WANGEELA MAATEWOS 13:1-58 GAZB1997 - Bible AI

¹Guyyaadhuma sanas Yesus manaa ba'ee ciisa bishaanii bira taa'e.

²Tuuti sonaan guddaan isa biratti walitti qabamnaan, bidiruu tokko yaabbatee barsiisuudhaaf taa'e; namoonni hundinuu immoo qarqara ciisa bishaanichaa in dhaabatu turan*.

³Yesus fakkeenya garaa garaatiin waan baay'ee isaanitti himuutti ka'e, ?Kunoo, namichi tokko sanyii facaasuudhaaf ba'e.

⁴Inni utuu facaasuu kaan karaa bukkee bu'an, simbirroonni immoo dhufanii funaananii nyaatan.

⁵Kaan immoo lafa dhagaa, lafa biyyoo baay'ee hin qabne irra bu'an; lafti isaan irra bu'anis biyyoo gad fagoo waan hin qabneef dafanii biqilan.

⁶Yommuu aduun itti baate garuu in coollagan; hidda gad fagoo waan hin godhatiniifis in gogan.

⁷Kaan qoraattii keessa bu'an; qoraattonnis guddatanii isaan hudhan.

⁸Kaan garuu biyyoo gaarii irra bu'anii ija godhatan, iji isaaniis kaan dachaa dhibba, kaan dachaa jaatama, kaanis dachaa soddoma ta'e.

⁹Namni gurra qabu haa dhaggeeffatu!? jedhe*.[97]

¹⁰Ergasii bartoonni Yesusitti dhi'aatanii, ?Maaliif fakkeenyaan isaanitti dubbatta?? jedhanii isa gaafatan.

¹¹Yesus immoo deebisee, ?Dhoksaa mootummaa waaqaa beekuun isiniif kennameera; isaaniif garuu hin kennamne.

¹²Isa fudhatee waa qabuuf, hamma isa irraa hafutti itti dabalamee in kennamaaf, kan hin qabne garuu, innumti inni qabu iyyuu isa duraa in fudhatama*.

¹³Isaan utuma ilaalanii hin argan, utuma dhaggeeffatanii hin dhaga'an, hin hubatanis; kanaafan fakkeenyaan isaanitti dubbadha.

¹⁴Egaa raajiin, Isaayaas dubbate isaanitti raawwatameera;

¹⁴inni, ?Dhaga'uu in dhageessu garuu hin hubattan; ilaaluu in ilaaltu, garuu hin argitan*.

¹⁵Yaadni garaa saba kanaa hadoodeera'o; gurra isaanii cuqaalaniiru, ija isaaniis dununfachiisaniiru. Silaa'oo, ija isaaniitiin in argu, gurra isaaniitiinis in dhaga'u turan; yaada garaa isaaniitiinis in hubatu, gara koottis in deebi'u turan, anis isaan nan fayyisan ture? jedha ture.[98]

¹⁶?Iji keessan garuu waan arganiif gurri keessanis waan dhaga'aniif ayyaantuu dha*.

¹⁷Raajonni baay'eenii fi warri jireenya qajeeltoo jiraatan isa isin argitan kana arguu akka kajeelan, akka hin argin hafanis, waan isin dhageessanis dhaga'uu akka kajeelan, akka hin dhaga'in hafanis dhuguman isinitti hima? ittiin jedhe*.[99]

¹⁸Yesus itti fufee, ?Egaa fakkeenyi namicha sanyii facaasuu maalitti akka hiikamu dhaggeeffadhaa.

¹⁹Akkuma sanyiin karaa bukkeetti facaafame ta'e, eenyu illee dubbii mootummichaa dhaga'ee yoo hubachuu dhabaate, inni hamaan dhufee dubbicha isa garaa isaa keessatti facaafame in butata.

²⁰Akkuma sanyiin lafa dhagaa keessatti facaafame ta'e, akkasuma namni dubbicha dhaga'ee achumaan gammachuudhaan in fudhata.

