II KOE GAAHI TU‘I 18:1-37 TON1884 - Bible AI

¹1 Koe bule lelei a Hesekaia. 4 Oku ne fakagata eia ae lotu loi. 9 Oku ave fakabobula‘i a Samelia i he e nau gaahi agahala. 13 Oku tau‘i e Senakalibe a Juta bea oku fakalelei aki ia ae mea ofa. 17 Oku fekau e Senakalibe a Labisake bea oku ne manuki‘i a Hesekaia, bea i he ene lea kabe naa ne ahiahi ke laga‘i ae agatuu i he he kakai. BEA nae hoko o behe i hono tolu ta‘u o Hosea koe foha o Ela koe tu‘i o Isileli, nae kamata bule a Hesekaia koe foha o Ahasi koe tu‘i o Juta.

²Nae uofulu ma nima a ene ta‘u i he ene kamata bule: bea nae bule ia i he ta‘u e uofulu ma hiva i Jelusalema. Koe higoa o ene fa‘e foki ko Abi, koe ofefine o Sakalia.

³Bea nae fai lelei ia i he ao o Jihova, o fakatatau ki he mea kotoabe nae fai e Tevita ko ene tamai.

⁴Naa ne fakalala ae gaahi botu maoluga, bea fejii hifo ae gaahi tamabua, bea ne ta hifo ae gaahi vao tabu, bea naa ne fejifeji ke iki ae gata balasa aia nae gaohi e Mosese: he nae tutu e he fānau a Isileli ae mea namu kakala ki ai o a‘u ki he gaahi aho koia: bea naa ne ui ia ko Nehusitani.

⁵Nae falala ia kia Jihova koe Otua o Isileli; koia nae ikai tatau moia ha toko taha ki mui i he gaahi tu‘i kotoabe o Juta, be ha toko taha nae i mua iate ia.

⁶He nae bikitai ia kia Jihova, bea ikai liaki ene muimui iate ia, ka naa ne tauhi ene gaahi fekau, aia nae fekau e Jihova kia Mosese.

⁷Bea nae iate ia a Jihova; bea nae monuia ia i he botu kotoabe nae alu ia ki ai: bea naa ne liaki ae tu‘i o Asilia, o ikai tauhi ki ai.

⁸Naa ne ta‘i ae kakai Filisitia, o a‘u atu ki Kesa, mo hono gaahi gataaga o ia mei he fale maoluga ae kau leo o a‘u ki he kolotau.

⁹Bea i hono fa oe ta‘u oe tu‘i ko Hesekaia, aia ko hono fitu ta‘u o Hosea koe foha o Ela koe tu‘i o Isileli, nae hoko o behe, nae ha‘u ai a Salimanesa koe tu‘i o Asilia ki Samelia, mo ne kabui ia aki ae tau.

¹⁰Bea i he gataaga oe ta‘u e tolu naa nau kabaji ia. I hono ono ta‘u o Hesekaia, aia ko hono hiva o Hosea koe tu‘i o Isileli, nae kaba a Samelia.

¹¹Bea nae fetuku a Isileli e he tu‘i o Asilia ki Asilia, o ne tuku akinautolu i Hala mo Haboa, i he veevaitafe o Kosani, bea i he gaahi kolo oe kakai Mitia.

¹²Koe mea i he ikai te nau talagofua ki he le‘o o Jihova ko ho nau Otua, ka naa nau talagataa ki he ene fuakava, mo ia kotoabe nae fekau e Mosese koe tamaioeiki a Jihova, bea ikai tokaga ki ai be fai ki ai.

¹³I hono hogofulu ma fa oe ta‘u oe tu‘i ko Hesekaia nae ha‘u ai a Senakalibe koe tu‘i o Asilia ke tau‘i ae gaahi kolo tau kotoabe o Juta, bea naa ne lava‘i akinautolu.

¹⁴Bea nae fekau e Hesekaia koe tu‘i o Juta ki he tu‘i o Asilia i Lakisi, o behe, Kuou fai hala; ke ke liliu meiate au: koia oku ke tala kiate au teu kataki. Bea nae eke ehe tu‘i o Asilia meia Hesekaia koe tu‘i o Juta ae taleniti siliva e tolugeau moe taleniti koula e tolugofulu.

¹⁵Bea nae atu kiate ia e Hesekaia ae siliva kotoabe nae ilo i he fale o Jihova, bea i he gaahi tukuaga koloa i he fale oe tu‘i.

¹⁶I he kuoga koia nae tutuu ai e Hesekaia ae koula mei he gaahi mataba oe fale tabu o Jihova, bea mei he gaahi bou aia nae aofi e Hesekaia koe tu‘i o Juta, o ne atu ia ki he tu‘i o Asilia.

¹⁷Bea nae fekau e he tu‘i o Asilia a Tatani mo Labisalisi mo Labisake mei Lakisi ki he tu‘i ko Hesekaia, moe fuu tau lahi ke tau‘i a Jelusalema. Bea naa nau alu hake o hoko ki Jelusalema. Bea i he e nau alu hake naa nau tuu ofi ki he tafeagavai oe vai i oluga, aia oku i he halamotua oe goue oe tufuga fakamaa kofu.

¹⁸Bea hili e nau ui ki he tu‘i, nae ha‘u kitua kiate kinautolu a Iliakimi koe foha o Hilikia, aia nae bule ki he fale, mo Sebina koe tagata tohi, mo Joa koe foha o Asafi koe tagata nae tohi ae gaahi mea fakabuleaga.

