Seera Lakkoobsaa 31:1-54 GAZB1997 - Bible AI

¹Waaqayyo yommus Museetti dubbatee,

²?Ijaa Israa'elootaa warra Miidiyaan irratti ba'i! Isa booddee ati gara saba keetti in sassaabamta? jedhe*.

³Kana irratti Museen saba sanaan, ?Isin keessaa dhaqanii Miidiyaan irratti Waaqayyoof ijaa akka baasaniif namoota lolaaf hidhachiisaa!

⁴Tokkon tokkon gosa Israa'el keessaa nama kuma tokko tokko gara lola sanaatti ergaa!? jedhe.

⁵Akkasitti tokkon tokkon gosa Israa'el keessaa namni kumni tokko tokko, walitti kumni kudha lama lolaaf in hidhatan.

⁶Museen gosa gosa tokko keessaa nama kuma tokko tokko sana Fiinehaas ilma Ele'azaar lubichaa isa mi'a iddoo qulqullaa'aa fi fiingee isa ittiin dammaqsan harkatti qabatee jiruu wajjin gara lola sanaatti in erge*.[106]

⁷Isaan akkuma Waaqayyo Musee abboome warra Miidiyaan in lolan, dhiira hundumaas in ajjeesan*.

⁸Warra kana malees mootota Miidiyaan, Ewii, Reqem, Zuur, Huurii fi Rebaa kan jedhaman shanan in ajjeesan; akkasumas Bala'aamin ilma Be'or billaadhaan in ajjeesan*.

⁹Kana malees Israa'eloonni dubartoota warra Miidiyaan, ijoollee isaanii, horii qe'ee isaanii, qabeenya isaanii hundumaa in booji'an, badhaadhummaa isaanii hundumaas in saaman.

¹⁰Mandaroota isaanii hundumaa, warra achi keessa jiraatan hundumaa, riqaa isaanii hundumaas ibiddaan in guban.

¹¹Wanta booji'an hundumaa, namoota keessaa, horii keessaas warra qabatan hundumaa in fudhatan.

¹²Isaan boojuu sana, wanta qabame, wanta saamames gara iddoo buufataa isa dachaa Mo'aab bukkee laga Yordaanos fuullee Yerikootti dhi'oo sanatti Museetti, Ele'azaar lubichaa fi waldaa Israa'elitti in fidan.[107]

¹³Yommus Museen, Ele'azaar lubichii fi geggeessitoonni waldaa sanaa hundinuu iddoo buufataa duubatti isaan simuudhaaf in ba'an.

¹⁴Museen warra loltoota irratti aboo qaban, angafoota kumaa fi angafoota dhibbaa warra waraanaa turanii deebi'anitti in dheekkame.

¹⁵Museen isaaniin, ?Dubartoonni hundinuu hafanii akka jiraatan gootanii?

¹⁶Isaan kun warra gorsa Bala'aam duukaa bu'anii, wanta Phe'oritti ta'e sanaan Israa'eloota Waaqayyo irraa deebisanii dha; kana irrattis dha'ichi saba Waaqayyoo irratti in dhufe*.

¹⁷Amma ijoollee keessaa dhiira kan ta'e ajjeesaa! Dubartoota warra dhiiraa wajjin ciisanii beekan hundumaas ajjeesaa*!

¹⁸Durboota dhiiraa wajjin ciisanii hin beekne hundumaa garuu ofii keessaniif hambifadhaa!

¹⁹Isin warri nama ajjeeftan, warri reeffatti buutan hundinuus guyyaa torbaaf iddoo buufataa duuba buufadhaa! Gaafa guyyaa sadaffaa, gaafa guyyaa torbaffaas ofii keessan, boojuu keessanis qulleessaa*!

²⁰Uffata hundumaa, wanta gogaa irraa hojjetame hundumaa, wanta rifeensa reettii irraa hojjetame hundumaa, qodaa mukaa hundumaas qulleessaa!? jedhe.[108]

²¹Ergasii Ele'azaar lubichi loltoota warra duula dhaqanii turan sanaan, ?Seerichi inni qajeelaa ta'e, inni Waaqayyo Musee abboome isa kanatti fufee jiruu dha;

²²warqee, meetii, sibiila borrajjii, sibiila, qorqorroo, dilalii,

²³wanta ibidda jala dhaabachuu danda'u hundumaa, ibidda keessa buusaa qulleessaa! Akkasumas bishaan ittiin qulleessaniin haa qulleeffamu! Wanta ibidda jala dhaabachuu hin dandeenye hundumaa immoo bishaaniin qulleessaa!

²⁴Gaafa guyyaa torbaffaa uffata keessan miiccadhaa, qullaa'aa! Kana booddees gara iddoo buufataatti ol galaa!? jedhe.

