1 SAMUELA 13:1-23 TON1884 - Bible AI

¹1 Koe kau tau a Saula. 3 Oku ne ui ae kau Hebelu ki Kilikali ke tau‘i ae kau Filisitia, nae teia e nau kolo tau e Jonatane. 5 Koe fuu tau lahi ae kau Filisitia. 6 Koe mamahi ae kakai Isileli. 8 Oku fiu a Saula i he tatali kia Samuela, bea fai eia ae feilaulau. 11 Oku valoki ia e Samuela. 17 Koe vahega tau e tolu oe kau Filisitia. 19 Koe filio‘i ae kau Filisitia ke oua naa ai ha tufuga i Isileli. NAE bule a Saula i he ta‘u e taha; bea hili ene bule i he ta‘u e ua ki Isileli,

²Nae fili e Saula ene kau tagata e toko tolu afe mei Isileli: nae ia Saula i Mikimasi, bea i he mouga ko Beteli ae toko ua afe, bea nae ia Jonatane i Kibea o Benijimani ae toko taha afe: bea ko hono toe oe kakai naa ne fekau ke alu ae tagata taki taha ki hono fale fehikitaki.

³Bea nae ta‘i e Jonatane ae kolo tau ae kakai Filisitia aia nae i Kibea, bea nae fanogo ki ai ae kakai Filisitia. Bea nae ifi mealea e Saula i he botu fonua kotoabe, o ne behe, Ke ogo‘i e he kakai Hebelu.

⁴Bea nae fanogo a Isileli kotoabe ki he lea, kuo ta‘i e Saula ha kolo tau ae kakai Filisitia, bea kuo fehianekina aubito a Isileli i he ao oe kakai Filisitia. Bea nae fekau ke fakataha ae kakai kia Saula i Kilikali.

⁵Bea nae katoa fakataha ae kakai Filisitia ke tau‘i a Isileli, yaahi saliote e tolu mano, moe kau tag ata heka hose e toko ono afe, bea koe kakai nae hage koe oneone i he matātahi ho nau toko lahi: bea naa nau alu hake o nofo i Mikimasi, i he botu hoboaga laa mei Bete‐aveni.

⁶Bea i he vakai ae kau tagata Isileli kuo akilotoa akinautolu, (he nae mamahi ae kakai,) nae fakatoitoi akinautolu e he kakai i he gaahi ana, moe gaahi vaofihi, bea i he gaahi maka, moe botu maoluga, bea i he gaahi luo.

⁷Bea nae alu ae kau Hebelu niihi ki he kau vai e taha o Joatani ki he fonua o Kata mo Kiliati, ka ko Saula nae kei i Kilikali ia, bea nae muimui tetetete be ae kakai kiate ia.

⁸Bea nae tatali ia i he aho e fitu o fakatatau ki he aho nae kotofa e Samuela: ka nae ikai ha‘u a Samuela ki Kilikali; bea nae movetevete ae kakai iate ia.

⁹Bea nae behe e Saula, Omi ki heni kiate au ae feilaulau tutu. moe feilaulau fakalelei. Bea naa ne atu ae feilaulau tutu.

¹⁰Bea nae hoko o behe, hili leva ene fakaoji ene atu ae feilaulau tutu, vakai, kuo hoko mai a Samuela; bea nae alu atu a Saula ke fakafetaulaki kiate ia, ke na feiloaki.

¹¹Bea nae behe e Samuela, Koeha ia kuo ke fai? Bea behe e Saula, Koe mea i he eku vakai kuo movete ae kakai meiate au, bea nae ikai te ke hoko mai i he gaahi aho nae kotofa, bea kuo katoa fakataha ae kau Filisitia ki Mikimasi:

¹²Koia naaku behe ai, Ko eni e hoko hifo kiate au ae kau Filisitia ki Kilikali, ka oku heeki ai teu fai ae hu kia Jihova: koia neu kataki ai au o atu ae feilaulau tutu.

¹³Bea behe e Samuela kia Saula, Kuo ke fai vale: kuo ikai te ke tauhi ae fekau a Jihova ko ho Otua, aia naa ne fekau kiate koe: ka ne behe, kuo fokotuu mau e Jihova ho buleaga ki Isileli o taegata.

¹⁴Ka koeni e ikai tuu mau ho buleaga: kuo fili e Jihova ha tagata maana o hage ko hono loto oona, bea kuo fekau e Jihova kiate ia ke eiki ia ki hono kakai, koeuhi nae ikai te ke tauhi aia nae fekau e Jihova kiate koe.

¹⁵Bea nae tuu hake a Samuela, o alu mei Kilikali ki Kibea o Benijimani. Bea nae lau e Saula ae kakai nae iate ia, koe toko onogeau nai.

¹⁶Bea ko Saula mo hono foha ko Jonatane, bea moe kakai nae iate kinaua, naa nau nofo i Kibea o Benijimani: ka nae abitaga ae kakai Filisitia i Mikimasi.

¹⁷Bea nae ha‘u ae vahe e tolu oe kau maumau mei he nofoaga tau oe kau Filisitia: nae alu ae kau tau e taha ki he hala ki Ofila, ki he fonua ko Suali:

¹⁸Bea nae afe ae kau tau e taha ki he hala ki Bete‐holoni: bea alu ae kau tau e taha ki he hala oe vee fonua oku haga atu ki he telea o Siboimi o haga atu ki he toafa.

¹⁹Bea koeni, nae ikai ilo‘i ha tufuga tuki ukamea i he fonua kotoabe o Isileli: he ne behe e he kau Filisitia, Telia naa tuki e he kau Hebelu ae gaahi heleta moe tao maa nautolu.

²⁰Ka nae alu hifo ki he kau Filisitia ae kakai Isileli kotoabe, ke fakamata taki taha ae tagata hono huotoho, mo ene hele, mo hono toki, mo ene huo keli.

²¹Ka naa nau ma‘u ae kili fakamata ki he huo keli, bea ki he hele, moe gaahi huhu, bea moe gaahi toki, bea ke fakamata ae mea kini.

²²Bea nae hoko o behe, i he aho oe tau, nae ikai iloa ha heleta be ha tao i he nima o ha toko taha i he kakai nae ia Saula mo Jonatane: ka ko Saula mo hono foha ko Jonatane, nae ilo ai ia.

²³Bea nae hiki kitua ae abitaga oe kau Filisitia ke alu ki he botu aluaga ki Mikimasi.