inni iddoo ol kaa'aa biyyichaa isa yaabsise, midhaan maasii keessaa isa nyaachise, damma kattaa keessaa isa soore, dhadhaa ejersaas kattaa jabaa keessaa isaaf in kenne*.

¹⁴Dhadhaa saawwanii fi aannan hoolotaa, cooma xobbaallotaa fi cooma korbeeyyii, saawwan Baashaanii fi re'oota, qamadii gaariis in kenneef; innis cuunfaa waynii isa diimaa in dhuge.

¹⁵Garuu Yaaqoob inni ?Yeshuuruun? jedhame coomee isa in dhiise; inni in gabbate, in furdate, in cululuqes; Waaqayyoon isa isa uumes in dhiise, kattaa fayyina isaa sana in tuffate*.[165]

¹⁶Isaan waaqayyolii ormaatiin isa hinaafsisanii, waaqayyolii tolfamaniinis tuttuqanii isa in aarsan.

¹⁷Hafuurota hamoota warra Waaqayyo hin ta'inii fi waaqayyolii haaraa warra isaan dur hin beekneef, warra abboonni keessan isaan hin sodaatiniif aarsaa in dhi'eessan*.

¹⁸Isin Waaqayyo isa isin uume in irraanfattan; kattaa isa isin tolche sana in dhiiftan*.[166]

¹⁹Ijoolleen dhiiraa isaa fi ijoolleen durbaa isaa waan isa aarsaniif, Waaqayyo kana argee isaan in tuffate.

²⁰Inni, ?Ani fuula koo isaan nan dhoksa, dhumni isaaniis attam akka ta'u nan ilaala; isaan dhaloota jal'oota, ijoollee hin amanamnee dhas;

²¹isaan, Waaqayyo kan hin ta'iniin ana hinaafsisan; waaqayyolii tolfamoo isaanii warra waa'ee hin baafneenis na aarsan; anis saba kan hin ta'iniin isaan nan hinaafsisa, saba gowwaadhaanis isaan nan aarsa*.

²²Aarii kootiin ibiddi boba'ee hamma qililleetti gad in guba, biyya lafaa fi wanta inni baasu in fixa, hundee tullootaattis in qabsiifama.[167]

²³?Ani wanta hamaa isaan irra nan tuula, xiyyoolii koo hundumaas isaanittan badduu baasa*;

²⁴beela isaan dadhabsiisu isaanittan erga, golfaa nama fixuu fi dha'icha nama ajjeesus, ilkaan bineensotaa, hadhaa bineensota lafa munyuuqaniis isaanittan erga.

²⁵Alaa billaan isaan harkaa ijoollee in fixa, mana keessas sodaan jira; dargaggeessonnii fi durboonni, daa'imoonii fi jaarsoliin in balleeffamu*.

²⁶Ani, ?Iddoo fagootti isaan nan tamsaasa, seenaa isaaniis immoo namoota gidduudhaa nan balleessa? nan jedhan ture.

²⁷Garuu diinonni, ?Irree keenyatu mo'e malee, Waaqayyo kana hundumaa hin goone? jedhanii akka ana hin aarsineefan dhiise*.[168]

²⁸?Sabni akkasii garuu saba gorsa hin qabnee dha, hubachuunis isa keessa hin jiru*;

²⁹maaloo, utuu ogeessota ta'anii kana hubatanii, dhumni isaaniis attam akka ta'u utuu beekanii!

³⁰Kattaan isaanii yoo isaan gurgure malee, Waaqayyo yoo gad isaan dhiise malee, attamitti namni tokko nama kuma ari'uu danda'a? Yookiis attamitti namni kumni kudhan nama lama baqata*?

³¹Kattaan isaanii akka kattaa keenyaa miti, diinonni keenya iyyuu kana in faradu.

³²Mukti waynii isaanii Sodoom keessaa fi maasii Gomoraa keessaa dhufa, iji waynii isaanii hadhaadhaan guutuu dha, dameen isaaniis hadhaa'ummaa qaba*.

