1O loo faapea mai Ieova, E tolu agasala a Moapi, e fa foi, ou te le liliu ese ai lana sala; auā na ia susunuina ivi o le tupu o Etoma na liu panisina.
2A e ou te tuuina atu le afi i Moapi, e faaumatia ai maota o Kiriota; e oti Moapi i le vāvāō, ma le alaga, ma le leo o le pu.
3Ou te faaumatia le faamasino o i lea mea, ou te fasiotia faatasi ma ia o alii uma, o loo fetalai mai ai Ieova.
4O loo faapea mai Ieova, E tolu agasala a Iuta, e fa foi, ou te le liliu ese ai lana sala; auā na latou lafoai le tulafono a Ieova, e lei tausi foi e i latou ana poloaiga; ua faaseseina i latou i a latou mea pepelo, sa naunau atu i ai o latou tamā.
5A e ou te tuuina atu le afi i Iuta, e faaumatia ai maota o Ierusalema.
6O loo faapea mai Ieova, E tolu agasala a Isaraelu, e fa foi, ou te le liliu ese ai lana sala; auā na latou faatauina atu le ua amiotonu i ario, ma le ua mativa i seevae e lua.
7O e naunau atu i le efuefu o le laueleele i ulu o e matitiva, ma latou liliu ese le ala o e agamalu; e alu ane foi le tagata atoa ma lona tamā i le teine e toatasi, ina ia ta‘uvaleina ai lo‘u igoa paia.
8Ua latou taooto foi i ofu ua tuu faafaatau i tafatafa o fata faitaulaga uma; ma ua latou inu uaina a e ua faasalaina i le fale o latou atua.
9A o a‘u, na ou faaumatia le sa Amorī ai o latou luma, o lona maualuga e pei o le maualuga o arasi ia, sa malosi foi o ia e pei o aluna; na ou faaumatia foi lona fua i luga ma ona aa i lalo.
10Na ou aveina ae foi outou ai le nuu o Aikupito; na ou ta‘ita‘iina outou i tausaga e fagafulu i le vao e maua ai le laueleele o le sa Amorī.
11Na ou faatuina ni o outou atalii e fai ma perofeta, ma ni o outou taulelea e fai ma naseri. Le fanauga a Isaraelu e, e le ua faapea lava ea? o loo fetalai mai ai Ieova.
12A ua outou avatua uaina i le au naseri e inu ai, ma vavao atu i le au perofeta, o loo faapea atu, Aua le vavalo mai.
13Faauta, ou te taomia outou i lalo, e pei ona taomia o le eleele i le fata faataavalevale ua tumu i fusi saito.
14E iu vale le solaaga o le tele vave, e le faateleina e le ua malosi lona malosi; o le toa foi na te le faasaoina lona lava ola.
15O le ua fai aufana e le tumau ia; ma le ua momo‘e tele vave e le sao ai o ia; o lē tietie i le solofanua e le faasaoina ai foi e ia lona ola.
16O le toa ua sili lona loto tele, e sola lē lavalavā o ia i lea aso, o loo fetalai mai ai Ieova.