1Ona fetalai mai lea a Ieova ia Mose, O le a ē iloa le mea ou te faia ia Farao; auā o le lima malosi na te tuuina atu ai i latou e o, o le lima malosi foi na te tuli ai ia te i latou ai lona nuu.
2Ua fetalai mai foi le Atua ia Mose, o loo faapea mai ia te ia,
3O a‘u nei o Ieova; na iloa a‘u e Aperaamo, ma Isaako, ma Iakopo i lo‘u igoa o le Atua e ona le malosi uma lava; a e peitai o lo‘u igoa o IEOVA, na lei iloa ai a‘u e i latou.
4Ua ou faatumauina foi la‘u feagaiga ma i latou, e avatu ia te i latou le nuu o Kanana, o le nuu sa latou faatagataese ai, sa latou āumau ai.
5O a‘u foi na ou faalogo i le feoi o le fanauga a Isaraelu, o e ua faapologaina e Aikupito, ua ou manatua foi la‘u feagaiga.
6O lenei, fai atu i le fanauga a Isaraelu, O a‘u o Ieova, ou te aumaia outou i lalo o avega mamafa a Aikupito; ou te laveai mai foi ia te outou ai a latou galuega, ou te faaolaina mai foi outou i le lima faaloaloa ma sala tetele.
7Ou te faia outou mo‘u nuu, e fai foi a‘u mo outou Atua; tou te iloa foi o a‘u lava o Ieova, o lo outou Atua, o le aumaia outou i lalo o avega mamafa a Aikupito.
8Ou te faaooina atu foi outou i le nuu na ou siitia ai lo‘u lima, ou te avatu ia Aperaamo, ma Isaako, ma Iakopo, ou te avatu ai ia te outou ma tofi; o a‘u nei o Ieova.
9Ua faapea lava ona tautala atu Mose i le fanauga a Isaraelu, a e lei faalogo i latou ia Mose ona o lo latou loto tiga ma le galuega mamafa.
10Ua fetalai mai foi Ieova ia Mose, o loo faapea mai.
11Alu ia, fai atu ia Farao le tupu o Aikupito, ia tuu mai e ia o le fanauga a Isaraelu e o ese i lona nuu.
12A ua fai atu Mose i luma o Ieova, ua faapea atu, Silasila mai ia, e lei faalogo mai ia te au le fanauga a Isaraelu, pe faapefea ona faalogo mai o Farao ia te au, o a‘u foi ua le matala la‘u gagana?
13Ua fetalai mai foi Ieova ia Mose ma Arona, ma aauina atu i laua i le fanauga a Isaraelu atoa ma Farao le tupu o Aikupito, ina ia la aumaia le fanauga a Isaraelu mai le nuu o Aikupito.
14O tupuga nei o aiga o latou tamā. O atalii nei o Reupena, o le ulumatua lea a Isaraelu; o Enoka, ma Falu, ma Esarona, ma Karame; o aiga ia o Reupena.
15O atalii nei o Simeona; o Iemuelu, ma Iaminu, ma Oata, ma Iakinu, ma Soaro, ma Saulo, o le tama lea a le fafine Kanana; o aiga ia o Simeona.
16O igoa nei o atalii o Levi i o latou tupulaga; o Keresoma, ma Koato, ma Merari. O tausaga foi na ola ai Levi, e tasi le selau ma le tolugafulu ma le fitu.
17O atalii nei o Keresoma i o la aiga; o Lepeni ma Semi.
18O atalii foi nei o Koato; o Amaramo, ma Isara, ma Heperona, ma Usialu. O tausaga foi na ola ai Koato, e tasi le selau e tolugafulu ma le tolu.
19O atalii foi nei o Merari; o Maali ma Muse; o i latou nei o aiga o Levi i o latou lava tupulaga.
20Ua fai avā foi Amaramo ia Iokapeta, o le tuafafine lea o lona tamā; na ia fanau mai foi ia te ia o Arona ma Mose. O tausaga foi ia na ola ai Amaramo, e tasi le selau e tolugafulu ma le fitu.
21O atalii foi nei o Isara; o Koru ma Nefeku, ma Sekari.
22O atalii foi nei o Usialu; o Mesalu, ma Elisafano, ma Seteri.
23Ua fai avā Arona ia Elisapeta, o le afafine o Aminatapu, o le tuafafine o Naasona; na ia fanau mai ai foi ia te ia o Natapu, ma Aviu, o Eleasaro, ma Itamaro.
24O atalii nei o Koru; o Asiro, ma Elekana, ma Aviasafo; o aiga ia o sa Korū.
25Ua fai avā foi Eleasaro le atalii o Arona i le tasi afafine o Potialu; na ia fanau mai foi ia te ia o Fineaso. O tupuga nei o tamā o sa Levī i o latou aiga.
26O Arona ma Mose ia na fetalai mai i ai Ieova, la te aumaia le fanauga a Isaraelu nai le nuu o Aikupito i a latou lava ‘au.
27O i laua nei na fai atu ia Farao le tupu o Aikupito, la te aumaia le fanauga a Isaraelu nai Aikupito; o Mose lenei ma Arona.
28Ua oo i le aso na fetalai mai ai Ieova ia Mose i le nuu o Aikupito;
29ua fetalai mai ai Ieova ia Mose, o faapea mai, O a‘u nei o Ieova; fai atu ia i le tupu o Aikupito o Farao, o mea uma lava ou te fai atu ai ia te oe.
30Na fai atu foi Mose i luma o Ieova, Silasila mai, o a‘u e le matala la‘u gagana; pe faapefea ea ona faalogo mai o Farao ia te au?