³³Daadhiin waynii isaanii hadhaa bofaa ti, hadhaa mar'ataa isa nama ajjeesuu ti.[169]

³⁴?Kun ana biratti walitti hin qabamnee ree, gombisaa koo keessattis mallattoodhaan itti hin cufamnee ree?

³⁵Ijaa baasuunii fi adabuun kan koo ti, yeroon miilli isaanii itti mucucaatu jira, guyyaan badiisa isaaniis dhi'aateera, firdiinis dafee isaanitti in dhufa? jedhe*.

³⁶Humni isaanii akka dhume, warri birmaduun, garboonnis tokko illee akka hin hafne Waaqayyo waan argeef, saba isaatiif in farada, garboota isaatiifis in oo'a*.[170]

³⁷Waaqayyo yommus, ?Waaqayyoliin isaanii, kattaan isaan itti kooluu galanis meerree*?

³⁸Waaqayyoliin warri cooma aarsaa qalma isaanii nyaatan, warri kennaa dhugaatii daadhii waynii isaanii dhuganis mee ka'anii isaan haa gargaaran kaa! Mee iddoo baqaa isaaniif haa ta'an kaa![171]

³⁹?Amma ilaalaa! Waaqayyo anuma, ana malee Waaqayyo kan biraa hin jiru; ani nan ajjeesa, ani nan jiraachisas; ani nan madeessa, ani nan fayyisas; homtinuu harka koo keessaa baasuu kan danda'u hin jiru*;

⁴⁰ani harka koo bantii waaqaa irra bal'isee, ?Ani bara baraan jiraataa dha? jedhee nan kakadha.

⁴¹Billaa koo isa calaqqisaa yommuun qaradhu, harki koos firdiidhaaf yommuu isa qabatu, ani diinota koo irratti ijaa nan ba'a, warra na jibbaniifis gatii nan baasa;

⁴²xiyyoolii koo dhiigaan nan macheessa, dhiiga warra qalamanii fi warra booji'amanii, geggeessitoota diinotaa nan obaasa, billaa koos foon nan nyaachisa? in jedha.[172]

⁴³Yaa saba lafa irraa, saba isaatiif gammadaa! Waaqayyo dhiiga garboota isaatiif ijaa in baasa, diinota isaa irratti ijaa in ba'a, saba isaa fi biyya isaatti in araarama*.[173]

⁴⁴Museenis Iyaasuu ilma Nunii wajjin dhufee dubbii faarfannaa kanaa hundumaa sabni akka dhaga'utti itti dubbate.

⁴⁵Museen dubbii kana hundumaa guutummaa Israa'elitti erga himee booddee,

⁴⁶?Dubbii ani har'a isinitti beeksisu kana hundumaa garaa keessan keessa kaa'adhaa! Ijoolleen keessanis dubbii seera kanaa hundumaa gaarii godhanii akka eeganiif isaan abboomaa!

⁴⁷Dubbichi jireenya keessan malee, dubbii isiniif waa'ee hin baafne miti; dubbichaanis biyya isa Yordaanosin ceetanii qabachuuf jirtan sana keessa bara dheeraa in jiraattu? jedhe*.[174]

⁴⁸Guyyuma sana Waaqayyo Museedhaan,

⁴⁹?Gara tulluu Abaariim, tulluu Neboo isa biyya Mo'aab keessaa fuullee Yerikoo jiru sanatti ol ba'i! Biyya Kana'aan isa ani Israa'elootaaf dhuunfaa godhee kennu sana ilaali!

⁵⁰Akkuma Aaron obboleessi kee tulluu Hoor irratti du'ee abboota isaa biratti sassaabame, atis tulluu itti ol baatu sana irratti in duuta abboota kee birattis in sassaabamta*!

⁵¹Kunis isin Israa'eloota duratti bishaan Mariibaa isa mandara Qaadeshitti dhi'oo jiru biratti, lafa onaa Siin keessatti waan na yakkitanii fi Israa'eloota gidduutti qulqullummaa koo ulfinaan waan hin eeginiif isinitti in dhufa*.

⁵²Ati biyyicha fuulleetti in argita, garuu ofii keetii biyya ani Israa'elootaaf kennu sanatti hin galtu? jedhe*.[175]