EKESOTOSI 33:1-23 TON1884 - Bible AI

¹1 Oku fakaha ae tae alu a Jihova o hage ko ene fakailo. 4 Oku lāuga ai ae kakai. 7 Oku hiki ae fakatahaaga kituaa i he abitaga. 9 Oku alea lelei a Jihova mo Mosese. 12 Oku holi a Mosese ke mamata ki he nāunāu oe Otua. BEA nae folofola a Jihova kia Mosese, Alu, bea hiki i heni, akoe moe kakai aia kuo ke omi mei he fonua ko Ijibite, ki he fonua aia naaku fuakava ai kia Ebalahame, mo Aisake, bea kia Jekobe, o behe, Teu foaki ia ki ho hako:

²Bea teu fekau ha agelo ke muomua iate koe: bea teu kabuji ae kakai Kenani, moe kau Amoli, moe kau Heti, moe kau Belesi, koe kau Hevi, bea moe kau Jebusi:

³Mou alu ki he fonua mahu tafea i he hua huhu moe honi: ka e ikai teu alu hake i ho mou lotolotoga; he koe kakai kia kekeva koe: telia naaku fakaauha koe i he hala.

⁴Bea i he fanogo ae kakai ki he ogoogokovi ni, naa nau tagi: bea nae ikai ai e ha tagata haa ne teuga.

⁵He nae behe e Jihova kia Mosese, Tala ki he fānau a Isileli, Koe kakai kia kekeva akimoutolu: Teu alu atu ki loto iate koe i he kemo be taha, o fakaauha koe; koia ke ke tukuage ai ae gaahi teuga iate koe, kae oua keu ilo ai ha mea ke fai kiate koe.

⁶Bea nae vete e he fānau a Isileli e nau gaahi teuga iate kinautolu i he mouga ko Holebi.

⁷Bea nae hiki e Mosese ae fale fehikitaki, o fokotuu ia ituaa mei he abitaga, o mamao atu mei he abitaga, o ne ui ia koe Fale fehikitaki oe kakai. Bea nae behe, koia kotoabe nae kumi kia Jihova nae alu ia kituaa ki he fale fehikitaki oe kakai, aia nae ituaa mei he abitaga.

⁸Bea nae behe, i he alu kituaa a Mosese ki he fale fehikitaki, nae tuu hake leva ae kakai kotoabe, o tuu ae tagata taki taha i he mataba o hono fale fehikitaki, ke jio atu kia Mosese, ke oua ke hu ia ki he fale fehikitaki.

⁹Bea i he hu a Mosese ki he fale fehikitaki, nae alu hifo ae bou ao, bea tuu ia i he mataba oe fale fehikitaki, bea alea a Jihova mo Mosese.

¹⁰Bea nae mamata e he kakai kotoabe ki he bou ao oku tuu i he mataba oe fale fehikitaki: bea nae tuu hake ae kakai kotoabe o hu, o taki taha ae tagata i he mataba o hono fale fehikitaki.

¹¹Bea nae folofola a Jihova kia Mosese, koe mata ki he mata, o hage koe lea ae tagata ki hono kaiga. Bea nae liu mai ia ki he abitaga; he ko hono tauhi, a Josiua koe foha o Nuni, koe tagata talavou, nae ikai alu ia mei he fale fehikitaki.

¹²Bea nae behe e Mosese kia Jihova, Vakai, oku ke behe mai kiate au, Ke ke o hake ae kakai ni: bea oku ikai te ke fakaha kiate au, be kohai ia te ke fekau ke ma o mo au. Ka kuo ke tala mai, Oku ou ilo koe i ho higoa, bea kuo ofeina koe i hoku ao.

¹³Bea koeni, oku ou kole kiate koe, kabau kuou ma‘u ae ofa i ho ao, ke ke fakaha ni kiate au ho hala, koeuhi keu ilo koe, bea teu ilo ai ae ofa i ho ao: bea ke ano‘i koe buleaga ni ko ho kakai.

¹⁴Bea behe eia, Teu alu mo koe, bea teu tuku kiate koe ae fiemalie.

¹⁵Bea behe eia kiate ia, Kabau e ikai alu a hoo afio mo au, oua naa ke fetuku hake akimautolu i heni.

¹⁶He koeuhi e ilo ni i he ha kuo ofeina au mo hoo kakai i ho ao? ikai i he mea ni, i hoo alu mo kimautolu? koia te mau mavae ai, a au mo hoo kakai, mei he kakai kotoabe oku i he fuga o mamani.

¹⁷Bea nae folofola a Jihova kia Mosese, Teu fai ae mea ni foki aia kuo ke lea ki ai: he kuo ke ma‘u ae ofa i hoku ao, bea oku ou ilo koe i ho higoa.

¹⁸Bea behe eia, Oku ou kole kiate koe, fakaha kiate au ho nāunāu.

¹⁹Bea naa ne behe, Teu fai ke ha atu eku agalelei kotoabe i ho ao, bea teu fakaha ae huafa o Jihova i ho ao; bea teu ofa mataatā be kiate ia oku ou loto ke ofa mataatā be ki ai, bea teu aloofa kiate ia oku ou loto ke aloofa ki ai.

²⁰Bea behe eia, Oku ikai te ke mafai ke mamata ki hoku fofoga: he oku ikai ha tagata te ne mamata kiate au, bea moui.

²¹Bea behe e Jihova, Vakai, oku ai ae botu oku ofi kiate au, bea te ke tuu koe ki he fuga maka:

²²Bea e hoko o behe, i he alu atu a hoku nāunāu, teu ai koe ki he mafahi oe maka, bea teu ufiufi koe aki hoku nima lolotoga eku alu atu:

²³Bea teu too hoku nima, bea te ke mamata ki hoku tua; ka ko hoku fofoga e ikai ha ia.