1 BITA 2:1-25 TON1884 - Bible AI

¹1 Koe jiaki ae agakovi moe taeofa kotoabe: 4 koe tuuga a Kalaisi kuo tuu ai akinautolu. 11 Oku ne kole kiate kinautolu ke nau taofi mei he gaahi holi fakakakano, 13 ke nau talagofua ki he kau bule, 18 bea ne ako ke talagofua ae kau tamaioeiki ki ho nau gaahi eiki, 20 ke faa kataki ae mamahi oku tubu i he fai lelei, o faifaitaki ai kia Kalaisi. KOIA ke liaki ae fai kovi kotoabe, moe kākā kotoabe, moe malualoi, moe meheka, bea moe feleakoviaki kotoabe,

²Bea mou holi lahi, o hage koe fānau toki faele‘i, ki he hua huhu taekākā oe folofola, koeuhi ke mou tubu ai:

³He kuo mou kamata oku aloofa ae Eiki.

⁴Aia oku mou ha‘u ki ai, koe maka moui, kuo jiaki mooni e he kakai, ka kuo fili e he Otua, bea oku mahuiga,

⁵Ko kimoutolu foki, oku hage koe gaahi maka moui kuo laga hake, koe fale fakalaumalie, koe kau taulaeiki maonioni, ke o hake ae gaahi feilaulau fakalaumalie, oku aoga ki he Otua ia Jisu Kalaisi.

⁶Koia oku tuu ai foki ia i he tohi, Vakai, oku ou ai i Saione ae fugani maka tuliki, kuo fili, bea mahuiga: bea ko ia e tui kiate ia, e ikai ma ia.

⁷Koia, oku mahuiga ia kiate kimoutolu oku tui: ka kiate kinautolu oku taetui, koe maka nae liaki e he kau tufuga, koia ia kuo gaohi koe fugani maka oe tuliki,

⁸Bea koe maka tūkiaaga moe maka fakaita kiate kinautolu oku taetui ki he folofola, bea tukia: aia foki nae tuutuuni akinautolu ki ai.

⁹Ka koe kakai kuo fili akimoutolu, koe kau taulaeiki fakaeieiki, koe kakai maonioni, koe kakai kuo fakatau; koeuhi ke mou fakaha ae ulugaaga lelei o ia naa ne ui mai akimoutolu mei he bouli ki he ene māma lahi:

¹⁰Akimoutolu nae ikai ko ha kakai i mu‘a, ka ko eni koe kakai ae Otua: nae ikai ke ilo ae aloofa, ka ko eni kuo ilo ae aloofa.

¹¹Oku ou kole atu, e kaiga ofeina, ke mou hage koe kau muli moe aunofo, ke taofi akimoutolu mei he gaahi holi fakakakano, aia oku tau‘i ae laumalie;

¹²Bea fai ke lelei hoo mou moui i he ao oe kakai Jenitaile: koeuhi, i ha mea oku nau lauikovi ai akimoutolu o hage koe kau fai kovi, ke nau mamata ki hoo mou gaahi gaue lelei, bea fakamalo ai ki he Otua i he aho oe aahi.

¹³Fakavaivai akimoutolu ki he tuutuuni kotoabe ae tagata koeuhi koe Eiki: be ki he tu‘i, aia oku lahi taha be;

¹⁴Be ki he kau bule, akinautolu kuo ne fakanofo koeuhi ke tautea ae kau fai kovi, ka ke fakamalo kiate kinautolu oku fai lelei.

¹⁵He oku behe ae finagalo oe Otua, ke mou fakanoa‘i aki ae fai lelei ae faa launoa ae kakai vale:

¹⁶O tāu moe tauataina, kae oua naa ma‘u ae tauataina ke hage koe ufiufi oe agahala, ka mou hage koe kau tamaioeiki ae Otua.

¹⁷Fakaabaaba ki he kakai kotoabe. Ofa ki he kaiga lotu. Manavahe ki he Otua. Fakaabaaba ki he tu‘i.

¹⁸Ae kau tamaioeiki, mou fakavaivai ki hoo mou gaahi eiki i he manavahe kotoabe; ikai ki he agalelei moe agavaivai be, ka ki he agamalohi foki.

¹⁹He koe mea aoga eni, o kabau e kataki e ha taha ae mamahi moe tautea taetotonu, ko ene loto lelei ki he Otua.

²⁰He koeha hono lelei, oka tautea akimoutolu i hoo mou fai kovi, bea oku mou faa kataki ia? ka oka mou ka mamahiia i hoo mou fai lelei, bea faa kataki, oku lelei ia ki he Otua.

²¹He koe mea ia kuo uiui‘i akimoutolu ki ai: he nae mamahi a Kalaisi maa moutolu, bea kuo ne tuku mai ha faifaitakiaga kiate kimoutolu, ke mou tobuva‘e taha mo ia:

²²Aia nae ikai ke ne fai ha agahala, bea nae ikai ilo ha kākā i hono fofoga.

²³Aia nae ikai ke toe manuki i hono manukia ia; i he ene mamahi, nae ikai te ne fakamana; ka naa ne tuku ia kiate ia oku fakamāu maonioni:

²⁴Aia naa ne fua toko taha be i hono jino oona e tau gaahi hia ki he akau, koeuhi i he e tau tauataina mei he agahala, ke tau moui ki he maonioni: bea koe mea i hono gaahi ta kuo mou moui.

²⁵He naa mou tatau moe faga sibi alu hehe be; ka kuo mou foki mai eni ki he Tauhi moe Leohi o ho mou laumalie.