EKESOTOSI 24:1-18 TON1884 - Bible AI

¹1 Oku fekau ke alu hake a Mosese ki he mouga. 3 Oku lea ae kakai te nau talagofua. 4 Oku fokotuu e Mosese ae feilaulauaga moe maka e hogofulu. 6 Oku ne luluku ae toto oe fuakava. 9 Oku fakaha ae nāunāu oe Otua. 14 Oku leohi ae kakai, e Elone mo Hua. 15 Koe alu a Mosese ki he mouga, bea nofo ai i he aho e fagofulu moe be e fagofulu. BEA behe eia kia Mosese, Alu hake koe kia Jihova, akoe mo Elone, mo Natabi, mo Abiu, moe kau mātua o Isileli e toko fitugofulu; bea bunou hifo akimoutolu mei he mamao o hu.

²Bea ko Mosese toko taha be e ha‘u o ofi kia Jihova: kae oua te nau ha‘u o ofi; bea oua naa alu hake ae kakai mo ia.

³Bea nae ha‘u a Mosese o ne tala ki he kakai ae gaahi folofola kotoabe a Jihova, moe gaahi fono kotoabe; bea tali lea taha be ae kakai kotoabe, o nau behe, Koe gaahi lea kotoabe kuo folofola aki e Jihova te mau fai.

⁴Bea nae tohi e Mosese ae gaahi folofola kotoabe a Jihova, bea tuu hegihegi hake ia i he bogibogi, o ne laga ae feilaulauaga i he lalo mouga, moe maka e hogofulu ma ua, o fakatatau ki he faahiga e hogofulu ma ua o Isileli.

⁵Bea fekau eia ae kau talavou i he fānau a Isileli, bea naa nau atu ae gaahi feilaulaututu kia Jihova, moe gaahi feilaulau oe melino, koe faga bulu.

⁶Bea nae too e Mosese hono vaeua malieaga oe toto, o ne ligi ia ki he gaahi ibu; bea ko hono vahe e taha oe toto naa ne luluku aki ae feilaulauaga.

⁷Bea too eia ae tohi oe fuakava, o ne lau ia ke ogo‘i e he kakai: bea naa nau tala, Koe mea kotoabe kuo folofola ki ai a Jihova te mau fai, bea te mau talagofua.

⁸Bea nae too e Mosese ae toto, o ne luluku ia ki he kakai, o ne behe, Vakai, koe toto oe fuakava, aia kuo fai e Jihova mo kimoutolu i he gaahi folofola ni kotoabe.

⁹Bea toki alu hake ai a Mosese, mo Elone, mo Natabi, mo Abiu, moe kau mātua o Isileli e toko fitugofulu.

¹⁰Bea naa nau mamata ki he Otua o Isileli; bea nae i hono lalo va‘e ae gaue o hage ha faliki maka koe safaia, bea nae tatau moe lagi maa a hono malama.

¹¹Bea nae ikai hili hono nima ki he kau mātua oe fānau a Isileli; bea naa nau mamata ki he Otua foki, o nau kai mo inu.

¹²Bea nae folofola a Jihova kia Mosese, Alu hake koe kiate au i he mouga, bea nofo ai: bea teu tuku kiate koe ae maka lafalafa e ua, bea moe fono, moe gaahi fekau kuou tohi; koeuhi ke ke ako aki ia.

¹³Bea nae tuu hake a Mosese mo hono tauhi ko Josiua: bea nae alu hake a Mosese ki he mouga oe Otua.

¹⁴Bea nae tala eia ki he kau mātua. Mou tatali i heni kiate kimaua, ke oua ke ma toe omi kiate kimoutolu: bea vakai, oku iate kimoutolu a Elone, mo Hua: kabau e ai ha mea i ha tagata ke fai, ke ha‘u ia kiate kinaua.

¹⁵Bea nae alu hake a Mosese ki he mouga, bea nae uufi ae mouga e he ao.

¹⁶Bea nae nofo mai ae nāunāu o Jihova ki he mouga ko Sainai, bea nae uufi ia e he ao i he aho e ono: bea nae folofola ia kia Mosese i hono fitu oe aho mei he loto ao.

¹⁷Bea nae ha mai ae nāunāu o Jihova o hage koe afi fakaauha i he tumutumu oe mouga, i he ao oe fānau a Isileli.

¹⁸Bea nae alu a Mosese ki he loto ao, o alu hake ki he mouga: bea nae i he mouga a Mosese i he aho e fagofulu moe bo e fagofulu.