HEBELU 2:1-18 TON1884 - Bible AI

¹1 Oku totonu e tau talagofua kia Kalaisi Jisu, 5 bea koeuhi kuo ne to‘o kiate ia e tau aga, 14 he koe mea ia nae tonu ke ne fai. KOE mea ia oku totonu ke ajili ai e tau tokaga lahi ki he gaahi mea kuo tau fanogo ki ai, telia naa tau tukuage mei ai i ha aho.

²He kabau nae tuu mau ae lea nae lea aki e he kau agelo, bea koe maumau‘i moe talagataa kotoabe nae ma‘u hono totogi totonu;

³E hao fefe akitautolu, o kabau te tau taetokaga ki he fakamoui lahi koia? aia nae fuofua fakaha e he Eiki, bea nae fakamooni ia kiate kitautolu ekinautolu nae fanogo kiate ia;

⁴Nae fakamooni foki e he Otua, aki ae gaahi fakailoga, moe gaahi mea fakaofo, moe gaahi mana kehekehe, bea moe gaahi foaki oe Laumalie Maonioni, o fakatatau ki hono finagalo oona.

⁵He oku ikai te ne fakamoulaloa ki he kau agelo ae mama ka ha‘u, aia oku mau lea ki ai.

⁶Ka oku fakaha e ha toko taha i he botu e taha, o behe, Koeha ae tagata, oku ke tokaga‘i ia? be koe foha oe tagata, oku ke aahi ai kiate ia?

⁷Naa ke gaohi ia o māulalo jii i he kau agelo; ne ke fakabale aki ia ae nāunāu moe ogoogo lelei, o fakanofo ia ke bule‘i ae gaahi gaue a ho nima;

⁸Kuo ke fakamoulaloa ae mea kotoabe ki hono lalo va‘e. Bea i he ene fakamoulaloa ae mea kotoabe kiate ia, nae ikai fakatoe ha mea e tae ai ki lalo iate ia. Ka oku teeki ai ke tau mamata kuo fakamoulaloa ae mea kotoabe kiate ia.

⁹Ka oku tau mamata kia Jisu, kuo fakabale aki ia ae nāunāu moe ogoogo lelei, koeuhi koe kataki ae bekia, aia nae gaohi ke māulalo jii i he kau agelo, ke ne kamata eia ae bekia koeuhi koe kakai kotoabe, koe mea i he aloofa ae Otua.

¹⁰He nae tāu mo ia, aia oku maana ae mea kotoabe, bea oku mei ai ae mea kotoabe, i he omi ne foha toko lahi ki he nāunāu, ke fakahaohaoa i he gaahi mamahi ae Eiki oe nau moui.

¹¹He ko ia oku ne fakamaa, mo kinautolu kuo fakamaa, oku nau taha be kotoabe: koia oku ikai ai ke ma ia ke ui akinautolu koe kaiga,

¹²O behe, Teu fakaha ho huafa ki hoku kaiga, i he lotolotoga oe jiaji teu hiva fakafetai kiate koe.

¹³Mo toe behe, Teu falala kiate ia. Bea toe behe, Vakai ko au moe fānau kuo foaki e he Otua kiate au.

¹⁴Bea koe mea i he ma‘u e he fānau ae kakano moe toto, nae ai foki eia ae aga koia; koeuhi ke fakaauha eia i he mate aia nae aana ae malohi oe mate, koe tevolo;

¹⁵Mo fakamoui akinautolu nae moua o bobula i he manavahe ki he mate, i he e nau moui kotoabe.

¹⁶He koe mooni nae ikai buke eia ae kau agelo; ka naa ne buke eia ae hako o Ebalahame.

¹⁷Koia nae tau ai mo ia ke hoko o tatau mo hono kaiga i he mea kotoabe, koeuhi ke ne hoko koe fugani taulaeiki aloofa mo agatonu i he gaahi mea ae Otua, ke fai ae fakalelei koeuhi koe agahala ae kakai.

¹⁸He koe mea i he ene mamahi aana i hono ahiahi‘i, oku ne faa fai ke tokoni‘i akinautolu oku ahiahi‘i.