1E sili lava Ieova, e tatau foi ona matuā viia o ia i le aai a lo tatou Atua, o lona mauga paia.
2E matagofie le maualuga o le mauga o Siona, e fiafia ai le lalolagi uma, o i le itu i matu, le aai a le Tupu silisili.
3E iloa lava le Atua i ona maota, e fai o ia ma ‘olo maualuga.
4Auā faauta, na faapotopoto mai tupu; ua latou o atu faatasi.
5Na latou vaavaai mai, ona fememeai ai lea; ua atuatuvale i latou, ona latou vave sosola ese ai lea.
6Na maua lava i latou i lea mea i le gatete, o le tiga pei o le fafine a fanau mai.
7Ua e lepetia vaa Tasesa i le matagi mai sasae.
8E pei ona tatou faalogo atu ai, e faapea ona tatou iloa i le aai a Ieova o ‘au, o le aai a lo tatou Atua; e faatumauina ia e le Atua e oo i le favavau. Selā.
9Le Atua e, ua matou mafaufau i lou alofa i totonu o lou malumalu.
10Le Atua e, e pei o lou suafa, e faapea lou viiga ona oo i tulu‘iga o le lalolagi; ua tumu lou aao taumatau i le amiotonu.
11Ia fiafia le mauga o Siona, ia olioli tamafafine a Iuta, ona o au faamasinoga.
12Ina faataamilo ia i Siona, ma ia soo ai, ina faitau ia i ona ‘olo.
13Matuā mafaufau ia i lona aupa, ma mātau mai ona maota; ina ia outou talatala atu ai i le tupulaga atali.
14Auā o lenei Atua, o lo tatou Atua lava ia e faavavau faavavau lava; o ia lava na te ta‘ita‘iina i tatou e oo lava i le oti.