II KOE GAAHI TU‘I 13:1-25 TON1884 - Bible AI

¹1 Koe bule kovi a Jihoaasi. 8 Koe hoko moia a Joasi. 10 Ko ene bule kovi aana. 12 Oku hoko moia a Jeloboami. 14 Koe fakaha e Ilaisa i he ene teitei fonoga e tuo tolu ae ikuna e Joasi ae kakai Silia i he tau. 20 Oku tau‘i ae fonua e he kau Moabe, bea moe mea mana nae fai i he tanuaga o Ilaisa. 22 Koe bekia a Hesaeli, bea oku lava‘i a Beni‐hetati e Joasi i he tau o liuga tolu. I HONO uofulu ma tolu oe ta‘u o Joasi koe foha o Ahasia koe tu‘i o Juta, nae kamata bule ki Isileli i Samelia a Jihoaasi koe foha o Jehu, bea naa ne bule i he ta‘u e hogofulu ma fitu.

²Bea naa ne fai ae mea nae kovi i he ao o Jihova, bea naa ne muimui ki he gaahi agahala a Jeloboami koe foha o Nibati, aia nae fakaagahala‘i a Isileli; nae ikai te ne mahui mei ai.

³Bea nae fakatubu ae houhau o Jihova ki Isileli, bea naa ne tukuage akinautolu ki he nima o Hasaeli koe tu‘i o Silia, bea ki he nima o Beni‐hatati koe foha o Hasaeli, i ho na gaahi aho onaua.

⁴Bea nae kole e Jihoaasi kia Jihova, bea nae ogo‘i ia e Jihova: he naa ne afio‘i ae fakamalohi‘i o Isileli, he nae fakamalohi‘i akinautolu e he tu‘i o Silia.

⁵(Bea nae foaki e Jihova ae fakamoui kiate kinautolu, koia naa nau hao atu ai mei he nima oe kakai Silia: bea nae toe nofo ae fānau a Isileli ki ho nau gaahi falefehikitaki o hage koia i mua.

⁶Ka ne ogo ia nae ikai mahui akinautolu mei he gaahi agahala oe fale o Jeloboami, aia nae fakaagahala‘i a Isileli, ka naa nau alu ai: bea nae kei tuu foki ae vaotabu i Samelia.)

⁷Bea nae ikai te ne tuku ha kakai kia Jihoaasi ka koe kau heka hose e toko nimagofulu be, moe jaliote e hogofulu, bea moe kakai haele e toko taha mano; he kuo fakaauha akinautolu e he tu‘i o Silia, mo ne gaohi akinautolu ke tatau moe efu oe hahaaga.

⁸Bea koeni, ko hono toe oe gaahi gaue a Jihoaasi, bea moia kotoabe naa ne fai, bea mo ene malohi, ikai kuo tohi ia i he tohi fakamatala ki he gaahi tu‘i o Isileli?

⁹Bea nae mohe a Jihoaasi mo ene gaahi tamai; bea naa nau fai hono butu i Samelia; bea nae fetogi ia i he bule e Joasi ko hono foha.

¹⁰I hono tolugofulu ma fitu oe ta‘u o Joasi koe tu‘i o Juta nae kamata bule ki Isileli i Samelia a Jihoasa koe foha o Jihoaasi, bea naa ne bule i he ta‘u e hogofulu ma ono.

¹¹Bea naa ne fai ae mea nae kovi i he ao o Jihova; nae ikai mahui ia mei he gaahi agahala kotoabe a Jeloboami koe foha o Nibati, aia nae fakaagahala‘i a Isileli: ka naa ne alu ai be.

¹²Bea ko hono toe oe gaahi gaue a Joasi, moia kotoabe naa ne fai, bea mo ene malohi i he ene tau‘i a Amasia koe tu‘i o Juta, ikai kuo tohi ia i he tohi oe gaahi tu‘i o Isileli?

¹³Bea nae mohe a Joasi mo ene gaahi tamai; bea nae nofo a Jeloboami ki hono nofoa fakatu‘i: bea nae tanu a Joasi i Samelia fakataha moe gaahi tu‘i o Isileli.

¹⁴Ka koeni nae bukea a Ilaisa i he mahaki aia naa ne toki fonoga ai. Bea nae alu hifo kiate ia a Joasi koe tu‘i o Isileli, bea nae tagi ia ki hono mata, mo ne behe, Oiaue, a eku tamai, a eku tamai! koe jaliote o Isileli moe kau heka hose oia!

¹⁵Bea nae behe e Ilaisa kiate ia, Too ae kaufana moe gaahi gahau. Bea naa ne too mai kiate ia ae kaufana bea moe gaahi gahau

¹⁶Bea naa ne behe ki he tu‘i o Isileli, Ai ho nima ki he kaufana. Bea naa ne ai hono nima ki ai: bea nae ai e Ilaisa a hono nima oona ki he nima oe tu‘i.

¹⁷Bea naa ne behe, Fakaava ae mataba jioata ki he botu hahake. Bea naa ne fakaava ia. Bea nae toki behe e Ilaisa, Fana. Bea naa ne fana. Bea nae behe eia, Koe gahau eni oe fakamoui a Jihova, bea moe gahau oe fakamoui mei Silia: he te ke teia ae kakai Silia i Afeki, kae oua ke nau auha iate koe.

¹⁸Bea naa ne behe, Too ae gaahi gahau. Bea naa ne too ia. Bea naa ne behe ki he tu‘i o Isileli, Ke ke ta‘i ae kelekele. Bea naa ne ta ia o liuga tolu bea tuku.

¹⁹Bea nae mamahi kiate ia ae tagata oe Otua, o ne behe, Nae totonu a hoo ta ke liuga nima be liuga ono; ka ne behe, behe kuo ke teia ae kakai Silia kae oua ke nau auha; ka koeni e tuo tolu be a hoo teia a Silia.

²⁰Bea nae bekia a Ilaisa, bea naa nau fai hono butu. Bea nae ha‘u ae kau tau a Moabe ki he fonua i he kamataaga oe ta‘u.

²¹Bea nae hoko o behe, lolotoga e nau tanu ha tagata, iloage naa nau jio ki ha kau tau; bea naa nau laku atu ae tagata ki he fonua loto a Ilaisa: bea i he ene to hifo ki ai ae tagata mo lave ki he gaahi hui o Ilaisa, naa ne toe moui hake mo ne tuu ki oluga ki hono va‘e.

²²Ka nae fakamalohi‘i a Isileli e Hasaeli koe tu‘i o Silia i he gaahi aho kotoabe o Jihoaasi.

²³Bea nae agaofa a Jihova kiate kinautolu, bea naa ne manavaofa kiate kinautolu, bea naa ne tokaga kiate kinautolu, koeuhi ko ene fuakava mo Ebalahame, mo Aisake, bea mo Jekobe, bea nae ikai te ne fie fakaauha akinautolu, bea nae ikai te ne li atu leva akinautolu mei hono ao.

²⁴Koia nae bekia a Hasaeli koe tu‘i o Silia; bea nae fetogi ia i he bule e Benihatati ko hono foha.

²⁵Bea nae toe ha‘u o ma‘u e Jihoasa koe foha o Jihoaasi mei he nima o Benihatati koe foha o Hasaeli, ae gaahi kolo, aia naa ne lava‘i mei he nima o Jihoaasi ko ene tamai i he tau. Nae tuo tolu ae lava‘i ia e Joasi, mo ne toe ma‘u ai ae gaahi kolo o Isileli.