1 SAMUELA 21:1-15 TON1884 - Bible AI

¹1 Oku ma‘u e Tevita i Nobi ae ma tabu mei a Ahimeleki. 7 Nae i ai a Toeki. 8 Oku ave e Tevita ae heleta a Kolaiate. 10 Koe fievale loi a Tevita i Kati. NAE toki hoko ai a Tevita ki Nobi o ne alu kia Ahimeleki koe taulaeiki: bea manavahe a Ahimeleki i he fetaulaki mo Tevita, o ne behe kiate ia, Koeha oku ke toko taha ai, bea ikai ha tagata iate koe?

²Bea behe e Tevita kia Ahimeleki koe taulaeiki; Kuo tuku mai e he tu‘i ha gaue kiate au, o ne behe kiate au, Ke oua naa ilo e ha tagata e toko taha ae gaue koia aia oku ou fekau‘i ai koe, mo ia kuou fekau kiate koe: bea kuou fekau‘i eku kau tamaioeiki ki he gaahi botu koena.

³Bea koeni, koeha oku i ho lalo nima? tuku mai ki hoku nima ha foi ma e nima, be ha mea be oku ke ma‘u.

⁴Bea talaage e he taulaeiki kia Tevita, o behe, Oku ikai ha ma gofua i hoku nima, ka oku i ai ae ma tabu; o kabau be kuo taofi akinautolu e he kau talavou mei he kau fefine.

⁵Bea nae leaage a Tevita ki he taulaeiki, o ne behe kiate ia, Koe mooni kuo taofi ae kau fefine meiate kinautolu i he aho nai e tolu, talu eku ha‘u kituaa, bea oku maonioni ae gaahi ibu ae kau talavou, bea oku hage oku gofua ae ma, io, he kuo fakatabu‘i he aho ni ae ma i he aiaga.

⁶Koia nae atu ai kiate ia e he taulaeiki ae ma tabu: he nae ikai i ai ha ma, ka koe ma be oe ao, aia nae too mei he ao o Jihova, ke ai ki ai ae ma mafana i he aho aia nae too o ave ai ia.

⁷Bea nae i ai i he aho koia ae tagata e toko taha i he kau tamaioeiki a Saula, nae moua ia i he ao o Jihova; ko Toeki hono higoa, koe tagata Itomi, koe tuu kimua ia oe kau tauhi manu lalahi a Saula.

⁸Bea behe e Tevita kia Ahimeleki, Bea oku ikai i ho nima ni ha tao be ha heleta? he oku ikai teu omi eku heleta be ko eku mahafu tau, he koe gaue ae tu‘i nae fai fakatootoo.

⁹Bea behe e he taulaeiki, Koe heleta a Kolaiate koe tagata Filisitia, aia naa ke tamate‘i i he telea o Ila, Vakai oku tuku takai ae kofu i he tua efoti: kabau ko ho loto ke ave ia, ave ia: he oku ikai ha taha kehe ka koia be i heni. Bea nae behe e Tevita, Oku ikai hano tatau mo ia; tuku mai ia.

¹⁰Bea nae tuu hake a Tevita i he aho koia, o hola i he ene manavahe kia Saula, bea alu ia kia Akisi koe tu‘i o Kati.

¹¹Bea behe e he kau tamaioeiki a Akisi kiate ia, Ikai ko Tevita eni koe tu‘i oe fonua? ikai naa nau hiva fetaliaki kiate ia i he gaahi mee, o behe, Kuo tamate‘i e Saula ene gaahi toko afe, mo Tevita ene gaahi toko mano?

¹²Bea nae fao e Tevita ae gaahi lea ni ki hono loto, bea nae manavahe lahi ia kia Akisi koe tu‘i o Kati.

¹³Bea naa ne fakakehe ene aga i ho nau ao o ne fai o hage kuo vale ia ho nau nima, bea ne ne vaku ki he mataba oe huaga fale, bea naa ne tuku ke tafe hono favai ki hono fakabau.

¹⁴Bea nae behe e Akisi ki he ene kau tamaioeiki, Vakai, oku mou mamata oku fakavalevale ae tagata; bea koeha ia kuo mou omi ai ia kiate au?

¹⁵He oku aoga kiate au ha kau tagata fakavalevale, kuo mou omi ai ae jiana ni ke fai fakavalevale i hoku ao? e hoko koa ae jiana ni ki hoku fale?