Seera Keessa Deebii 4:1-49 GAZB1997 - Bible AI

¹Museen itti fufee saba sanaan, ?Ammas isin yaa saba Israa'el, akka jiraattaniif, biyya Waaqayyo gooftaan inni kan abboota keessanii isiniif kennuttis galtanii akka qabattaniif, seerrataa fi wanta qajeelaa ta'e akka gootaniif isa ani isin barsiisu kana dhaggeeffadhaa*!

²Abboommota Waaqayyo gooftaa keessanii eegaa malee, dubbii ani isin abboometti waan tokko hin dabalinaa, waan tokkos irraa hin hir'isinaa*!

³Wanta Waaqayyo tulluu Phe'oritti hojjete iji keessan argeera; Waaqayyo gooftaan keessan namoota Ba'aal isa Phe'or waaqessan hundumaa isin gidduudhaa balleesseera*.

⁴Isin warri Waaqayyo gooftaa keessanitti jabaattanii dhaabattan hundinuu garuu, hamma har'aatti jirtu.

⁵Kunoo, isin biyya dhuunfaa keessan godhachuudhaaf itti galtan keessatti akka hojjettaniif, ani akkuma Waaqayyo gooftaan keessan na abboometti seerrataa fi wanta qajeelaa ta'e isin barsiiseera.

⁶Kun saba hundumaa duratti ogummaadhaa fi hubannaa keessan waan ta'uuf, isaan seerrata kana hundumaa yeroo dhaga'an, ?Dhuguma sabni guddaan kun saba ogeessaa fi hubataa dha? isiniin in jedhu; kanaaf isin kana duukaa bu'aa eegaa!

⁷Akkuma Waaqayyo gooftaan keenya yeroodhuma nuyi isa waammannutti nutti dhi'aatu kanatti, sabni guddaan waaqayyoliin isaa isatti dhi'aatan isa kam ree*?

⁸Sabni guddaan seerrataa fi firdii isa qajeelaa akka seera isa ani har'a isin dura kaa'u kana hundumaa qabu isa kam ree*?[21]

⁹?Isin garuu dammaqaa, wanta ijaan argitan akka hin irraanfannetti, bara jireenya keessanii guutuus garaa keessan keessaa akka hin badnetti of eeggadhaa! Ijoollee keessan, ijoollee ijoollee keessaniis barsiisaa*!

¹⁰Gaafa isin Siinaatti Waaqayyo gooftaa keessan dura dhaabattan, ?Sabni kun bara lafa irra jiraatan hundumaatti ana sodaachuu akka baraniif, ijoollee isaaniis akkasuma akka barsiisaniif, ani dubbii koo akka dhaga'an nan godha, atis na biratti walitti isaan qabi!? jedhee Waaqayyo anatti in dubbate? jedhe*.

¹¹Gaafas isin itti dhi'aattanii, miilla tulluu sanaa jala akka dhaabattan, tulluu duumessi gurraachi dukkanaa'aan itti uffifame sana irraas ibiddi hamma bantii waaqaatti ol akka boba'e,

¹²yommus Waaqayyo ibidda sana gidduudhaa isinitti akka dubbate, isinis sagalee isa isinitti dubbatame sana dhageessaniittu, garuu sagalee duwwaa malee, bifa tokko illee akka hin argin,

¹³inni kakuu isaa isinitti akka beeksise, abboommii kurnan isa akka isin gootaniif isin abboome sanas inni gabatoota dhagaa lama irratti akka caafe*,

¹⁴yeroo sana seerrataa fi wanta qajeelaa ta'e, isa isin biyya dhaaluuf jettan keessatti eegdan akkan isin barsiisuuf Waaqayyo akka na abboomes ijoollee keessanitti ijoollee ijoollee keessaniittis himaa![22]

¹⁵Kanaafis isin ofii keessaniif of eeggadhaa! Isin gaafa Waaqayyo Siinaatti ibidda gidduudhaa isinitti dubbate sana bifa tokko illee hin argine;

¹⁶isin fakkaattii waan tokkootiin bifa qirixame tolfachuudhaan karaa irraa akka hin kaanneef of eeggadhaa! Bifa waan tokko illee, kan dhiiraa yookiis kan dubartii*,

¹⁷fakkaattii bineensa lafa irraa tokko illee, fakkaattii waan baal'eedhaan qilleensa keessa balali'uu tokko illee,

¹⁸fakkaattii wanta lafa irra munyuuquu, fakkaattii qurxummii lafa jala bishaan keessa jiruu tokko illee tolfachuu irraa of eeggadhaa!

