1Vivii atu ia outou ia Ieova, auā e lelei o ia; auā e faavavau lava lona alofa.
2Ia faapea atu lava Isaraelu, e faavavau lava lona alofa.
3Ia faapea atu lava le aiga o Arona, e faavavau lava lona alofa.
4Ia faapea atu lava i latou o e matatau ia Ieova, e faavavau lava lona alofa.
5Na ou valaau atu ia Ioa i lo‘u puapuaga; na tali mai Ioa ia te au, ma na aumaia a‘u i le mea lautele.
6O loo ia te au Ieova; ou te le fefe; se a se mea e faia e tagata ia te au?
7O loo ia te au Ieova e faatasi ma i latou ua fesoasoani mai ia te au; a o a‘u nei, ou te iloa atu le taui o e ua ‘ino‘ino mai ia te au.
8O le faatuatua ia Ieova, e sili lea i le faalagolago i tagata.
9O le faatuatua ia Ieova, e sili lea i le faalagolago i alii.
10Ua siosio mai nuu ese uma ia te au; o le suafa o Ieova ou te faaumatia ai i latou.
11Ua latou siosio mai ia te au, ua siosio mai lava ia te au; o le suafa o Ieova ou te faaumatia ai i latou.
12Na latou siosio mai ia te au faapei o lagomeli; e tineia i latou pei o le afi laau talatala; o le suafa o Ieova ou te faaumatia ai i latou.
13Na e tulei tele mai ia te au, ina ia ou paū; a ua fesoasoani mai Ieova ia te au.
14O Ioa, o lo‘u malosi o ia ma la‘u pese, ua avea foi o ia mo‘u faaolataga.
15O leo o le alaga fiafia ma le olataga, o i ai ia i fale ie o e amiotonu. Ua se toa le aao taumatau o Ieova.
16Ua maualuga le aao taumatau o Ieova; ua se toa le aao taumatau o Ieova.
17Ou te le oti, ou te ola lava, ma ou ta‘uta‘u atu mea na faia e Ioa.
18Na matuā aoai mai Ioa ia te au; a ua na le tuuina a‘u i le oti.
19To mai ia ia te au o faitotoa o le amiotonu; ou te ulufale atu i ai, ma ou vivii atu ia Ioa.
20O le faitotoa lenei o Ieova, e ulu atu ai e ua amiotonu.
21Ou te vivii atu ia te oe; auā na e tali mai ia te au, ua avea foi oe mo‘u faaolataga.
22O le maa na lafoaiina e tufuga fai fale, ua fai lea ma maa tulimanu aupitoaluga.
23O le mea lea ua faia e Ieova; o le mea tatou te ofo ai pe a vaai i ai.
24O le aso lenei ua faia e Ieova; ia tatou olioli ma fiafia i ai.
25Ieova e, ou te aioi atu ia e faaola mai lava; ou te aioi atu, Ieova e, ia e faamanuia mai lava.
26Ia manuia le o maliu mai i le suafa o Ieova; matou te faamanuia atu ia te outou ai le fale o Ieova.
27O le Atua o Ieova lea, ua na faamalamalama mai ia te i tatou; ina noanoa ia i maea le taulaga, ia oo i nifo o le fata faitaulaga.
28O oe lava lo‘u Atua, ou te vivii atu ia te oe; o oe lava lo‘u Atua, ou te faaneenee atu ia te oe.
29Vivii atu ia outou ia Ieova, auā e lelei o ia; auā e faavavau lava lona alofa.