2 JONE 1:1-13 TON1884 - Bible AI

¹1 Oku ne eginaki ae fine eiki e taha, mo ene fānau, ke fakakukafi i he ofa moe tui fakalotu, 8 telia naa mole iate kinautolu ae totogi oe nau tomua gaue lelei: 10 bea ke oua naa kau ki he kau fakahala koia, oku ikai ke nau alu moe akonaki mooni ia Jisu Kalaisi. KOE motua ki he fine eiki kuo fili mo ene fānau, oku ou ofa mooni ki ai; bea oku ikai ko au be, ka ko kinautolu kotoabe foki kuo ilo‘i ae mooni;

²Koeuhi be koe mooni, aia oku nofoia akitautolu, bea e iate kitautolu ia o taegata:

³Ke iate kimoutolu ae aloofa, moe ofa mataataatā be, moe melino, mei he Otua koe Tamai, bea mei he Eiki ko Jisu Kalaisi, koe Alo oe Tamai, i he mooni moe ofa.

⁴Neu fiefia lahi i he eku ilo‘i ae niihi i hoo fānau oku aeva i he mooni, o hage koe fekau naa tau ma‘u mei he Tamai.

⁵Bea koeni, oku ou kole atu kiate koe, e fine eiki, kae ikai hage ko haaku tohi ha fekau foou kiate koe, ka koia kuo tau ma‘u mei he kamataaga, ke tau feofaaki kiate kitautolu.

⁶Bea koe ofa eni, koeuhi ke tau aeva i he ene gaahi fekau. Ko eni ae fekau, Koeuhi, ke hage koia kuo mou fanogo ki ai mei he kamataaga, ke mou aeva i ai.

⁷He kuo alu atu ae kau kākā toko lahi ki mamani, oku ikai ke nau fakaha kuo ha‘u i he jino a Jisu Kalaisi. Koe kākā eni moe fili o Kalaisi.

⁸Vakai be kiate kimoutolu, ke oua naa mole iate kitautolu ae gaahi mea kuo tau lava‘i, ka koeuhi ke tau ma‘u ae totogi haohaoa.

⁹Ko ia ia oku fai hala, bea ikai nofo mau i he akonaki a Kalaisi, oku ikai ma‘u eia ae Otua. Ko ia ia oku nofo i he akonaki a Kalaisi, oku ma‘u eia fakatouoji ae Tamai bea moe Alo.

¹⁰Kabau e alu atu ha taha kiate kimoutolu, kae ikai omi ae akonaki ko eni, oua naa tali ia ki ho mou fale, bea oua naa tokoni ki ai:

¹¹He ko ia oku tokoni ki ai oku kau ia i he ene gaahi gaue kovi.

¹²Kuo lahi ae mea keu tohi atu kiate kimoutolu, ka e ikai teu fai ia i he beiba moe vaitohi: ka oku ou amanaki keu alu atu kiate kimoutolu, bea tau alea o femamataaki, koeuhi ke fonu e tau fiefia.

¹³Koe fānau a ho tokoua kuo fili, oku nau ofa kiate koe. Emeni.