Seera Lakkoobsaa 23:1-30 GAZB1997 - Bible AI

¹Bala'aam yommus Balaaqiin, ?Asitti iddoo aarsaa torba anaaf ijaari, tuntunoo torbaa fi korbeessa hoolaa torba anaaf qopheessi!? jedhe.

²Balaaqis akkuma Bala'aam jedhe in godhe; Balaaqii fi Bala'aam mata mataa iddoo aarsaa tokko irratti tuntunoo tokkoo fi korbeessa hoolaa tokko aarsaadhaaf in dhi'eessan.

³Bala'aam yommus Balaaqiin, ?Ati qalma kee isa gubamu kana bira dhaabadhu, ani immoo tarii Waaqayyo anatti mul'achuuf waan dhufuuf nan adeema; waanuma inni anatti mul'isu immoo ani sitti nan hima? jedhee, ofii immoo gara iddoo ol ka'aa tokkoo in dhaqe.

⁴Waaqayyo yommus Bala'aamitti in mul'ate; Bala'aamis Waaqayyoon, ?Ani iddoo aarsaa torba qopheessee, tokkon tokkon isaa irrattis tuntunoo tokkoo fi korbeessa hoolaa tokko aarsaa dhi'eesseera? jedhe.

⁵Waaqayyo wanta inni dubbatu afaan Bala'aam keessa kaa'eefii, ?Gara Balaaqitti deebi'iitii isan sitti himuuf jedhu kana itti dubbadhu!? jedheen.

⁶Bala'aam gara Balaaqitti yeroo deebi'e, kunoo, Balaaq, gurguddoonni Mo'aabis qalma isaa isa gubamu sana bira in dhaabatu turan.

⁷Bala'aam dubbii isaa isa yaada gad fagoo of keessaa qabu sana jalqabee, ?Balaaq biyya Aaramii na fide, mootiin Mo'aab tulloota gara boruu irraa, ?Kottu, Yaaqoobin anaaf abaari, kottu, Israa'elitti anaaf qorobi!? jedhe.

⁸Isa Waaqayyo hin abaarin attamittan abaara? Isa Waaqayyo itti hin qorobinitti attamittan itti qoroba?

⁹Ani gubbeewwan kattaa irratti isa nan arga, gaarota irraas isa nan ilaala; ilaa, saba kophaa isaa jiraatu, isa saba warra kaan keessatti of hin lakkoofne,

¹⁰sanyii Yaaqoob isa akka biyyoo lafaa eenyutu lakkaa'uu danda'a? Lakkoobsa ruubii Israa'elis eenyutu hima? Ani akka du'a nama qajeelaatti du'inna, dhumni koos akka kan isaatii haa ta'u!? jedhe*.

¹¹Balaaqis Bala'aamiin, ?Inni ati ana irratti hojjette kun maali? Ani diinota koo akka anaaf abaartuufan si fide, ati garuu isaan eebbifte malee homaa isaan hin goone? jedhe.

¹²Inni immoo deebisee, ?Dubbii Waaqayyo afaan koo keessa kaa'e dubbachuudhaaf eeggachuun ana irra jira mitii ree?? jedhe*.[81]

¹³Balaaq yommus Bala'aamiin, ?As iddoo kanaa warra gara daarii jiran duwwaa argita malee, hunduma isaanii hin argitu; kanaafis kottuu iddoo kan biraa lafa dhaabattee jara argitu anaa wajjin dhaqiitii achi dhaabadhuu jara anaaf abaari!? jedhe.

¹⁴Innis gubbee tulluu Phiisgaa irratti, gara bakkee Zofiimitti isa geessee, achitti iddoo aarsaa torba ijaaree, tokkon tokkon isaa irrattis tuntunoo tokkoo fi korbeessa hoolaa tokko qalma gubamuuf in dhi'eesse.

¹⁵Bala'aam, ?Hamma ani garasitti Waaqayyoo wajjin wal argee deebi'utti, ati asuma qalma kee isa gubamu kana bira dhaabadhu!? jedhee Balaaqitti in dubbate.

¹⁶Waaqayyo yommus Bala'aamitti mul'atee, wanta inni dubbatus afaan isaa keessa kaa'eefii, ?Gara Balaaqitti deebi'iitii, isan sitti himuuf jedhu kana itti dubbadhu!? jedhe.

¹⁷Bala'aam gara Balaaq yommuu dhufe, kunoo Balaaq gurguddoota Mo'aabii wajjin qalma isaa isa gubamu sana bira in dhaabata ture; Balaaq yommus, ?Waaqayyo maal dubbate?? jedhee, Bala'aamin in gaafate.

¹⁸Bala'aamis dubbii isaa isa yaada gad fagoo of keessaa qabu sana dubbachuu ittuma fufee,

¹⁸?Ka'i yaa Balaaq, dhaga'is, yaa ilma Ziphoor na dhaggeeffadhu!

¹⁹Waaqayyo akka namaa miti, inni hin sobu, gaabbuudhaafis inni ilma namaa miti, inni wanta jedhe hin godhuu ree? Wanta dubbates hin raawwatuu ree*?

²⁰Kunoo, ani eebbisuudhaaf abboomameera, inni eebbiseera, ani immoo akka inni irraa deebi'u gochuu hin danda'u.[82]

²¹?Inni Yaaqoob irratti dabaa hin argine, rakkinas Israa'el irratti hin caqafne; Waaqayyo gooftaan isaanii isaanii wajjin jira, sagaleen mootii inni gammachiisaan isaan gidduudhaa in dhaga'ama.

²²Waaqayyo biyya Gibxii isaan in baase, inni akka gaanfa gafarsaa isa jabaatti isaaniif in faccise.

²³Yaaqoob irratti hoodni hin dubbatamne, Israa'el irrattis ayyaanni hin hedamne; amma waa'ee Yaaqoobiif yookiis waa'ee Israa'eliif kan dubbatamu, ?Wanta Waaqayyo godhe ilaalaa!? kan jedhuu dha.

²⁴Kunoo sabni sun akka leenca dhalaatti in ka'a, akka leencaa ol of in kaasa, isa adamsee qabate hamma nyaatutti, dhiiga isa qalames hamma dhugutti hin ciisu!? jedhe*.

²⁵Balaaq immoo Bala'aamiin, ?Ati erga isaan abaaruu dhiiftee immoo isaan hin eebbisin kaa!? jedhe.

²⁶Bala'aam deebisee Balaaqiin, ?Ani wanta Waaqayyo jedhu hundumaa gochuun akka ana irra jiru sitti hin himnee ree?? jedhe.

²⁷Balaaq ammoo Bala'aamiin, ?Kottu amma iddoo biraatti sin geessa, tarii achi dhaabattee jara kana anaaf abaaruun kee Waaqayyotti in tola ta'a? jedhe.

²⁸Balaaq yommus Bala'aamiin gubbee tulluu Phe'or isa irra dhaabatanii lafa onaa sana gad ilaalanitti ol in baase;

²⁹Bala'aamis Balaaqiin, ?Asitti iddoo aarsaa torba anaaf ijaariitii tuntunoo torbaa fi korbeessa hoolaa torba anaaf qopheessi!? jedhe.

³⁰Balaaq akkuma Bala'aam jedhe godhe, tokkon tokkon iddoo aarsaa sana irratti tuntunoo tokkoo fi korbeessa hoolaa tokko aarsaa in dhi'eesse.[83]