1Solomone a nyalela Faro kgosi ya Egepeto, a tsaya morwadia Faro a mo lere mo motseng wa ga Dafite, ga tsamaya a wetsa go aga ntlo ya gagwe, le ntlo ya ga Jehofa, le lorako lwa Jerusalema mo tikologong.
2Fa e se go re batho ba ne ba tle ba ise ditlhabelo mo mafelong a a tlotlometseng ka go ne go se na ntlo e e agetsweng leina la ga Jehofa pele ga malatsi ao.
3Solomone a rata Jehofa, a sepela mo melaong ya ga Dafite rraagwe; fa e se go re, o ne a isa ditlhabelo a ba a fisa maswalo mo mafelong a a tlotlometseng.
4Kgosi ya ya kwa Gibeone go ya go isa ditlhabelo gone, gonne e ne e le gone felo fa go tlotlometseng mo gogolo; Solomone a isa ditshupelo tse di fisiwang di le sekete mo sebesong seo.
5Ya re mo Gibeone Jehofa a iponatsa kwa go Solomone mo torong go le bosigo; Modimo wa re: “Lopa se ke tlaa se go nayang.”
6Solomone a re: “O diretse motlhanka wa gago rre Dafite, ka bopelonomi jo bogolo ka fa o ne a sepela fa pele ga gago ka gone mo boammaaruring, le mo tshiamong, le mo thokgamong ya pelo nao; o mmoloketse bopelonomi jo bogolo jo, jwa go re o mo neile ngwana wa mosimane go dula mo setulong sa gagwe sa bogosi, jaaka go ntse gompieno.
7Jaana Jehofa Modimo wa me, o dirile motlhanka wa gago kgosi mo boemong jwa ga Dafite rre; ke ngwanyana fela; ga ke itse go tswa le go tsena.
8Motlhanka wa gago o mo gare ga tšhaba ya gago e o e itshenketseng, tšhaba e kgolo, e e sa kakeng ya kwalwa le fa e le go balwa ka bontsi.
9Ke gone naya motlhanka wa gago pelo e e tlhaloganyang gore a tle a atlhole tšhaba ya gago, gore ke farologanye molemo le bosula: gonne e mang yo o nonofileng go atlhola tšhaba e ya gago e kgolo e?”
10Puo eo ya kgatlha Jehofa, ka Solomone a lopile selo seo.
11Modimo wa mo raya wa re: “E re ka o lopile selo se, mme wa se ka wa itopela botshelo jo boleele; le gone wa se ka wa itopela khumo, le gone wa se ka wa lopa loso lwa baba ba gago; mme wa itopela tlhaloganyo go farologanya katlholo;
12bona, ke dirile jaaka lefoko la gago; bona, ke go neile pelo e e botlhale le e e tlhaloganyang; ga go ise go ko go nne ope yo o tshwanang nao pele ga gago, le kwa morago ga gago ga go ketla go tsoga ope yo o tshwanang nao.
13Le gone ke go neile se o se kang wa se lopa, e bong khumo le tlotlo, ga go ketla go dira le ope mo dikgosing yo o tlaa tshwanang nao ka malatsi otlhe a gago.
14Fa o sepela mo ditseleng tsa me, go nna o tshegetsa melao ya me le ditaolo tsa me, jaaka rraago Dafite a ne a sepela, foo ke tlaa lelefatsa malatsi a gago.”
15Solomone a kubuga, mme bonang, e ne e le toro; mme a tla mo Jerusalema, a ya a ema fa pele ga letlole la kgolagano ya ga Jehofa, a isa ditshupelo tse di fisiwang, a isa ditshupelo tsa kagiso, a direla batlhanka botlhe ba gagwe modiro.
16Foo ga tla basadi ba le babedi, ba e ne e le diaka, ba tla mo kgosing, ba ema fa pele ga yone.
17Mosadi yo mongwe a re: “Morena wa me, nna le mosadi yo, re agile mo ntlong e le nngwe fela; ka belega ngwana ke na nae mo ntlong.
18Ga dirala ya re ka letsatsi la boraro ke sena go belega, mosadi yo le ene a belega; mme re ne re le mmogo; re se na moeng ope mo ntlong, fa e se rona roo babedi fela mo ntlong.
19Mme ngwana wa mosadi yo a swa bosigo; ka mmaagwe a mo letse godimo.
20Ya re bosigogare a tsoga, a tsaya morwaake fa go nna, ka lelata la gago le robetse, a mmaya mo sehubeng sa gagwe, a baya ngwana wa gagwe yo o suleng mo sehubeng sa me.
21Ya re ka moso ke tsoga ke re ke naya ngwanake letsele, bona a bo a sule; mme ya re ke sena go mo sekaseka mo mosong, ya bo e se morwaake yo ke ne ke mmelege.”
22Mme mosadi yo mongwe a re: “Nnyaa, yo o tshedileng ke morwaake, yo o suleng ke morwao.” Mme yoo a re: “Nnyaa, yo o suleng ke morwao, yo o tshedileng ke morwaake.” Ba bua jaana fa pele ga kgosi.
23Foo kgosi ya re: “Yo mongwe a re: ‘Ene morwaake ke yo o tshedileng, morwao ke yo o suleng;’ yo mongwe a re: ‘Nnyaa; yo o suleng ke ene morwao, morwaake ke yo o tshedileng.’ ”
24Kgosi ya re: “Nteretseng tšhaka.” Mme ba lere tšhaka fa pele ga kgosi.
25Mme kgosi ya re: “Kgaoganyang ngwana yo o tshedileng fa gare, lo neye mongwe mofama le yo mongwe mofama.”
26Foo mosadi, yo ngwana yo o tshedileng e leng wa gagwe a bua le kgosi, ka pelo ya gagwe e tlaleletswe morwawe, a re: “Morena wa me, mo neye ngwana yo o tshedileng, o se ka wa ba wa mmolaya.” Mme yo mongwe a re: “Ga a ketla a nna wa me, le fa e le wa gago, mo kgaoganyeng.”
27Foo kgosi ya bua ya re: “Nayang mosadi yole ngwana yo o tshedileng, lo se ka lwa ba lwa mmolaya, ke ene mmaagwe.”
28Baiseraele botlhe ba utlwa ka ga katlholo e kgosi e e atlhotseng, mme ba boifa kgosi, gonne ba bona fa botlhale jwa Modimo bo le mo go yone, jwa go dira katlholo.