²¹Inni yeroodhaaf malee hundee hin qabu; sababii dubbichaatiif rakkinni yookiis ari'atamuun yommuu ka'u achumaan in gufata.

²²Akkuma sanyiin qoraattii keessa bu'e ta'e, akkasuma namni dubbicha in dhaga'a; kana booddees yaaddoon biyya lafaa, gowwoomsaan soorumaa dubbicha in hudha, ija utuu hin godhatinis in hafa*.

²³Akkuma sanyiin lafa gaariitti facaafame ta'e immoo, akkasuma namni dubbicha in dhaga'a in hubatas; ija godhates, inni tokko dhibba, inni tokko jaatama inni kaanis soddoma in baata? jedhe.[100]

²⁴Yesus ammoo fakkeenya biraa tokko isaanitti hime, ?Mootummaan waaqaa nama sanyii gaarii qotiisa isaatti facaafatetti in fakkeeffama.

²⁵Yeroo namni rafuttis diinni namichaa dhufee, inkirdaada qamadii keessa facaasee sokke.

²⁶Midhaanichi guddatee ija erga godhatee booddee, inkirdaadichis immoo mul'ate.

²⁷Kana irratti hojjetoonni abbaa warraatti dhi'aatanii, ?Gooftaa, sanyii gaarii qotiisa keetti facaafte mitii? Inkirdaada immoo eessaa godhate ree?? jedhaniin.

²⁸Inni immoo, ?Nama diina koo ta'etu kana godhe? jedhee isaaniif in deebise; yommus hojjetoonni, ?Nuyi dhaqnee isa akka aramnu barbaaddaa ree?? jedhaniin.

²⁹Abbaan qotiisichaa garuu, ?Lakkii inkirdaada utuu aramtanii isaa wajjin qamadii akka hin buqqifnetti, dhiisaa!

³⁰Hamma yeroo midhaan sassaabamutti lachuu walumaa wajjin haa guddatan. Yeroo midhaan sassaabamutti warri sassaaban, dura in kirdaadicha bubuqqisanii akka gubamuuf bissii bissiitti akka hidhaniif, qamadicha garuu gombisaa kootti akka anaaf sassaabaniif ittan himadha? jedhee isaaniif deebise? jedhe*.[101]

³¹Yesus itti fufee fakkeenya kan biraa tokko isaanitti hime; ?Mootummaan waaqaa ija sanaaficaa namni fuudhee qotiisa isaa keessa facaase fakkaata.

³²Iji isaa sanyii hundumaa irra xinnayyoo dha, yommuu guddatu garuu biqila hundumaa irra caalee mukas ta'e, simbirroonni dhufanii damee isaa irratti mann'ee in ijaarratu? jedhe*.[102]

³³Yesus ammas ?Mootummaan waaqaa raacitii dubartiin fuutee daakuu safartuu sadiin maktee, raacitichis hunduma isaa bukeessu fakkaata? jedhee fakkeenya kan biraa tokko isaanitti in dubbate.

³⁴Yesus kana hundumaa fakkeenyaan namoota sanatti dubbate; fakkeenya malees waan tokko isaanitti hin dubbanne.

³⁵Kanaan raajichaan inni,

³⁵?Fakkeenyaanan afaan saaqqadha, uumamuu biyya lafaatii jalqabee isa dhokatee tures nan beeksisa? jedhamee dubbatamee in raawwatame*.[103]

³⁶Yesus kana booddee namoota sana gad dhiisee manatti ol lixe; yommus bartoonni isaa itti dhi'aatanii, ?Fakkeenya inkirdaada qotiisicha keessaa nuuf hiiki!? jedhaniin.

³⁷Yesus immoo deebisee, ?Inni sanyii gaarii facaasu ilma namaa ti;

³⁸qotiisichi biyya lafaa ti; sanyiin gaariin ilmaan mootummaa ti; inkirdaadis ilmaan isa hamaa ti*.

