2 SAMUELA 10:1-19 TON1884 - Bible AI

¹1 Oku gaohi kovi‘i ae kau talafekau a Tevita nae alu ke fekafiemalie‘i a Hanuni koe foha o Naasi. 6 Oku ikuna ae kakai Amoni e Joabe bea mo Abisai. 15 Koe toe omi e Sobaki ae kau tau mei Silia ki Elami, bea oku tamate‘i ia e Tevita. BEA hili eni nae hoko o behe, nae bekia ae tu‘i oe fānau a Amoni, bea nae hoko moia i he bule a hono foha ko Hanuni.

²Bea nae behe ai e Tevita, Teu fakaha ae ofa kia Hanuni koe foha o Naasi, koeuhi koe fakaha ae ofa kiate au e he ene tamai. Bea nae fekau atu e Tevita a ene kau tamaioeiki ke nau fakafiemaiie‘i ia koeuhi ko ene tamai. Bea nae ha‘u ai ae kau tamaioeiki a Tevita ki he fonua oe fānau a Amoni.

³Bea nae behe e he houeiki oe fānau o Hanuni ko ho nau eiki, Oku ke mahalo, kuo fai fakaabaaba a Tevita ki hoo tamai, i he ene fekau mai ae kau fakafiemalie kiate koe? Ikai kuo fekau mai e Tevita a ene kau tamaioeiki kiate koe, koeuhi ke nau hakule ae kolo, bea mamata ki ai, bea ke nau lava‘i ia?

⁴Koia nae buke e Hanuni ae kau tamaioeiki a Tevita, mo ne tele fakabotu taha a ho nau fakabau, mo ne tuuji fakavaeua a ho nau gaahi kofu vala, o fai mei he tuugaiku, mo ne toki fekau ke nau alu.

⁵Bea i he e nau hoko o fakaha ia kia Tevita, naa ne fekau atu ha niihi ke fakafetaulaki atu kiate kinautolu, he naa nau ma lahi aubito: bea nae behe e he tu‘i, Mou tatali i Jeliko kae oua ke toe tubu a ho mou kava, bea mou toki ha‘u.

⁶Bea i he vakai e he fānau a Amoni kuo nau namukū i he ao o Tevita, nae fekau atu e he fānau a Amoni, mo nau totogi ki he kakai Silia nae nofo i Bete‐lehobi, moe kakai Silia i Soba, koe kau tagata haele e toko ua mano, bea mei he tu‘i ko Meaka ae kau tagata e toko taha afe, bea moe kau tagata e toko taha mano moe toko ua afe mei a Isitobi.

⁷Bea i he ene fanogo ki ai a Tevita, naa ne fekau atu a Joabe, bea mo ene kau tagata tau kotoabe.

⁸Bea nae hu mai kitua ae fānau a Amoni, bea naa nau fakanofo ae tau i he huaga oe matani kolo: ka nae tuu kehe fakataha i he ataatā ae kakai Silia o Soba, bea mo Lehobi, bea mo Isitobi, bea mo Meaka.

⁹Bea i he ene mamata e Joabe kuo fakanofo mai ae tau mei mua bea mei mui, naa ne fili mai ae kau to‘a kotoabe o Isileli nae ogoogoa, mo ne tuku akinautolu ke tau‘i ae kakai Silia:

¹⁰Bea ko hono toe oe kakai naa ne tuku ki he nima o hono tokoua ko Abisai, koeuhi ke ne tau‘i aki akinautolu ae fānau a Amoni.

¹¹Bea naa ne behe, Kabau e malohi fau ae kakai Silia kiate au, te ke toki tokoni mai ekoe: bea kabau e malohi fau kiate koe ae fānau a Amoni, teu toki hau au o tokoni kiate koe.

¹²Mou loto to‘a, bea ke tau fai o galigali tagata koeuhi ko ho tau kakai, bea moe gaahi kolo o ho tau Otua: bea ke fai e Jihova aia oku lelei kiate ia.

¹³Bea nae unuunu atu a Joabe, bea moe kakai nae iate ia, ke nau tau‘i ae kakai Silia: bea naa nau hola mei hono ao.

¹⁴Bea i he jio ae fānau a Amoni oku hola ae kakai Silia, naa nau toki hola foki mei he ao o Abisai, o nau hu ki he kolo. Koia nae foki mai a Joabe mei he fānau a Amoni, o ne ha‘u ki Jelusalema.

¹⁵Bea i he vakai e he kakai Silia kuo teia akinautolu i he ao o Isileli, naa nau tanaki fakataha akinautolu.

¹⁶Bea nae fekau atu e Hetatesa, o ne omi ae kakai Silia nae nofo i he tua vaitafe: bea naa nau ha‘u ki Elami; bea nae tataki akinautolu e Sobaki koe eiki bule ki he kau tau a Hetatesa.

¹⁷Bea i hono fakaha eni kia Tevita, naa ne tanaki fakataha a Isileli katoa, bea naa nau aa atu i Joatani, o nau hoko atu ki Elami. Bea nae teuteu‘i ae tau ae kakai Silia kia Tevita, bea naa nau tau mo ia.

¹⁸Bea nae feholaki ae kakai Silia mei he ao o Tevita: bea nae tamate‘i e Tevita ae kau tagata nae heka i he gaahi jaliote e fitugeau oe kakai Silia, bea moe kau heka hose e toko fa mano, bea naa ne ta‘i a Sobaki koe eiki bule oe nau kau tau, aia nae mate i ai.

¹⁹Bea i he jio ae haa tu‘i kotoabe nae toka kia Hetatesa, kuo teia akinautolu i he ao o Isileli, naa nau alea ke nau melino mo Isileli, bea naa nau toka mai kiate kinautolu. Koai nae manavahe ai ae kakai Silia ke toe tokoni ki he fānau a Amoni.