1Ia outou vivii atu ia Ioa, Vivii atu outou ia Ieova, auā e lelei lava o ia; auā e faavavau lava lona alofa.
2O ai se na te mafaia ona ta‘u atu i mea mamana a Ieova? O ai se na te faailoa ona viiga uma lava?
3Amuia i latou o e tausi i le faamasinoga, o e fai le amiotonu e le aunoa.
4Ieova e, ia e manatu mai ia te au e tusa ma lou finagalo alofa i ou tagata. Ia e asiasi mai ia te au ma lau faaolataga;
5ina ia ou iloa atu le manuia o e na e filifilia, ina ia ou fiafia i le fiafia o lou nuu; ina ia ou mitamita faatasi ma e ua fai mou tofi.
6Ua matou agasala atoa ma o matou tamā, ua amio faapiopio i matou, ua matou amio leaga lava.
7E lei mafaufau o matou tamā i ou vavega i Aikupito; e lei manatua e i latou le tele o au meaalofa; a ua fouvale i tala ane o le sami, o le sami Ulaula.
8A ua na faaola ia i latou ona o lona lava suafa, ina ia faailoa atu ai lona mana.
9Ua ia aoai atu i le sami Ulaula, i le ua matutu; ua ia aumaia i latou i mea loloto e pei o le vao.
10Ua na faaola ia i latou nai le lima o le na ‘ino‘ino ia i latou, ma na faaolaina ai nai le lima o le na ita i ai.
11A ua lofia i le sami e na faasaua ia i latou; ua leai so latou na toe.
12Ona talitonu lea o i latou i ana afioga, ua latou pepese i ona viiga.
13Ua vave galo ia te i latou o ana mea na fai; e lei faatali atu i latou i lana pule.
14Ua latou tu‘inanau lava i le vao, ua latou tofotofo foi i le Atua i le vao.
15Ona foaiina atu ai lea e ia ia i latou o le mea na latou manao ai; a ua faatupuina le tinovale ia te i latou.
16Ua matataua foi i latou ia Mose i le toagalauapi, ma Arona le tagata paia o Ieova.
17Ua faamaga le eleele, ona foloina ai lea o Tatano, ua ufitia ai e na faapotopoto ia Apiramo.
18Ua mu foi le afi i lo latou faapotopotoga, ua susunuina i le afi mumū o e na amio leaga.
19Ua faia e i latou le tamai povi i Horepa, ua latou ifo foi i le tupua uamea.
20Sa liliu e i latou lo latou mamalu i le faatusa o le povi na te ‘ai vao.
21Ua galo ia te i latou lo latou Faaola le Atua, o le na faia mea tetele i Aikupito;
22o vavega i le nuu o Hamo, ma mea e matautia i le sami Ulaula.
23Ona ia fetalai mai lea e faaumatia i latou e ia, ana le seanoa Mose na filifilia e ia, na tu i ona luma i le mea ua sofaia, ia liliueseina lona toasa ina ne‘i faaumatia i latou.
24Ua ‘ino‘ino foi i latou i le nuu matagofie; e lei talitonu i latou i lana afioga.
25A ua latou muimui i totonu o latou fale ie, e lei faalogo i latou i le siufofoga o Ieova.
26Ona ia sii ai lea o lona aao ia i latou, e fasi ai ia te i latou i le vao;
27ina ia fasi foi la latou fanau i nuu ese, ma faataapeape ia te i latou i nuu.
28Ua latou faatasi atu foi ia Paalapeoro, ma latou aai i taulaga i e ua oti.
29Sa latou faalili atu ia te ia i a latou mea na fai; ona oso mai lea ia i latou o le faamai.
30Ona tulai ai lea o Fineaso, ma na fai le faamasinoga; ona taofia ai lea o le faamai.
31Sa ta‘ua foi lea mea ia te ia e fai ma amiotonu i lea tupulaga ma lea tupulaga e faavavau.
32Ua faatupu foi e i latou lona toasa i le vai o Meripa, na leaga ai foi Mose ona o i latou.
33Auā na latou faaonoono i lona loto, i le ua soona tautala ona laugutu.
34E lei faaumatia e i latou o ia nuu na fetalai atu ai Ieova ia te i latou.
35A ua latou nofo fefiloi ma nuu ese, ona a‘oa‘oina ai lea o i latou i a latou amioga.
36Ua latou auauna foi i o latou tupua; ua fai foi ia mea ma mailei ia i latou.
37Ua latou fai foi o latou atalii ma o latou afafine ma taulaga i temoni;
38ma latou sasaa le toto o e le sala, o toto o latou atalii ma o latou afafine, e na latou fai ma taulaga i tupua o Kanana; ona leaga ai lea o le laueleele i le toto.
39Ona leaga ai lea o i latou i a latou lava amio, ua latou faitaaga foi i a latou mea na fai.
40Ona mumū ai lea o le toasa o Ieova i lona nuu, ua ia ‘ino‘ino foi i lona tofi.
41Ua na tuuina atu ai i latou i lima o nuu ese; ua pule foi ia i latou o e na ‘ino‘ino ia te i latou.
42Ua faasaua foi ia i latou o e na ita i ai, ua faatoilaloina foi i latou i o latou lima.
43Ua atu lasi ona laveai o ia ia te i latou, a o i latou ua latou faaonoono ia te ia i a latou pulega; na solia foi i latou ona o a latou amio leaga.
44A ua silasila mai o ia i lo latou puapuaga, ina ua faafofoga i lo latou alalaga.
45Ona ia manatua lea mo i latou o lana feagaiga, ma ua salamo e tusa ma lona alofa tele.
46Ua ia avatu foi ia i latou ia alofagia e i latou uma e na faatagataotauaina i latou.
47Ieova e, lo matou Atua, ia e faaola mai ia te i matou, ma e faapotopoto ia i matou ai nuu ese, ina ia vivii i lou suafa paia, ia mitamita foi i viiga ia te oe.
48Ia faafetaia Ieova, o le Atua o Isaraelu mai le vavau ma ia oo i le faavavau; ma ia faapea mai o le nuu uma lava, Amene. Ia outou vivii atu ia Ioa.