¹⁹Gara waaqaatti ol ilaaltanii, biiftuu, ji'a, urjoota, macca waaqa keessaa hundumaas yeroo argitan, walaalchifamtanii, warra Waaqayyo gooftaan keessan saba guutummaa bantii waaqaa jala jiraniif kenne sanaaf akka hin saganneef, isaaniifis akka hin hojjenneef of eeggadhaa*!

²⁰Waaqayyo garuu, biyya Gibxii isa akka iddoo ibidda sibiila itti baqsanii sana keessaa isin fuudhe, akka har'aa kana saba dhuunfaa isaa akka taataniif as isin fide*.

²¹Waaqayyo sababii keessaniif anatti aaree, ani laga Yordaanos akkan hin ceeneef, biyya isa gaarii Waaqayyo gooftaan keessan dhaala godhee isiniif kennuttis akkan hin galleef in kakate*.

²²Kanaaf ani biyya kanatti nan du'a malee, laga Yordaanos gamatti hin ce'u; isin garuu ceetanii biyya gaarii sana in dhaaltu.

²³Isin kakuu Waaqayyo gooftaan keessan isinii wajjin gale akka hin irraanfannetti, bifa fakkeenyaa isa Waaqayyo gooftaan keessan isin dhowwe fakkaattii waan tokkootiin akka hin tolfannettis of eeggadhaa*!

²⁴Waaqayyo gooftaan keessan ibidda xaph godhuu dha, Waaqayyo hinaafaa dhas*.[23]

²⁵Isin ijoollee godhattanii ijoollee ijoollee keessanii yommuu argitan, biyyicha keessas yeroo dheeraa yommuu turtan, fakkaattii waan tokkoon bifa fakkeenyaa tolfachuudhaan yoo karaa irraa kaattan, tuttuqxanii isa aarsuudhaafis wanta Waaqayyo gooftaa keessan duratti hamaa ta'e yoo hojjettan,

²⁶ani har'a waaqaa fi lafa waamee isin irratti dhugaa nan baasisa; biyya isa dhaaluudhaaf Yordaanosin ceetanii itti adeemtan kana irraa daftanii raawwattanii in balleeffamtu; isin raawwattanii in dhumtu malee yeroo dheeraa isa irra hin jiraattan*.

²⁷Waaqayyo saba warra kaan gidduu isin in bittimsa, lakkoobsi keessan muraasatee saba warra Waaqayyo isaan gidduutti isin bittimse keessattis muraasa taatanii in haftu.

²⁸Yommus isin achitti waaqayyolii warra muka irraa, dhagaa irraas harki namaa tolche, warra hin arginee fi warra hin dhageenyeef, warra hin nyaannee fi warra hin fuunfanneefis in hojjettu*.

²⁹Garuu achitti Waaqayyoon gooftaa keessan in barbaaddattu; isin garaa keessan guutuudhaan, yaada keessan guutuudhaanis yoo isa barbaaddattan isa in argattu*!

³⁰Isin yeroo rakkattan, dubbiin kun hundinuus yeroo isin irra ga'u, bara booddeetti gara Waaqayyo gooftaa keessaniitti in deebitu, dubbii isaatiifis in abboomamtu.

³¹Waaqayyo gooftaan keessan, Waaqayyo araara-qabeessa waan ta'eef, isin hin gatu, isin hin balleessu; kakuu isa cimsee abboota keessanii wajjin gale sanas hin irraanfatu*.[24]

³²Erga Waaqayyo nama biyya lafaa irratti uumee jalqabee waggoota isin dura darban keessatti dubbiin guddaan akkasii takkaa ta'ee yookiis dhaga'amee beeka yoo ta'eef gaafadha! Daarii waaqaa gar-tokkoo hamma gara isa kaaniittis iyyaafadhaa!

