1Le Atua e, ia e faafofoga mai i la‘u tatalo; ia e leoleo mai i lo‘u ola ia le mata‘u i le ua ita mai.
2Ia e natia a‘u ai le taupulepulega a e amio leaga, ma le faanunununu o e fai amioletonu.
3Ua latou faamataina o latou laulaufaiva e pei o se pelu; ua latou lolou i aufana e fana mai a latou u, o upu ogo lava ia;
4ina ia latou fana lafitai i le ua amio sao; e faafuasei ona latou fana ia te ia, latou te le matatau lava.
5Ua latou fefaamalosiai i le mea leaga; ua latou filifili e natia ni matāsele; ua latou faapea ane, O ai se na te iloa i latou?
6Ua latou saili mea leaga; ua faapea ane, Ua uma ona tatou matuā sailiili lava; o latou mafaufau taitasi ma le loto ua suegata lava.
7A o le Atua, na te fanaina atu le u ia te i latou e faafuasei; e manunua ai i latou.
8E leaga i latou i o latou lava laulaufaiva; e taitasi ma sola ese lava o e vaavaai ia te i latou.
9E matatau tagata uma, latou te faaaliina atu foi le mea ua faia e le Atua; latou te mafaufau foi i lana galuega.
10E fiafia lē amiotonu ia Ieova, ma faalagolago ia te ia; ona mitamita ai lea o i latou uma ua loto sa‘o.