FAKAHA 1:1-20 TON1884 - Bible AI

¹4 Oku tohi e Jone ene tohi fakaha ki he jiaji e fitu i Esia, ko hono fakatātā koe tuuga māma koula e fitu. 7 Koe haele mai a Kalaisi. 14 Koe fakaha ene mafimafi mo hono nāunāu. KOE Fakaha a Jisu Kalaisi, aia nae foaki e he Otua kiate ia, ke fakailo ki he ene kau tamaioeiki ae gaahi mea oku totonu ke vave a ene hoko; bea ne fekau mo fakailo ia e he ene agelo ki he ene tamaioeiki ko Jone:

²Aia naa ne fakaha ae folofola ae Otua, bea moe fakamooni a Jisu Kalaisi, bea moe gaahi mea kotoabe naa ne mamata ai.

³Oku monuia ia oku ne lau, mo kinautolu oku fanogo, ki he gaahi lea oe kikite ni, mo fai ae gaahi mea oku tohi i ai: he oku ofi ae kuoga.

⁴KO AU JONE ki he jiaji e fitu oku i Esia: Ke iate kimoutolu ae aloofa, moe monuia, meiate ia oku i ai, bea nae i ai, bea mo ia e i ai; bea mei he Laumalie e Toko Fitu aia oku i hono mu‘a nofoa fakaeieiki;

⁵Bea mei a Jisu Kalaisi, koe Fakamooni agatonu, moe uluaki fakatubu mei he mate, moe Eiki oe gaahi tu‘i o mamani;

⁶Ke iate ia naa ne ofeina akitautolu, bea ne fufulu akitautolu mei he e tau gaahi agahala aki hono taataa oona, bea ne gaohi akitautolu koe gaahi tu‘i, moe kau taulaeiki ki he Otua mo ene Tamai; ke iate ia ae ogoogo lelei moe bule o taegata bea taegata. Emeni.

⁷Vakai, oku haele mai ia moe gaahi ao; bea e mamata kiate ia ae mata kotoabe, io, mo kinautolu naa nau hoka‘i ia: bea e tagi mamahi ae gaahi faahiga kotoabe o mamani koeuhi ko ia. Ke behe be, Emeni.

⁸Oku behe e he Eiki, Ko au koe Alifa moe Omeka, koe kamataaga moe gataaga, aia oku i ai, bea nae i ai, bea ko ia ia e i ai, koe Mafimafi.

⁹Ko au Jone, ko ho mou tokoua, moe kauga mea i he mamahi, bea moe buleaga moe faa kataki o Jisu Kalaisi, naaku i he motu oku ui ko Batimosi, koeuhi koe folofola ae Otua, bea koeuhi koe fakamooni o Jisu Kalaisi.

¹⁰Bea neu i he Laumalie i he aho oe Eiki, bea neu ogo‘i ae le‘o lahi mei hoku tua, o hage ko ha mea lea,

¹¹Oku behe mai, Ko au koe Alifa moe Omeka, koe uluaki moe ki mui: bea, Koia oku ke mamata ki ai, tohi i ha tohi, o ave ki he gaahi jiaji e fitu oku i Esia; ki Efeso, mo Simana, mo Beakamosi, mo Taiataila, mo Satisi, mo Filatelifia, mo Leotisia.

¹²Bea neu tafoki keu ilo ae le‘o nae lea kiate au. Bea i he eku tafoki, neu mamata ki he tuuga māma koula e fitu;

¹³Bea i he lotolotoga oe gaahi tuuga māma e fitu, koe toko taha o hage koe Foha oe tagata, kuo kofu aki ae kofu nae a‘u hifo ki he va‘e, bea nonoo ki hono fatafata aki ae noo koula.

¹⁴Ko hono ulu moe louulu nae hina o hage koe hinehina oe fulufulu‘i sibi, o hage koe uha hinehina; bea nae tatau hono fofoga moe ulo oe afi;

¹⁵Bea tatau hono va‘e moe balasa lelei, o hage ko ene kakaha i he hakaaga ukamea; bea ko hono le‘o, nae tatau moe uulu oe gaahi vai lahi.

¹⁶Bea nae i hono nima toomatau ae fetuu e fitu: bea nae alu atu i hono gutu ae heleta majila o fakatoumata: bea nae tatau hono fofoga moe laa i he ene ulo i hono malohi.

¹⁷Bea i he eku mamata kiate ia, neu to hifo i hono va‘e o hage ha mate. Bea naa ne ai kiate au hono nima toomatau, o ne behe mai kiate au, Oua e manavahe; ko au koe uluaki moe ki mui:

¹⁸Ko au ia oku moui, ka neu mate, bea vakai, oku ou moui o taegata bea taegata, Emeni; bea kuo iate au ae ki o hetesi moe mate.

¹⁹Tohi ae gaahi mea kuo ke mamata ai, moe gaahi mea oku i ai, bea moe gaahi mea e hoko a mui;

²⁰Koe fakatātā oe fetuu e fitu aia ne ke mamata i hoku nima toomatu, bea moe tuuga māma koula e fitu. Koe fetuu e fitu, koe kau agelo oe gaahi jiaji e fitu: bea koe tuuga māma e fitu aia ne ke mamata ai, koe gaahi jiaji ia e fitu.