1Le lalolagi uma e, ia outou alalaga atu i le Atua.
2Ia outou pepese atu i lona suafa mamalu; ia mamalu ia te outou lona viiga.
3Ia outou fai atu i le Atua, E matuā matautia oe i au galuega. O lou malosi tele e faatagā vivii atu ai ia te oe o e ua ita ia te oe.
4E ifo atu lava ia te oe le lalolagi uma; latou te fai pesega ia te oe, latou te fai pesega i lou suafa. Selā.
5O mai ia, ia outou matamata i galuega a le Atua; e matautia ia i mea na na faia i le fanau a tagata.
6Na ia liua le sami ma laueleele matutu; na latou sopoia atu le vaitafe i o latou vae; na tatou fiafia ia te ia i lea mea.
7E pule ia e faavavau i lona lava malosi; ua matuā silasila atu ona fofoga i nuu ese; o e fouvale, aua ne‘i faamaualuga i latou. Selā.
8Le nuu e, ia outou faafetai atu i lo tatou Atua; ia lagona mai le leo o lona viiga.
9O le na tuuina mai le ola i totonu ia i tatou, na te le tuuna i tatou ia mapepeva ai o tatou vae.
10Auā na e suesueina i matou, le Atua e; na e tofotofoina i matou, e pei o le ario ona tofotofoina.
11Na e aumaia i matou i le upega; na e tuuina mai mea mamafa i o matou tua.
12Na e faatietie tagata i o matou ulu; na matou savavali i le afi ma le vai; a ua e ta‘ita‘iina mai i matou i le nuu lafulemu.
13Ou te alu atu i lou fale ma taulaga mu; ou te avatua ia te oe mea na ou tauto ai.
14O mea ia na ou fai atu ai i o‘u laugutu, na ou tautala atu ai i lo‘u gutu i lo‘u puapuaga.
15Ou te avatua ia te oe taulaga mu i mea pepeti, atoa ma mea manogi; ou te saunia mamoe poa, o povi poa, atoa ma ‘oti poa. Selā.
16Outou uma o e matatau i le Atua, o mai ia, ina faalogologo mai, ona ou ta‘u atu ai lea o mea na na faia mo lo‘u agaga.
17Na ou alaga atu ia te ia i lo‘u gutu, ua viia foi o ia e lo‘u laulaufaiva.
18Ana ou manatu i se amio leaga i lo‘u loto, po ua le faafofoga mai le Alii ia te au;
19a e peitai ua faafofogaina mai a‘u e le Atua; ua ia liliu mai i le leo o la‘u tatalo.
20Ia faafetaia le Atua, ua na le liliueseina la‘u tatalo, po o lona alofa ia te au.