1 KOE GAAHI TU‘I 4:1-34 TON1884 - Bible AI

¹1 Koe houeiki o Solomone. 7 Ko ene kau matābule e toko hogofulu ma ua ke tokaga‘i ae meakai. 20 Koe nofo lelei moe lahi aubito o hono buleaga. 22 Koe meakai ki he aho e taha. 26 Koe toko lahi o ene kau tau nae heka ki he faga manu. 29 Koe boto a Solomone. KOIA nae bule ai ae tu‘i ko Solomone ki Isileli katoa.

²Bea koeni ia ae houeiki nae iate ia; ko Asali koe foha o Satoki koe taulaeiki.

³Mo Illolefi mo Ahia, koe ogo foha o Sisa, koe ogo tagata tohi; mo Jihosefate koe foha o Ahilute, koe tagata tohi mea ia.

⁴Bea ko Benaia koe foha o Jehoiata nae bule ki he kau tau: bea ko Satoki mo Abaiata koe ogo taulaeiki:

⁵Bea ko Asalia koe foha o Netane nae bule ia ki he kau matābule: bea ko Sabuti koe foha o Netane koe matābule lahi ia, bea koe kaiga ia oe tu‘i:

⁶Bea nae bule a Ahisali ki he kakai oe fale: bea nae bule a Atonilami koe foha o Abita ki he tukuhau.

⁷Bea nae ia Solomone ae kau matābule e toko hogofulu ma ua, nae bule‘i a Isileli katoa, ke tokonaki ae meakai ma ae tu‘i bea mo hono kau nofoaga; nae tokonaki i he ta‘u e he tagata taki taha i hono mahina.

⁸Bea ko ho nau higoa eni: Koe foha o Uli, mei he mouga o Ifalemi:

⁹Koe foha o Tekeli, i Makasi, bea i Sealibimi, mo Bete‐semesi, mo Eloni-bete‐hanani:

¹⁰Koe foha o Hesiti, i Aluboti; nae aana a Soko, bea moe fonua kotoabe o Hefeli:

¹¹Koe foha o Abinatabi, i he fonua kotoabe o Toa; koia ia nae ma‘u a Tafati koe ofefine o Solomone ko hono unoho:

¹²Ko Baana koe foha o Ahilute; nae oona a Tenaki, mo Mekito, mo Bete‐seani katoa, aia oku ofi ki Salitana ki lalo i Jesilili, mei Bete‐seani ki Ebelimihola, o a‘u ki he botu ki ko atu i Jokiniami.

¹³Koe foha o Keba, i Lemoti‐kiliati: nae oona ae gaahi kolo o Jaili koe foha o Manase, aia oku i Kiliati; nae oona foki ae fonua o Alikobo, aia oku i Besani, koe kolo lahi e tolugofulu kuo a‘i, bea mataba aki ae balasa:

¹⁴Ko Ahinatabi koe foha o Ito, nae aana a Mehanemi:

¹⁵Ko Ahimasi nae i Nafitali; nae ma‘u foki eia a Basimati koe ofefine o Solomone ko hono unoho:

¹⁶Ko Beana koe foha o Husai, nae i Aseli bea mo Aloti:

¹⁷Ko Jihosafate koe foha o Balua, nae i Isaka:

¹⁸Ko Simi koe foha o Ila, nae i Benijimani.

¹⁹Ko Keba koe foha o Uli, nae i he fonua o Kiliati, moe fonua o Sihoni koe tu‘i oe kakai Amoli, bea mo Oki koe tu‘i o Besani; bea koe matābule toko taha be ia i he fonua.

²⁰Bea nae fuu toko lahi a Juta mo Isileli, o hage koe oneone i he matātahi a ho nau toko lahi, i he kai, moe inu, bea moe fai fakafiefia.

²¹Bea nae bule a Solomone ki he buleaga kotoabe mei he vaitafe o a‘u atu ki he fonua oe kakai Filistia, bea o a‘u ki he gataaga o Ijibite: naa nau omi koloa, o tukuhau kia Solomone lolotoga ae aho kotoabe o ene moui.

²²Bea koe meakai a Solomone ki he aho be taha, koe fuaaga e tolugofulu oe mahoaa lelei, moe fuaaga e onogofulu oe mahoaa e taha,

²³Koe faga bulu jino e hogofulu, moe faga bulu e uofulu mei he botu mohukuia, moe faga sibi e teau, ka oku lau kehe ae faga haate moe faga anitelobe, moe faga tia, moe faga manu buna nae fafaga‘i ke gako.

²⁴He nae a‘u atu a ene bule ki he botu kotoabe i he kau vaitafe ki heni, mei Tifisa o a‘u atu ki Kesa, ki he gaahi tu‘i kotoabe i he kau vai ki heni oe vaitafe: bea nae melino be ia i he botu fulibe nae takatakai iate ia.

²⁵Bea nae nofo taemanavahe a Juta mo Isileli, taki taha ae tagata i hono lalo vaine moe lolo fiki oona, mei Tani o a‘u ki Beasiba, i he aho kotoabe o Solomone.

²⁶Bea nae ma‘u e Solomone ae botu tuuaga e fa mano ki he faga hose o ene gaahi jaliote, bea moe kau heka hose e toko taha mano ma toko ua afe.

²⁷Bea nae tokonaki e he kau matābule koia ae meakai ma ae tu‘i ko Solomone, bea maa nautolu kotoabe nae ha‘u ki he keinagaaga a Solomone, koe tagata taki taha i hono mahina: nae ikai te nau majiva i ha mea.

²⁸Naa nau omi foki, e he tagata taki taha o hage ko ene gaue aana, ae baale moe kau‘i koane ma ae faga hose moe faga manu veevave, ki he botu nae i ai ae kau matābule.

²⁹Bea nae foaki e he Otua kia Solomone ae boto lahi aubito moe loto faa fakakaukau, moe loto fuu lahi, o hage koe oneone aia oku i he matātahi.

³⁰Bea nae lahi hake ae boto a Solomone i he boto ae kakai kotoabe oe fonua fakahahake, moe boto kotoabe o Ijibite.

³¹He nae boto lahi hake ia i he kakai kotoabe; o lahi hake ia Etani koe tagata Esalai, mo Hemani, mo Kalikoli, mo Talita, koe gaahi foha o Maholi: bea nae a‘u atu a ene ogoogolelei ki he gaahi buleaga kotoabe nae tuu takatakai ai.

³²Bea naa ne lea aki ae lea fakatātā e tolu afe: bea nae taha afe ma nima a ene hiva.

³³Bea naa ne fakamatala ae gaahi akau, mei he akau koe sita oku i Lebanoni o a‘u hifo ki he isobe oku tubu mai mei he fuga oe a: naa ne lea foki ki he gaahi faga manu, moe faga manu buna, moe mea oku totolo, bea moe gaahi ika.

³⁴Bea nae ha‘u ae niihi mei he kakai kotoabe ke fanogo ki he boto a Solomone, mei he gaahi tu‘i kotoabe o mamani, aia nae fanogo ki he ene boto.