³⁹Diinichi inkirdaada facaase Seexana; yeroon itti midhaan sassaabamu dhuma biyya lafaa ti; warri midhaan sassaabanis ergamoota Waaqayyoo ti.

⁴⁰Akkuma inkirdaadi walitti qabamee ibiddaan gubamu, dhuma biyya lafaattis immoo akkasuma in ta'a*.

⁴¹Ilmi namaa ergamoota isaa in erga; isaanis karaa Waaqayyo irraa waan nama gufachiisu hundumaa, warra hamaa hojjetan hundumaas mootummaa isaa keessaa walitti in qabu*,

⁴²boolla ibiddaattis isaan in darbatu. Achitti boo'ichii fi ilkaan qaruun isaan irra in ga'a*.

⁴³Egaa warri qajeeltonni mootummaa abbaa isaanii keessatti akka biiftuu in ifu; namni gurra qabu haa dhaggeeffatu!? jedheen*.[104]

⁴⁴Yommus Yesus, ?Mootummaan waaqaa qabeenya lafa qotiisaa keessa dhokfame fakkaata; namni tokko qabeenya kana argee deebisee erga dhoksee booddee, gammachuu irraa kan ka'e dhaqee waan qabu hundumaa gurguree lafa qotiisaa sana bitate*.[105]

⁴⁵?Mootummaan waaqaa ammas naggaadee callee babba'eessa barbaadu fakkaata.

⁴⁶Naggaadichi callee gati-jabeessa argannaan, dhaqee waan qabu hundumaa gurguree callee sana bitate? jedhe*.[106]

⁴⁷Yesus itti fufee, ?Mootummaan waaqaa ammas kiyyoo galaanatti darbatamee akaakuu qurxummii hundumaa walitti qabe fakkaata*.

⁴⁸Kiyyichis guunnaan, qurxummi-qabduun gara qarqara bishaaniitti isa harkisanii, taa'anii qurxummii isa gaggaarii qodaa isaaniitti naqanii, isa gaggadhee immoo gaggatan.

⁴⁹Yeroo dhuma biyya lafaattis akkasuma in ta'a; ergamoonni Waaqayyoo ba'anii warra hamoota warra qajeelotattii gargar in baasu*.

⁵⁰Warra hamoota boolla ibiddaatti in darbatu; achitti boo'ichii fi ilkaan qaruun isaan irra in ga'a? jedhe*.[107]

⁵¹Kana booddee Yesus, ?Kana hundumaa hubattaniittuu ree?? jedhee isaan gaafate; isaan immoo deebisanii, ?Eyyee? jedhaniin.

⁵²Inni garuu, ?Kanaaf barsiisaan seera durii mootummaa waaqaatiif bartuu ta'e qopheeffame hundinuu, abbaa manaa isa mana mi'a isaatii keessaa waan haaraa fi waan moofaa gad baasu fakkaata? jedhe.

⁵³Yesus fakkeenya kana hundumaa isaanitti himee erga raawwatee, iddoo sana dhiisee in adeeme*.

⁵⁴Gara mandara kutaa biyya itti dhalatee dhaqee, mana sagadaa isaanii keessatti isaan barsiise. Warri isa dhaga'an immoo raajeffatanii, ?Ogummaan akkasii hojiin aangoo kun hundinuus eessaa dhufeef?

⁵⁵Kun ilma isa muka sooftichaa mitii? Haati isaas Maariyaam jedhamtee waamamti mitii ree? Yaaqoobii fi Yosee fi, Simoonii fi Yihudaan obbolaa isaa ti mitii*?

⁵⁶Obboleettonni isaas hundinuu as nu bira jiru mitii ree? Egaa wanti kun hundinuu eessaa dhufeef?? jedhan*.

⁵⁷Isaan kanaaf isa maman; Yesus garuu, ?Raajiin iddoo biraatti malee, biyya isaatti, mana ofii isaattis ulfina hin argatu? isaaniin jedhe*.

⁵⁸Sababii amanti-dhabina isaaniitiif hojii aangoo baay'isee achitti hin hojjenne.[108]