¹⁹Bea nae behe e Labisake kiate kinautolu, Ko eni ke mou lea kia Hesekaia, Oku behe e he tu‘i lahi, koe tu‘i o Asilia, Koeha ae malohi ni aia oku ke falala ki ai?

²⁰Oku ke behe, (ka koe lea lau noabe) oku iate au ae fakakaukau moe malohi ki he tau. Bea koeni, kohai ia oku ke falala ki ai, kuo ke agatuu ai kiate au?

²¹Bea koeni, vakai, oku ke falala ki ho tokotoko oe kaho mafeji ni, io ko Ijibite, aia kabau e faaki ki ai ha tagata, e aji ia ki hono nima, bea e lavea ai: oku behe be a Felo koe tu‘i o Ijibite kiate kinautolu kotoabe oku falala kiate ia.

²²Bea kabau oku mou behe kiate au, oku mau falala kia Jihova ko ho mau Otua: ikai koia ia koe gaahi botu maoluga oona mo hono gaahi feilaulauaga kuo ave e Hesekaia o liaki, bea kuo ne tala kia Juta mo Jelusalema, Ke lotu akimoutolu i he ao oe feilaulauaga koeni i Jelusalema?

²³Bea koeni, oku ou kole kiate koe, tuku mai ae gaahi fakamooni ki he eku eiki koe tu‘i o Asilia, bea teu atu kiate koe ae faga hose e ua afe, o kabau te ke faa fai ekoe ke fakaheka ki ai ae kau heka hose.

²⁴Bea e fefe‘i hao faa fai ke fakafoki ae mata oe eiki tau e toko taha, koe jii hifo taha be i he kau tamaioeiki a eku eiki, ka ke falala koe ki Ijibite ki he gaahi jaliote moe kau tagata heka hose?

²⁵He kuou hoko mai ni o tae kau mo Jihova ke fakaauha ae botu ni? Nae behe e Jihova kiate au, Alu hake o tau‘i ae fonua ni, bea fakaauha ia.

²⁶Bea nae behe ai e Iliakimi koe foha o Hilikia, mo Sebina, mo Joa, kia Labisake, Ke ke lea mai ki hoo kau tamaioeiki i he lea fakasilia; he oku mau ilo ia: kae oua naa ke talanoa kiate kimautolu i he lea ae kakai Jiu i he teliga oe kakai oku nofo i he fuga a.

²⁷Ka nae behe e Labisake, kiate kinautolu, He nae fekau au e he eku eiki ki hoo eiki, bea kiate koe, ke lea aki ae gaahi lea ni? ikai ko ene fekau au ki he kau tagata aia oku heheka ki he a maka, koeuhi ke nau kai e nau kinohaa anautolu, mo inu e nau tuutata?

²⁸Bea nae tuu ai a Labisake, bea ne kalaga le‘o lahi i he lea fakajiu, mo ne lea, o behe, Mou tokaga ki he lea ae tu‘i lahi, koe tu‘i o Asilia:

²⁹Oku behe e he tu‘i, Oua naa fakahala‘i akimoutolu e Hesekaia: koeuhi e ikai te ne mafai eia ke fakamoui akimoutolu mei hono nima:

³⁰Bea oua naa ue‘i akimoutolu e Hesekaia ke mou falala kia Jihova, o behe, Koe mooni e fakamoui akitautolu e Jihova, bea e ikai tukuage ae kolo ni ki he nima oe tu‘i o Asilia.

³¹Oua naa mou tokaga kia Hesekaia: he oku behe ae tu‘i o Asilia, Fai hoo fakalelei kiate au aki ha mea ofa, bea ha‘u kitua kiate au, bea te mou toki kai taki taha ae tagata ae vaine aana, bea taki taha i he fiki aana, bea mou inu taki taha kotoabe i he gaahi vai o ene vaikeli aana:

³²Kae oua keu toki ha‘u o ave akimoutolu ki ha fonua oku hage ko ho mou fonua, koe fonua oe uite moe uaine, koe fonua oe ma moe goue vaine, koe fonua oe lolo olive moe honi, koeuhi ke mou moui, ka e ikai mate: bea oua naa mou tokaga kia Hesekaia, i he ene kākā‘i akimoutolu o behe, E fakamoui akitautolu e Jihova.

³³He oku ai ha toko taha i he gaahi otua oe gaahi buleaga kuo nau fakamoui hono fonua mei he nima oe tu‘i o Asilia?

³⁴Kofaia ae gaahi otua o Hemati, mo Aabati? Kofaaia ae gaahi otua o Sifaveimi, mo Hena, mo Iva? he kuo nau fakamoui a Samelia mei hoku nima?

³⁵Kohai akinautolu i he gaahi otua oe gaahi fonua, aia kuo nau fakamoui ho nau fonua mei hoku nima, ke behe ai e fakamoui e Jihova a Jelusalema mei hoku nima?

³⁶Ka nae logo be ae kakai, bea nae ikai tali ia aki ha momoi lea: he nae fekau e he tu‘i, o behe, Oua naa tali ia.

³⁷Bea nae toki ha‘u a Iliakimi koe foha o Hilikia aia nae bule ki he fale, mo Sebina koe fai tohi, mo Joa koe foha o Asafi koe tagata nae tohi ae gaahi mea fakabuleaga, kia Hesekaia kuo haehae ho nau kofu, bea naa nau tala kiate ia ae gaahi lea a Labisake.