John 7:1-53 TSW1908 - Bible AI

¹Morago ga dilo tse Jesu a sala a ntse a tsamaya mo Galilea, gonne a gana go tsamaya mo Jutea, ka Bajuta ba senka go mmolaya.

²Jaana modiro wa Bajuta, e bong modiro wa Metlaagana, wa bo o le gaufi.

³Foo bomonnawe ba mo raya ba re: “Tloga mono, o ye kwa Jutea, gore barutwa ba gago le bone ba bone ditiro tsa gago tse o di dirang.

⁴Gonne ga go motho ope yo o dirang sengwe mo sephiring, mme ene ka esi a senka go itsiwe mo ponalong. Fa o dira dilo tse, iponaletse lefatshe.”

⁵Gonne le e leng bone bomonnawe ba ne ba sa dumele mo go ene.

⁶Jesu a ba raya a re: “Lobaka lwa me ga lo ise lo tle; mme lobaka lwa lona lo a bo lo ntse lo etleetsegile gale.

⁷Lefatshe ga le ka ke la ila lona; mme nna le a nkila, ka gobo ke supa ka ga lone, fa ditiro tsa lone di le bosula.

⁸A go ye lona kwa modirong; nna ke tlaa nama ke ise ke ye kwa modirong o, ka lobaka lwa me ga lo ise lo dirale.”

⁹Ya re a sena go bua dilo tse nabo, a nama a sa tlhotse mo Galilea.

¹⁰E rile bomonnawe ba sena go ya kwa modirong le ene a sala a ya, e seng mo ponalong, ya ne e kete ka go iphitlha.

¹¹Ke gone Bajuta ba mmatla mo modirong ba re: “O kae?”

¹²Ga nna ngongorego e kgolo mo matshutitshuting a batho ka ga gagwe; bangwe ba re: “Ke motho yo o molemo,” ba bangwe ba re: “Nnyaa, o timetsa batho.”

¹³Le fa go ntse jalo ga bo go se na motho ope yo o buang ka ga gagwe mo ponong, ka go boifa Bajuta.

¹⁴E rile jaana go setse go le fa gare ga modiro, Jesu a tlhatlogela kwa tempeleng, mme a ruta.

¹⁵Foo Bajuta ba gakgamala ba re: “Ana motho yo o itse jang dikwalo, ka a se ka a ithuta gope?”

¹⁶Jesu a ba fetola a re: “Thuto ya me, ga se ya me; ke ya yo o nthomileng.

¹⁷Fa motho le fa e le mang a rata go dira go rata ga gagwe, o tlaa itse ka ga thuto, gore a e tswa mo Modimong, kgotsa ke ipuisa fela.

¹⁸Yo o ipuisang fela, o senka go ikgalaletsa, mme yo o senkang go galaletsa yo o mo romileng, mme ke ene wa boammaaruri, ga go na tshiamololo epe mo go ene.

¹⁹A Moše ga a a lo naya molao, le fa go ntse jalo go bo go se ope wa lona yo o dirang molao? Lo senkelang go mpolaya?”

²⁰Batho ba bantsi ba mo fetola ba re: “O na le diabolo; e mang yo o senkang go go bolaya?”

²¹Jesu a ba fetola a re: “Ke dirile tiro nngwe, mme lwa gakgamala lotlhe.

²²Moše o lo neile bogwera ka ntlha ya gone mo – e se gore bo tswa mo go Moše, mme bo tswa mo go borara – mme lo tle lo rupise motho go le Sabata.

²³Mme fa motho a rupisiwa go le Sabata, gore molao wa ga Moše o se ka wa tlolwa; a lo bogale le nna, ka gobo motho ke mo fodiseditse ruri go le Sabata?

²⁴Se atlholeng ka fa ponong ya matlho, mme atlholang ka katlholo e e siameng.”

²⁵Ke gone bangwe ba Jerusalema ba re: “A ga se ene yo ba mo senkang go mmolaya?

²⁶Bonang, o bua mo ponong, mme ga ba mo reye sepe. A ruri balaodi ba a itse fa yo e le Keresete?

²⁷Le fa go ntse jalo monna yo re a mo itse kwa o tswang teng; mogang Keresete o tlang, go tlaa bo go sa itse ope kwa o tswang teng.”

