FAKAHA 2:1-29 TON1884 - Bible AI

¹Koe fekau ke tohi ki he kau agelo, aia, koe kau faifekau oe gaahi jiaji, 1 ki Efeso, 8 ki Simana, 12 ki Beakamosi, 18 ki Taiataila: bea mo ia oku lelei, be kovi, iate kinautolu. TOHI ki he agelo oe jiaji o Efeso; Oku folofola aki ae gaahi mea ni eia oku ne kuku ae fetuu e fitu i hono nima toomatau, aia oku eveeva i he lotolotoga oe gaahi tuuga māma koula e fitu;

²Oku ou ilo‘i hoo gaahi gaue, mo hoo fai feiga, mo hoo faa kataki, bea mo hoo tae faa kataki‘i akinautolu oku kovi: bea kuo ke ahiahi‘i akinautolu oku nau behe, koe kau abosetolo akinautolu, ka oku ikai, bea kuo ke ilo koe kau loi akinautolu:

³Bea kuo ke faa ukuma, o faa kataki, bea koeuhi ko hoku higoa kuo ke gaue, o ikai te ke vaivai.

⁴Ka oku ai ae mea oku ou koviia ai kiate koe, koeuhi kuo ke mahui mei hoo uluaki ofa.

⁵Koia ke ke manatu‘i aia kuo ke higa mei ai, bea fakatomala, bea fai ae gaahi uluaki gaue; ka ikai, bea teu ha‘u tootoo kiate koe, o hiki hoo tuuga māma mei hono botu, o kabau e ikai te ke fakatomala.

⁶Ka oku ke ma‘u aeni, oku ke fehia ki he gaahi gaue oe kau Nikolaitani, aia oku ou fehia ki ai.

⁷Ko ia ia oku ai ae teliga, ke fakafanogo ia ki he folofola ae Laumalie ki he gaahi jiaji; Ko ia ia te ne ikuna, teu foaki ki ai ke kai mei he akau oe moui, aia oku i he lotolotoga oe Balataisi oe Otua.

⁸Tohi ki he agelo oe jiaji oe kakai Simana; Oku folofola aki ae gaahi mea ni e he uluaki moe ki mui, aia nae mate, ka kuo moui;

⁹Oku ou ilo‘i hoo gaahi gaue, mo hoo mamahi, mo hoo majiva, (ka oku ke koloaia) bea moe loi a nautolu oku behe, koe gaahi Jiu akinautolu, ka oku ikai, ka koe fale lotu o Setani.

¹⁰Oua naa ke manavahe ki ha mea i he gaahi mea koia te ke mamahi ai: vakai, e li e he tevolo a ho mou niihi ki he fale fakabobula, ko ho mou ahiahi‘i, bea te mou moua i he mamahi i he aho e hogofulu: ka ke fai agatonu be o a‘u ki he mate, bea teu foaki kiate koe ae bale oe moui.

¹¹Ko ia ia oku ai ae teliga, ke fakafanogo ia ki he folofola ae Laumalie ki he gaahi jiaji; Ko ia ia te ne ikuna, e ikai lavea ia e he mate agaua.

¹²Bea tohi ki he agelo oe jiaji o Beakamosi; Oku folofola aki ae gaahi mea ni eia oku iate ia ae heleta majila oku fakatoumata;

¹³Oku ou ilo‘i hoo gaahi gaue, moe botu oku ke nofo ai, aia oku i ai ae nofoaga o Setani: bea oku ke buke mau hoku higoa, bea nae ikai te ke jiaki eku lotu, io, naa moe gaahi aho o Anitibasa ko eku fakamooni agatonu, aia nae tamate‘i iate kimoutolu, koe botu oku nofo ai a Setani.

¹⁴Ka oku ai ae mea niihi oku ou koviia ai kiate koe, koeuhi oku iate koe akinautolu oku nau tui ki he akonaki a Belami, aia naa ne akonekina a Belaki ke li ae tūkiaaga i he ao oe gaahi foha o Isileli, ke nau kai ae gaahi mea kuo feilaulau aki ki he gaahi tamabua, bea ke fai ae feauaki.

¹⁵Bea behe oku iate koe foki akinautolu oku tui ki he akonaki oe kau Nikolaitani, aia oku ou fehia ki ai.

¹⁶Fakatomala; ka ikai, bea teu ha‘u tootoo kiate koe, bea teu tau‘i akinautolu aki ae heleta o hoku fofoga.

¹⁷Ko ia ia oku ai ae teliga, ke fakafanogo ia ki he folofola ae Laumalie ki he gaahi jiaji: Ko ia ia te ne ikuna, teu foaki ai ke ne kai ae mana fufu, bea teu atu ki ai moe foi maka hinehina, bea e tohi togi i he maka ae higoa foou, aia oku ikai ke ilo e ha taha ka ko ia be oku ne ma‘u ia.

¹⁸Bea tohi ki he agelo oe jiaji i Taiataila; Oku folofola aki ae gaahi mea ni e he Alo oe Otua, aia oku tatau moe ulo afi hono fofoga, mo hono va‘e o hage koe balasa gigila.

¹⁹Oku ou ilo‘i hoo gaahi gaue, moe ofa, moe tauhi, moe tui, mo hoo faa kataki; moe lahi hake o hoo gaahi gaue ki mui i he uluak i.

²⁰Ka oku ai ae mea niihi oku ou koviia ai kiate koe, koeuhi ko hoo tuku ai be ae fefine ko Jesebeli, aia oku ne ui ia koe balofita fefine, bea oku ne akonekina mo oloa eku kau tamaioeiki ke fai ae feauaki, bea ke kai ae gaahi mea kuo feilaulau aki ki he gaahi tamabua.

²¹Bea neu tuku kiate ia ae kuoga ke fakatomala ai i he ene feauaki; ka nae ikai fakatomala ia.

²²Vakai, teu li ia ki ha mohega, mo kinautolu oku fai feauaki mo ia, ki he mamahi lahi, o kabau e ikai te nau fakatomala i he e nau gaahi gaue.

²³Bea teu tamate‘i aki ae mate a ene fānau; bea e ilo ai e he gaahi jiaji kotoabe, ko au ia oku ou hakule ae gaahi holi moe loto: bea teu atu kiate kimoutolu taki taha o fakatatau ki hoo mou gaahi gaue.

²⁴Ka oku ou behe kiate kimoutolu, mo hono toe i Taiataila, akinautolu nae ikai ma‘u ae akonaki ni, bea nae ikai ke ilo ae gaahi mea loloto o Setani, o hage koe nau lau; E ikai teu ai mo ha kavega kehe kiate kimoutolu.

²⁵Ka koia oku mou ma‘u, kuku mau kae oua keu ha‘u.

²⁶Bea ko ia ia e ikuna, bea ne fai ki he eku gaahi gaue o a‘u ki he gataaga, ko ia ia teu foaki ki ai ae malohi ki he gaahi buleaga:

²⁷Bea te ne bule‘i akinautolu aki ae vaa ukamea; bea e lailai akinautolu o hage koe gaahi ibu oe tufuga gaohi ibu: o hage be koia neu ma‘u mei he eku Tamai.

²⁸Bea teu foaki kiate ia ae fetuu bogibogi.

²⁹Ko ia ia oku ai ae teliga, ke fakafanogo ia ki he folofola ae Laumalie ki he gaahi jiaji.