1Ia outou vivii atu ia Ioa. Ou te vivii atu ia Ieova ma le loto atoa i le saofaiga a e amiotonu, atoa ma le faapotopotoga.
2O mea ua faia e Ieova, o mea tetele lava ia, o loo sailia e i latou uma lava o e fiafia i ai.
3O mea e viia ma le matagofie o ana galuega ia, e tumau foi lana amiotonu e faavavau.
4Ua fai ma faamanatuga ona vavega; o loo alofa fua mai ma alofa mutimuti vale mai Ieova.
5Ua foaiina mai e ia le mea e ‘ai i e matatau ia te ia; e manatua e ia lana feagaiga e faavavau.
6Ua na faaali atu le mana o ana galuega i lona nuu, ina ua avatu ia i latou le tofi o nuu ese.
7O galuega a ona aao e moni ia ma le tonu; e faamaoni ana feau uma lava.
8E faatumauina ia mea e faavavau faavavau lava; ua faia i le faamaoni ma le tonu.
9Na ia avatu le togiola mo lona nuu; na poloai i lana feagaiga ia faavavau lava; e paia ma le matautia lona suafa.
10O le mata‘u ia Ieova, o le amataga lea o le poto; ua i ai le mafaufau lelei ia te i latou uma o e fai ia mea; e tumau lona viiga e faavavau lava.