²⁵Waaqayyo Museedhaan,

²⁶?Atii fi Ele'azaar lubichi, waldicha keessaa warra dura-buutota qomoowwanii ta'anii wajjin namootaa fi horii booji'amanii dhufan lakkaa'aa!

²⁷Boojuu kanas warra loltuu duulicha dhaqanii fi guutummaa waldaa gidduutti iddoo lamatti hiraa*!

²⁸Ga'aa loltuu warra duula dhaqanii turan sana irraa immoo namoota keessaa, saawwan keessaa, harroota keessaa, bushaayee keessaas dhibba shan keessaa tokko qooda godhii ana Waaqayyoof fuudhi!

²⁹Isas aarsaa ana Waaqayyoof sochoofamuuf Ele'azaar lubichatti kenni!

³⁰Walakkaa isa kan Israa'elootaa irraas, namoota keessaa, saawwan keessaa, harroota keessaa, bushaayee keessaa, horii hundumaa keessaas shantama keessaa tokko fuudhii Lewwoota warra hojii godoo koo keessaa geggeessuutti gaafatamanitti kenni!? jedhe.

³¹Museenii fi Ele'azaar lubichi akkuma Waaqayyo abboome in godhan.[109]

³²Wanti warri loltootaa saaman utuu itti hin dabalamin, kan isaan booji'an hoolaan kumaatama dhibba ja'aa fi torbaatamii shan,

³³saawwan kuma torbaatamii lama,

³⁴harroonni kuma jaatamii tokko,

³⁵namoota keessaa immoo durboonni dhiiraa wajjin ciisanii hin beekne walumatti kuma soddomii lama turan.

³⁶Walakkaan inni ga'aa warra duula dhaqanii turanii, hoolota kumaatama dhibba sadii fi kuma soddomii torbaa fi dhibba shan.

³⁷Isaan keessaa qoodni Waaqayyoof baafame hoolota dhibba ja'aa fi torbaatamii shan.

³⁸Saawwan kuma soddomii ja'a; isaan keessaa qoodni Waaqayyoof baafame torbaatamii lama turan.

³⁹Harroonni kuma soddomaa fi dhibba shan; isaan keessaa qoodni Waaqayyoof baafame jaatamii tokko.

⁴⁰Namoonni kuma kudha ja'a; isaan keessaa qoodni Waaqayyoof baafame soddomii lama turan.

⁴¹Museen qooda isa Waaqayyoof baafame aarsaa sochoofamu ta'ee dhi'aatu sana akkuma Waaqayyo isa abboometti Ele'azaar lubichatti in kenne.

⁴²Walakkaan inni kan Israa'elootaa inni Museen kan warra duula dhaqanii turanii sana irraa hireef,

⁴³walakkaan inni kan waldaa, hoolonni kumaatama dhibba sadii fi kuma soddomii torbaa fi dhibba shan;

⁴⁴saawwan kuma soddomii ja'a;

⁴⁵harroonni kuma soddomaa fi dhibba shan;

⁴⁶namoonni kuma kudha ja'a turan.

⁴⁷Museen walakkaa isa kan Israa'elootaa irraa, namoota keessaa, horii keessaas shantama keessaa tokko fuudhee, akkuma Waaqayyo isa abboometti, Lewwoota warra hojii godoo Waaqayyo keessaa geggeessuutti gaafatamanitti in kenne.

⁴⁸Yommus warri kumaatama loltootaa irratti aboo qaban, angafoonni kumaa, angafoonni dhibbaas gara Museetti in dhi'aatan;

⁴⁹Museedhaanis, ?Nuyi hojjetoonni kee loltoota abboommii keenya jala jiran lakkoofneerra, nu keessaas namni tokko illee hin dhabamne.

⁵⁰Nuyi fuula Waaqayyoo duratti araarfachuudhaaf wanta namni adduma addaan argate, mi'a warqee, irboora, bitawoo, amartii mallattoo, amartii gurraa, callees fidneerra? jedhan*.

⁵¹Museenii fi Ele'azaar lubichi warqichaa fi mi'a harkaan hojjetame sana hundumaa isaan harkaa fuudhan.

⁵²Warqeen aarsaa sochoofamu sanaa inni angafoota kumaa fi angafoota dhibbaa biraa fuudhanii Waaqayyoof dhi'eessan hundinuu sheeqelii kuma kudha ja'aa fi dhibba torbaa fi shantama ture.

⁵³Warri loltuu immoo wanta saaman adduma addaan ofii isaaniitiif in fudhatan.

⁵⁴Museenii fi Ele'azaar lubichi warqicha angafoota kumaa fi angafoota dhibbaa harkaa fuudhan sana, Israa'eloonni fuula Waaqayyoo duratti akka ittiin yaadatamaniif, dunkaana itti wal ga'anitti in galchan*.[110]