1Le Atua e, na e lafoaiina i matou, na e faataapeapeina i matou, na e toatamai; ia e toe liliu mai ia te i matou.
2Na e luluina le eleele, na e faamāvaevaeina; ia e fofoina ona gaugau; auā o loo lulu ia.
3Na e faailoa mai mea faigata i lou nuu; na e faainumia i matou i le uaina e tautevateva a‘i.
4Na e foaiina atu le tagavai mo e matatau ia te oe, e siitia i luga ona o le upu moni. Selā.
5Ina ia laveaiina au pele; ia e faaola mai i lou aao taumatau, ma ia e tali mai ia te au.
6Ua fetalai le Atua i lona malumalu; ou te fiafia lava a‘u, ou te tofitofia Sekema, o le vanu o Sukota ou te fuafuatia lea.
7O loo ia te au Kiliata, o loo ia te au foi Manase; e fai foi Efaraima ma malosi o lo‘u ulu;
8o la‘u faipule o Iuta lea; o Moapi o le ipu lea ou te mulumulu ai; ou te lafoina lo‘u seevae i Etoma; Filisitia e, ina alaga ia i lou manumalo ia te au.
9O ai se na te avea a‘u i le aai nofo ‘olo? O ai se na te ta‘ita‘iina a‘u i Etoma?
10E le o oe ea, le Atua e, sa e lafoaiina mai i matou, ma ua e le afio atu, le Atua e, faatasi ma la matou itu taua?
11Ia e fesoasoani mai ia te i matou i le puapuaga; auā e le aoga lava le olataga mai tagata.
12O le Atua lava e fai ai i matou ma toa; auā o ia na te solia e ua ita mai ia te i matou.