1 TESALONIKA 5:1-28 TON1884 - Bible AI

¹1 Oku ne kei fai ae fakamatala oe haele mai a Kalaisi ki he fakamāu, 16 bea ne fokotuu ae gaahi akonaki, 28 bea ne fakaoji aki ia ae tohi. KA koe mea i he gaahi kuoga moe gaahi faahita‘u, oku ikai aoga, e kaiga, keu tohi kiate kimoutolu.

²He oku mou ilo fakababau, koe aho oe Eiki oku ha‘u o hage koe kaihaa i he bouli.

³He oka nau ka behe, Fiemalie mo lelei be; e hoko fakafokifa ae faka-auha kiate kinautolu, o hage koe lagā ki ha fefine feitama; bea e ikai te nau hao.

⁴Ka ko kimoutolu, e kaiga, oku ikai te mou i he bouli, koeuhi ke moua akimoutolu e he aho koia o hage ha kaihaa.

⁵Koe fānau ae māma akimoutolu kotoabe, moe fānau ae aho: oku ikai oe bo akitautolu, be oe bouli.

⁶Koia ke oua naa mohe akitautolu, o hage koe niihi; ka tau leo bea tau fakabotoboto.

⁷He ko kinautolu oku mone, oku mohe i he bo; bea ko kinautolu oku kona, oku kona i he bo.

⁸Ka ke fakabotoboto akitautolu oku oe aho, o ai ki he fatafata ae jifa koe tui moe ofa; bea tau tatā aki ae amanaki lelei ki he fakamoui.

⁹He nae ikai tuutuuni akitautolu e he Otua ki he houhau, ka ke tau ma‘u ae fakamoui i ho tau Eiki ko Jisu Kalaisi.

¹⁰Aia nae bekia koeuhi ko kitautolu, koeuhi, ka tau ka a be mohe, ke tau moui fakataha mo ia.

¹¹Koia ke mou fefakafiemalieaki akimoutolu, o felagaaki hake akimoutolu, o hage foki koia oku mou fai.

¹²Bea oku mau kole kiate kimoutolu, e kaiga, ke mou ilo akinautolu oku gaue iate kimoutolu, bea oku nau bule‘i akimoutolu i he Eiki, bea valoki‘i akimoutolu;

¹³Bea ke mou tokaga lahi aubito kiate kinautolu i he ofa koeuhi koe nau gaue. Bea ke mou nonofo feofoofani be.

¹⁴Bea koeni, oku mau eginaki kiate kimoutolu, e kaiga, valoki‘i akinautolu oku fakamaveuveu, fakafiemalie ki he kau loto foi, boubou ae vaivai, ke mou faa kataki‘i kotoabe.

¹⁵Vakai ke oua naa ai ha taha oku totogi ae kovi aki ae kovi ki ha taha; ka mou tulituli mau ai be ki he mea oku lelei, iate kimoutolu, bea ki he kakai kotoabe.

¹⁶Fiefia mau ai be.

¹⁷Lotu taetuku.

¹⁸Fakafetai i he mea kotoabe: he koe finagalo ia oe Otua ia Kalaisi Jisu kiate kimoutolu.

¹⁹Oua naa fuifui ae Laumalie.

²⁰Oua naa taetokaga ki he gaahi malaga.

²¹Ahiahi‘i ae gaahi mea kotoabe; buke ke mau aia oku lelei.

²²Taofi akimoutolu mei he matamata kovi kotoabe.

²³Bea ofa ke fakamaonioni haohaoa akimoutolu e he Otua oe melino: bea ofa ke fakatologa taehalaia akimoutolu a ho mou laumalie kotoa, mo ho mou loto, mo ho mou jino, o a‘u ki he haele mai a ho tau Eiki ko Jisu Kalaisi.

²⁴Oku mooni aia oku ne uiui‘i akimoutolu; bea te ne mafai foki ia.

²⁵E kaiga, hufia akimautolu.

²⁶Ofa atu ki he kaiga kotoabe aki ae uma maonioni.

²⁷Oku ou fekau fakababau kiate kimoutolu i he Eiki, ke lau atu ae tohi ni ki he kaiga maonioni kotoabe.

²⁸Ke iate kimoutolu ae aloofa a ho tau Eiki ko Jisu Kalaisi. Emeni.