1 SAMUELA 19:1-24 TON1884 - Bible AI

¹1 Oku fakaha e Jonatane ae loto o ene tamai ke tamate‘i a Tevita. 4 Oku ne fakaloto‘i ene tamai ke fakalelei. 8 Koe mea i he fai tabuekina a Tevita i he tau foou, oku toe tubu ai ae fakafajifaji a Saula kiate ia. 12 Oku kākā‘i e Mikale ene tamai aki ae mea fakatātā i he mohega o Tevita. 18 Oku hoko a Tevita kia Samuela i Naoti. 20 Koe kau tagata nae fekau e Saula ke buke a Tevita. 22 Oku malaga foki a Saula. BEA nae lea a Saula kia Jonatane ko hono foha, bea ki he ene kau tamaioeiki kotoabe, koeuhi ke nau tamate‘i a Tevita.

²Ka nae loto lelei lahi a Jonatane koe foha o Saula kia Tevita: bea nae fakaha e Jonatane kia Tevita, o behe, Oku fai e Saula ko eku tamai ke ne tamate‘i koe: bea koeni, oku ou kole kiate koe, ke ke vakai kiate koe ke oua ke bogibogi, bea nofo i ha botu lilo, o toitoi‘i koe:

³Bea teu alu o tuu ofi ki he eku tamai i he goue aia oku ke i ai, bea te ma alea mo eku tamai kiate koe; bea koia teu mamata ki ai, teu tala kiate koe.

⁴Bea nae lea lelei a Jonatane ki he ene tamai ko Saula, kia Tevita, o ne behe, Ke oua naa fai ha kovi e he tu‘i ki he ene tamaioeiki ko Tevita; koeuhi kuo ikai te ne fai agahala kiate koe, bea koeuhi ko ene gaahi gaue kuo lelei aubito kiate koe:

⁵He naa ne ai ene moui ki hono nima, bea ne tamate‘i ae tagata Filisitia, bea nae fai e Jihova ae fakamoui lahi ma a Isileli: naa ke vakai‘i ia: bea ne ke fiefia ai: bea koeha ai te ke fai agahala ai ki he toto agatonu, ke tamate‘i a Tevita tae hano tuuga?

⁶Bea nae tokaga a Saula ki he le‘o o Jonatane: bea fuakava a Saula, I he moui a Jihova e ikai tamate‘i ia.

⁷Bea nae ui e Jonatane a Tevita, bea fakaha e Jonatane kiate ia ae gaahi mea ni. Bea nae omi e Jonatane a Tevita kia Saula, bea nae i hono ao ia o hage ko ene i ai i mua.

⁸Bea nae toe hoko ae tau: bea alu ai a Tevita o tau‘i ae kakai Filisitia, bea ne ta‘i akinautolu i he tamate‘i lahi; bea naa nau hola meiate ia.

⁹Bea nae ia Saula ae laumalie kovi mei a Jihova, i he ene nofo i hono fale moe tao i hono nima: bea nae ta ene mea e Tevita aki hono nima.

¹⁰Bea nae feiga a Saula ke ne velo‘i a Tevita ki he holiji aki ae tao; ka nae kalo malie a Tevita, bea velo o tau ae tao ki he holiji: bea nae hola a Tevita o hao mei hono ao i he bo koia.

¹¹Bea nae fekau e Saula ae kau tagata fekau ki he fale o Tevita, ke lamaji ia, bea ke nau tamate‘i ia i he bogibogi: bea nae fala e Mikale koe unoho o Tevita kiate ia, o behe, Kabau e ikai te ke fakahaofi hoo moui he bo ni, e tamate‘i koe abogibogi.

¹²Koia nae tukutuku hifo ai e Mikale a Tevita mei he mataba jioata: bea nae alu ia, bea hola o hao.

¹³Bea nae too e Mikale ae mea fakatātā o tuku ia ki he mohega, bea ne ai ae oluga koe fulufulu‘i koji ke oluga aki, o ne ufiufi aki ia ae kafu.

¹⁴Bea i he fekau a Saula ae kau talafekau ke buke a Tevita, nae behe eia, Oku mahaki ia.

¹⁵Bea nae toe fekau e Saula ae kau talafekau ke nau mamata kia Tevita, o behe, Mou omi ia kiate au i hono mohega, koeuhi keu tamate‘i ia.

¹⁶Bea i he hu ki loto ae kau tagata talafekau, vakai, nae i he mohega ae mea fakatātā moe oluga kuo gaohi aki ae fulufulu‘i koji.

¹⁷Bea nae behe e Saula kia Mikale, Koeha kuo ke kākā behe ai au, mo ke fekau ki hoku fili ke alu, bea kuo ne hao? Bea behe e Mikale kia Saula, Nae behe mai eia, Tuku keu alu; he koeha teu tamate‘i ai koe?

¹⁸Koia nae hola bea hao a Tevita, o ne alu kia Samuela ki Lama, o ne tala kiate ia aia kotoabe kuo fai e Saula kiate ia. Bea naa na o mo Samuela o nofo i Naoti.

¹⁹Bea nae tala kia Saula, o behe, Vakai, oku i Naoti a Tevita i Lama.

²⁰Bea nae fekau e Saula ae kau tagata ke buke a Tevita: bea i he e nau mamata ki he kau balofita oku malaga, kae tuu a Samuela aia ko ho nau tauhi, nae hoko ae laumalie oe Otua ki he kau tagata fekau a Saula, bea malaga foki mo kinautolu.

²¹Bea i he fakaha ia kia Saula, naa ne fekau atu ae kau tagata kehe, bea nae malaga akinautolu foki. Bea nae ave e Saula ae kau tagata fekau ho hono liuga tolu, bea naa nau malaga foki.

²²Bea nae toki alu ia foki ki Lama bea hoko atu ki he fuu luo vai aia oku i Sikiu: bea nae fehui eia o behe, Oku ife a Samuela mo Tevita? Bea behe e he toko taha, Vakai, oku na i Naoti i Lama.

²³Bea ne alu ki ai ki Naoti i Lama: bea hoko kiate ia foki ae Laumalie oe Otua, bea nae alu be ia, o malaga, o feouga mo ene hoko ki Naoti i Lama.

²⁴Bea naa ne too foki hono gaahi kofu, o malaga behe be i he ao o Samuela, bea nae tokoto hifo tae kofu ia i he aho kotoa ko ia moe bo kotoa ko ia. Koe tubuga ia oe behe, He kuo kau a Saula foki moe kau balofita?