HEBELU 6:1-20 TON1884 - Bible AI

¹1 Oku ne eginaki ke oua naa higa mei he tui, 11 ka nau tuu mau, 12 bea fae gaue, mo faa fai ke tatali ki he Otua, 13 koeuhi oku mooni ae Otua i he ene talaofa. KOIA foki, ke tuku ki mui ae gaahi uluaki akonaki a Kalaisi, ka tau fai atu ki he haohaoa; ke oua naa toe ai ae tuuga oe fakatomala mei he gaahi gaue mate, bea moe tui ki he Otua,

²Ae akonaki oe gaahi babitaiso, moe hilifaki oe nima, moe toetuu oe mate, moe fakamāu taegata.

³Bea te tau fai eni, o kabau e lelei ki he Otua.

⁴He koeuhi e ikai aubito mafai kiate kinautolu nae muaki māmagia, mo nau kamata ae foaki mei oluga, bea nau ma‘u moe Laumalie Maonioni,

⁵Bea kuo nau kamata ae folofola lelei ae Otua, moe gaahi malohi oe mama e ha‘u,

⁶Bea kuo nau higa atu, e ikai mafai ke toe fakafoou akinautolu ki he fakatomala; he oku nau toe tutuki ki he akau ekinautolu be ae Alo oe Otua, o fai fakahāhā be a hono fakama‘i.

⁷He koe kelekele oku ne inumia ae uha oku faa to ki ai, bea tubu mei ai ae akau oku tāu mo kinautolu oku tauhi ia, oku tabuekina ia mei he Otua:

⁸Ka koia oku tubu mei ai ae akau talatala moe talatalaamoa, kuo jiaki, bea kuo ofi ki he malaia; ko hono gataaga o ia koe vela.

⁹Ka ko kimoutolu, e kaiga, ne ogo oku behe ni e mau lea, ka oku mau amanaki ki he gaahi mea lelei lahi iate kimoutolu, moe gaahi mea oku hoa moe fakamoui.

¹⁰He oku ikai taeagatonu ae Otua, ke ne fakagalo‘i hoo mou gaue moe feiga ofa, aia kuo mou fakaha ki hono huafa, i hoo mou tauhihi‘i ae kaiga maonioni, mo hoo mou gaue.

¹¹Bea ko ho mau loto, ke taki taha fakaha ekimoutolu ae faa fakakukafi koia ki he ilo bau oe amanaki lelei o a‘u ki he gataaga:

¹²Ke oua naa mou fakabikobiko, ka e faifaitaki kiate kinautolu kuo nau lava‘i i he tui moe faa kataki ae gaahi talaofa.

¹³He nae talaofa ae Otua kia Ebalahame, bea koeuhi kuo ikai ha taha e lahi hake ke ne fuakava ai, ne ne fuakava iate ia be,

¹⁴O behe, Koe mooni i he fakamonuia teu fakamonuia‘i koe, bea i he fakatokolahi teu fakatokolahi‘i koe.

¹⁵Bea kuo hili ene kataki fuoloa, ne ma‘u eia ae talaofa.

¹⁶He koe mooni oku fuakava ae kakai i he lahi hake: bea koe fuakava ke fakamooni aki, koe fakagata ia oe fakakikihi kotoabe kiate kinautolu.

¹⁷Bea i he mea ni, kuo finagalo ae Otua ke fakaha o lahi ki he kakai nae talaofa ki ai ae tae faa liliu o ene folofola, bea ne fakamooni aki ia ae fuakava:

¹⁸Koeuhi i he mea tae faa liliu e ua, aia kuo ikai ai aubito faa loi ae Otua, ke ma‘u ekitautolu ae fiemalie lahi, akitautolu kuo feholaki ki he hufaga, ke buke ki he amanaki lelei kuo tuku i ho tau ao:

¹⁹Aia kuo tau ma‘u o hage koe taula oe laumalie, bea oku mau mo taegau‘e, bea oku tau ia ki he botu i loto buibui;

²⁰Aia kuo hu ki ai a Jisu koe takimu‘a maa tautolu, koe taulaeiki lahi o taegata i he lakaga o Melikiseteke.