E MATIU 18:1-35 TON1884 - Bible AI

¹1 Oku nainai e Kalaisi ene kau akoga ke nau agavaivai mo taehala: 7 ke nau vakai telia ae gaahi fakahala, bea oua naa nau taetokaga ki he jii: 15 oku ne fakaha aia oku totonu ke fai ki ho tau kaiga oku fai hala kiate kitautolu: 21 mo hono liuga laki oe tau fakamolemolea akinautolu: 23 oku ne fakaha ia i he fakatātā ki he tu‘i naa ne fakamau‘i ene kau tamaioeiki: 32 o ne tautea ia nae ikai te ne fai ofa ki he ene kauga gaue. BEA i he aho koia nae ha‘u ai ae kau akoga kia Jisu, o nau behe, Kohai oku lahi i he buleaga oe lagi?

²Bea ui e Jisu ha tamajii jii ke aluage kiate ia, o ne tuku ia ki ho nau haohaoga,

³O ne behe, Oku ou tala mooni atu kiate kimoutolu, Kabau e ikai liliu akimoutolu, ke tatau moe tamaiki iki, e ikai te mou hu ki he buleaga oe lagi.

⁴Ko ia ia te ne fakavaivai‘i ia o hage koe tamajii jii ni, ko ia be oku lahi i he buleaga oe lagi.

⁵Bea ko ia te ne ma‘u ha tamajii jii behe i hoku higoa, oku ne ma‘u au.

⁶Ka ko ia te ne fakahala‘i ha toko taha iate kinautolu ni oku jii oku tui kiate au, e lelei hake kiate ia o ka ne taubuga‘i aki ia ae maka momoji i hono kia, bea lomaki‘i ia i he loto moana.

⁷E malaia a mamani koeuhi koe gaahi fakahala! he kuo bau e hoko ae gaahi fakahala; kae malaia ae tagata koia e hoko ai ae fakahala!

⁸Koia, kabau oku fakahala‘i koe e ho nima be ko ho va‘e, tutuu ia, o liaki ia iate koe: oku lelei kiate koe hao hu ki he moui oku ke ketu be nima mutu, i hoo mau ae nima e ua moe va‘e e ua, kae li koe ki he afi taegata.

⁹Bea kabau oku fakahala‘i koe e ho mata, kabe‘i ia, o liaki iate koe: oku lelei kiate koe hao hu ki he moui oku ke mata taha, i hoo ma‘u ae mata e ua, kae li koe ki he afi o heli.

¹⁰Vakai ke oua naa mou manuki‘i ha toko taha iate kinautolu ni oku jii; he oku ou tala atu kiate kimoutolu, Oku mamata mau ai be i he lagi ha nau agelo ki he fofoga o eku Tamai aia oku i he lagi.

¹¹Bea kuo hoko mai ae Foha oe tagata ke fakamoui aia nae he.

¹²Koeha ho mou loto? kabau oku ma‘u e ha tagata ae sibi e teau, bea alu he be ha nau taha, ikai oku ne tuku ae hivagofulu ma hiva, bea alu ki he gaahi mouga, o kumi aia kuo he?

¹³Bea kabau te ne ilo ia, ko eku tala mooni atu kiate kimoutolu, oku lahi ene fiefia i he sibi koia, i he hivagofulu ma hiva nae ikai alu he.

¹⁴Bea behe, oku ikai koe finagalo o hoo mou Tamai oku i he lagi, ke malaia ha toko taha iate kinautolu ni oku jii.

¹⁵Koia, kabau e fai agahala kiate koe e ho kaiga, alu o fakaha ene kovi kiate ia, akoe be mo ia: kabau e tokaga ia kiate koe, kuo ke fakalelei mo he kaiga.

¹⁶Bea kabau e ikai te ne tokaga kiate koe, bea ke toki ave ha toko taha be ha toko ua kehe, koeuhi e fakababau ae lea kotoabe mei he gutu oe fakamooni e toko au be toko tolu.

¹⁷Bea kabau e taetokaga ia kiate kinautolu, fakaha ia ki he jiaji: bea kabau e taetokaga ia ki he jiaji, tuku ke tatau ia kiate koe moe tagata hiteni moe tanaki tukuhau.

¹⁸Ko eku tala mooni atu kiate kimoutolu, Koe mea koia te mou nonoo i mamani, e nonoo ia i he lagi: bea koe mea koia te mou veteki i mamani, e veteki ia i he lagi.

¹⁹Bea oku ou tala atu foki kiate kimoutolu, Kabau e loto taha ha mou toko ua i mamani i ha mea e taha te na kole, e fai ia kiate kinaua e he eku Tamai oku i he lagi.

²⁰He koe botu koia oku fakataha ai ae toko ua be ae toko tolu i hoku huafa, teu i ai au mo kinautolu.

²¹Bea nae toki ha‘u ai a Bita kiate ia, o ne behe, Eiki, e liuga fiha ae agahala a hoku tokoua kiate au mo eku fakamolemole ia? ke liuga fitu?

²²Bea behe e Jisu kiate ia, Oku ikai teu behe kiate koe, Ke liuga fitu be: kae liuga fitugofulu lau e fitu.

²³Koia oku fakatatau ai ae buleaga oe lagi ki ha tu‘i, nae loto ke fakamāu‘i ene kau tamaioeiki.

²⁴Bea kamata fai eia ae fakamāu, bea omi kiate ia ae toko taha nae totonu ke ne totogi ki he tu‘i ae taleneti e mano.

²⁵Ka koe mea i he ikai haa ne mea ke totogi aki, nae fekau e he ene eiki ke fakatau ia, mo hono unoho, mo ene fānau, mo ia kotoabe nae aana, o totogi aki.

²⁶Bea fakatomabee ae tamaioeiki, o hu kiate ia, o ne behe, Eiki, ke ke faa kataki kiate au, bea teu totogi kotoabe kiate koe.

²⁷Bea toki manavaofa ae eiki ki he tamaioeiki koia, o ne tukuage ia, o ne fakamolemole kiate ia ae totogi.

²⁸Ka nae alu ae tamaioeiki koia, o ne ilo ae toko taha o ene kauga tamaioeiki, nae totonu ke totogi aki kiate ia ae tenali e teau: bea ne buke eia ia, o kuku hono kia, o behe, Totogi mai kiate au aia oku aaku.

²⁹Bea fakatomabee a ene kauga tamaioeiki ki hono va‘e, o ne kole kiate ia, o behe, Ke ke faa kataki kiate au, bea teu totogi kotoabe kiate koe.

³⁰Ka nae ikai te ne fai; ka nae alu ia, o tuku ia ki he fale fakabobula, kae oua ke ne totogi aia nae totonu.

³¹Ka i he mamata a ene kauga tamaioeiki ki he mea kuo fai, naa nau mamahi lahi, bea alu o fakaha ki ho nau eiki aia kotoabe kuo fai.

³²Bea ui ia e he ene eiki, o ne behe kiate ia, Ae tamaioeiki agakovi ko koe, neu fakamolemolea koe i he totogi kotoabe koia, koe mea i hoo kole kiate au:

³³Bea ikai nae tāu mo koe hoo manavaofa foki ki ho kauga tamaioeiki, o hage ko eku manavaofa kiate koe?

³⁴Bea ita ai ene eiki, o ne tuku atu ia ki he kau fakamamahi, kae oua ke ne totogi aia kotoabe nae totonu.

³⁵E fai behe foki e he eku Tamai i he lagi kiate kimoutolu, o kabau e ikai te mou taki taha fakamolemolea mei hono loto ae gaahi agahala o hono kaiga.