³³Akka isin sagalee Waaqayyoo dhageessanii fayyaatti jiraattan kana, sabni tokko ibidda gidduudhaa utuu inni itti dubbatuu takkaa dhaga'ee beekaa*?

³⁴Akka isa Waaqayyo gooftaan keessan biyya Gibxiitti fuula keessan duratti isiniif godhe, waaqayyolii keessaa yaaliidhaan, milikkitaan, lolaan, harka aango-qabeessaan, irree diriiraadhaan, wanta gurguddaa nama naasisuunis dhaqee, saba tokko saba warra kaan keessaa fudhatee kan isaa kan godhate tokko jiraa*?

³⁵Isin garuu gooftichi Waaqayyo akka ta'e, isa bukkeettis kan biraa akka hin jirre akka beektaniif, isinitti argisiifameera*.

³⁶Inni isin gorsee deebisuudhaaf waaqa irraa sagalee isaa akka dhageessan godhe; lafa irratti ibidda isaa isa guddaa isin argisiise; ibiddicha gidduudhaas dubbii isaa in dhageessan*.

³⁷Inni abboota keessan waan jaallateef, sanyii isaaniis isaan booddeedhaan fo'atee, ofii isaatii isin duratti argamee, humna isaa isa guddaadhaan biyya Gibxii keessaa isin in baase*.

³⁸Akka har'a asitti isin galche kana, yommus biyya isaaniis dhaala godhee isiniif kennuudhaaf, saba gurguddinaan, aangoodhaanis isin caalan fuula keessan duraa ari'ee in baase.

³⁹Kanaafis har'a gooftichi ol waaqa irratti, gad lafa irrattis Waaqayyo akka ta'e, kan biraas akka hin jirre beekaa, yaadattis qabadhaa!

⁴⁰Kanaaf isiniif, isin booddees ijoollee keessaniif akka tolutti, biyya Waaqayyo gooftaan keessan bara hundumaaf isiniif kennu keessattis barri keessan akka dheeratutti, seerrata isaa fi abboommii isaa warra ani har'a isin abboomu eeguun isiniif in ta'a.[25]

⁴¹Ergasii Museen mandaroota Yordaanos irraa gara ba'a biiftuu jiran sadii addaan in baase.

⁴²Kunis namni utuu hin beekin, duraanis haala utuu irraa hin qabaatin nama ajjeesee, mandaroota kana keessaa isa tokkotti yoo baqate akka jiraatuuf ture.

⁴³Mandaroonni sunis, Bezer isa bakkee diriiraa lafa onaa keessaa gosa Ruubeniif kenname, Amoot isa Giil'aad keessaa gosa Gaadiif kenname, Golaan isa Baashaan keessaa gosa Minaaseetiif kenname turan*.[26]

⁴⁴Seerri Museen Israa'eloota dura kaa'e kanatti aanee kan jiruu dha.

⁴⁵Isaanis dhuga-baatota, seerrata, wanta qajeelaa ta'es warra Museen yeroo Israa'eloonni biyya Gibxii ba'an itti dubbatee dha.

⁴⁶Inni laga Yordaanos irraa gara ba'a-biiftuu fuullee Bet-Phe'or biyya Sihoon mootii Amoorotaa isa Heshboon keessa jiraatu sanaatti ture; isa immoo Musee fi Israa'eloonni yeroo Gibxii ba'anii dhufan in balleessan.

⁴⁷Yommus isaan biyya isaa, biyya Oog mootii Baashaanis, biyya mootota Amoorotaa lamaan warra dachaa Yordaanos keessaa gara ba'a-biiftuu turan sana in qabatan.

⁴⁸Biyyichi Aro'er isa qarqara laga Aarnonii jalqabee hamma tulluu Siiyon isa Hermoon jedhamutti,

⁴⁹guutummaa Arabaayi isa Yordaanos irraa gara ba'a-biiftuu jirutti, hamma galaana Arabaayi isa miilla tulluu Phiisgaa jalaattis in bal'ata ture.