²⁸Foo Jesu a buela godimo mo tempeleng, a ruta a re: “Go le nna lo a nkitse, le kwa ke tswang teng, lo a go itse; mme ga ke a itere, mme yo o nthomileng o ammaaruri, yo lo sa mo itseng.

²⁹Nna ke a mo itse; gonne ke tswa kwa go ene, mme o nthomile.”

³⁰Foo ba senka go mo tshwara; mme go se ka ga dira le ope yo o mo tsenyang diatla, ka lobaka lwa gagwe lo ne lo ise lo tle.

³¹Mme mo bontsing jwa batho ba le bantsi, ba mo dumela; ba re: “Mogang Keresete o tlang, a o tlaa dira ditshupo tse di fetang tse monna yo o di dirileng?”

³²Bafarisai ba utlwa jaaka batho ba bantsi ba sebetsanya dilo tse ka ga gagwe; mme ditlhogo tsa baperesiti le Bafarisai ba roma maotlana, gore ba ye go mo tshwara.

³³Foo Jesu a re: “Ke sa na le lona ka lobakanyana, mme ke tloga ke ya kwa go yo o ntlhomileng.

³⁴Lo tlaa mpatla, mme ga lo ketla lo mphitlhela; le kwa ke teng, ga lo ka ke lwa ya go fitlha teng.”

³⁵Foo Bajuta ba raana ba re: “Ana monna yo o tlaa ya kae kwa re se ketlang re mo fitlhela teng? A o tlaa ya kwa Phalading e e kwa Bagerikeng, a ya go ruta Bagerika?

³⁶Ana lefoko le ke eng, le o le buileng, a re: ‘Lo tlaa mpatla, mme ga lo ketla lo mphitlhela; le kwa ke teng, ga lo ka ke lwa ya go fitlha teng’?”

³⁷Jaana ya re ka letsatsi la bofelo, e bong letsatsi le legolo la modiro, Jesu a ema, a buela godimo a re: “Fa mongwe a nyorilwe, a a tle mo go nna, a nwe.

³⁸Yo o dumelang mo go nna, dinoka tsa metsi a a tshedileng di tlaa ela di tswa mo mpeng ya gagwe, jaaka dikwalo di buile.”

³⁹Golo mo, a go bua ka ga Mowa, o ba ba dumetseng mo go ene ba ne ba tlaa o amogela, gonne Mowa o ne o ise a abiwe, ka Jesu a ise a galalediwe.

⁴⁰Bangwe mo bontsing jwa batho ya re ba utlwa mafoko, a, ba re: “Ammaaruri, yo ke ene moperofeti.”

⁴¹Ba bangwe, ba re: “Yo ke Keresete.” Bangwe ba re: “Ao! A Keresete o tswa kwa Galilea?

⁴²A dikwalo ga di a re: Keresete o tswa mo losikeng lwa ga Dafite, le kwa Bethelehema, motsana o Dafite o neng a nna mo go one?”

⁴³Jalo ga tsoga kgaogano mo bontsing jwa batho ka ga gagwe.

⁴⁴Bangwe ba rata go mo tshwara; mme go se ka ga nna ope yo o mo tsenyang diatla.

⁴⁵Foo maotlana a boela kwa ditlhogong tsa baperesiti le kwa Bafarisaing; mme ba ba raya ba re: “Lo ne lo sa tleleng nae?”

⁴⁶Maotlana a ba fetola a re: “Ga go ise go ko go bue motho ope jaaka ene.”

⁴⁷Foo Bafarisai ba a fetola ba re: “A le lona lo timeditswe?

⁴⁸A bangwe ba balaodi, kgotsa ba Bafarisai, ba dumetse mo go ene?

⁴⁹Batho ba ba bantsi ba ba sa itseng molao, ba hutsegile.”

⁵⁰Nikotemo – e bong ene yo o ne a ile kwa go Jesu gale, e le mongwe wa bone – a ba raya a re:

⁵¹“A molao wa rona o tle o sekise motho o ise o utlwe mo go ene pele, mme o itse se o se dirang.”

⁵²Ba mo fetola ba re: “A le wena o wa Galilea? Botsisa, mme o bone fa go sa tswe moperofeti ope mo Galilea.”

⁵³Mme mongwe le mongwe a ya kwa ga gagwe.