1Ua tali mai pea Eliu, ua faapea mai, E te manatu ea ua tonu lenei mea, ina ua e fai mai,
2E sili la‘u amiotonu i lo le Atua?
3Auā ua e fai mai, Se a le aoga ia te oe? Se a foi le aoga ia te au pe a leai sa‘u agasala?
4Ou te tali atu ia te oe, atoa ma au uo faatasi ma oe.
5Ia e tepa ae i le lagi, ma ia e vaai; ia e matamata foi i ao ua maualuga lava i ou luga.
6Afai ua e agasala, se a se mea ua e fai ia te ia? Afai foi ua faateleina ou solitulafono, se a se mea ua e fai ia te ia?
7Afai ua e amiotonu, se a se mea ua e avatua ia te ia? Se a foi se mea ua ia maua mai lou lima?
8Ai e leaga le tagata e pei o oe i lau amio leaga; ai e aoga foi i le tagata o lau amiotonu.
9O le tele o sauaga ua alalaga ai tagata; ua uio i latou ona o le lima o e malolosi.
10A e leai se na te fai mai, Po o ifea o i ai le Atua o le na faia a‘u? O le ua au mai pese i le po.
11O le a‘oa‘o mai ia te i tatou e sili i manu e tataa, ma na faapopotoina i tatou e sili i manu felelei.
12Ua latou alalaga ai, a e le tali atu o ia, ona o le faamaualuga o e amio leaga.
13E le faafofogaina lava e le Atua le tatalo faatauvaa; e le silasila foi i ai Le e ona le malosi uma lava.
14E ui lava ina e fai mai e te le iloa atu o ia, a e ia te ia le faamasinoga; o lea ia e faatalitali ai ia te ia.
15A o lenei, ina ua le asiasi mai lona toasa, ma ua le silasila o ia i le agasala e matuā tele lava;
16o le mea lea ua tautala fua mai ai Iopu, ua faateleina upu i lona le iloa.