1Ieova e, ua ou valaau atu ia te oe, ia vave ona e afio mai ia te au; faafofoga mai i lo‘u leo pe a ou valaau atu ia te oe.
2Ia saunia la‘u tatalo e faapei o le mea manogi e mu i ou luma; o le sii i luga o o‘u lima ia pei o le taulaga e fai i le afiafi.
3Ieova e, ia e tuuina se leoleo i lo‘u nei gutu, ia e leoleo i le faitotoa o o‘u laugutu.
4Aua ne‘i liliueseina lo‘u loto i se mea leaga, ne‘i ou fai mea leaga ma le agasala faatasi ma tagata o e faia amio leaga; aua foi ne‘i ou ‘ai i a latou mea suamalie.
5Ia fasia mai a‘u e le tagata amiotonu, o le alofa lava lea; ia aoai mai foi o ia ia te au, o le suāuu i lo‘u ulu lea, e le ‘alo ai lo‘u ulu; auā e fai pea la‘u tatalo i lo latou puapuaga.
6E lafotuina o latou faamasino i mea gaoa, e faalogo mai foi i latou i a‘u upu; auā e mālie ia.
7Ua taapeape o matou ivi i le gutu o le tuugamau; e pei o laau ua vaevaea ma isiisia i le eleele.
8A e faasaga o‘u mata ia te oe, Le Alii e, Ieova; ou te faalagolago ia te oe, aua ne‘i sasaaina atu lo‘u ola.
9Ia e leoleo mai ia te au auā le mailei ua latou tuu mo a‘u, ma matāsele a e faia amio leaga.
10Ia pauu o e amio leaga i o latou lava upega, a ia ou saogalemu atu lava a‘u.