II KOE GAAHI TU‘I 24:1-20 TON1884 - Bible AI

¹1 Nae ikuna a Jihoiakimi e Nebukanesa, bea toki tuu ia kiate ia, bea oku ne malaia ai. 6 Oku fetogi ia e Jihoiakini. 7 Oku ikuna ae tu‘i o Ijibite e he tu‘i o Babilone. 8 Koe bule kovi a Jihoiakini. 10 Oku kabaji a Jelusalema bea fetuku ae kakai ki Babilone. 17 Oku fakanofo a Setikia ke tu‘i, bea oku bule kovi ia bea oku fakaauha ai a Juta. I HONO gaahi aho oona nae alu hake ai a Nebukanesa koe tu‘i o Babilone, bea nae hoko a Jihoiakimi ko ene tamaioeiki i he ta‘u e tolu: bea hili ia naa ne toe agatuu kiate ia.

²Bea nae fekau e Jihova kiate ia ae kau tau oe kakai Kalitia moe kau tau oe kakai Silia, moe kau tau oe kakai Moabe, moe kau tau oe fānau a Amoni, bea ne fekau‘i akinautolu ke tau‘i a Juta, ke fakaauha ia, o fakatatau ki he folofola a Jihova aia naa ne folofola ai i he ene kau tamaioeiki koe kau balofita.

³Koe mooni nae hoko ae mea ni ki Juta i he fekau a Jihova, ke hiki akinautolu mei hono ao, koeuhi koe gaahi agahala a Manase, o fakatatau ki he mea kotoabe naa ne fai;

⁴Bea koeuhi foki koe toto maonioni naa ne liligi: he naa ne fakabito a Jelusalema i he toto maonioni; aia nae ikai finagalo a Jihova ke fakamolemole.

⁵Bea koe toe oe gaahi gaue a Jihoiakimi, moia kotoabe naa ne fai, ikai kuo tohi ia i he tohi fakamatala ki he gaahi tu‘i o Juta?

⁶Bea nae mohe a Jihoiakimi mo ene gaahi tamai: bea nae fetogi ia i he bule e hono foha ko Jihoiakini.

⁷Bea nae ikai toe ha‘u ae tu‘i o Ijibite mei hono fonua: he nae ma‘u e he tu‘i o Babilone aia kotoabe nae oe tu‘i o Ijibite, mei he vaitafe o Ijibite, o a‘u ki he vaitafe ko Iufaletesi.

⁸Nae hogofulu ma valu ta‘u ae motua o Jihoiakini i he ene kamata ene bule, bea nae bule ia i Jelusalema i he mahina e tolu. Bea koe higoa o ene fa‘e ko Nehusita, koe ofefine o Elinatani o Jelusalema.

⁹Bea nae fai eia ae kovi i he ao o Jihova, o hage koia kotoabe nae fai e he ene tamai.

¹⁰I he kuoga koia nae ha‘u ai ae kau tamaioeiki a Nebukanesa koe tu‘i o Babilone ke tau‘i a Jelusalema, bea nae kabui ae kolo aki ae tau.

¹¹Bea nae ha‘u a Nebukanesa koe tu‘i o Babilone ke tau‘i ae kolo, bea nae kabui ia e he ene kau tamaioeiki.

¹²Bea nae alu kitua a Jihoiakini koe tu‘i o Juta ki he tu‘i o Babilone, aia mo ene fa‘e, mo ene kau tamaioeiki, mo ene houeiki, mo ene kau matābule: bea nae buke ia e he tu‘i o Babilone i hono valu ta‘u o ene bule.

¹³Bea naa ne fetuku mei ai ae gaahi koloa kotoabe oe fale o Jihova, moe gaahi koloa mei he fale oe tu‘i, bea naa ne tuutuu ke iki ae gaahi ibu koula aia nae gaohi e Solomone koe tu‘i o Isileli i he fale tabu o Jihova, o hage koe folofola a Jihova.

¹⁴Bea naa ne fetuku o ave ae kakai Jelusalema kotoabe moe gaahi houeiki kotoabe, moe kau tagata to‘a kotoabe, io, koe bobula e toko taha mano, moe kau tagata tufuga moe kau tufuga ukamea: nae ikai toe ha kakai, ka koe kakai majiva aubito oe fonua.

¹⁵Bea naa ne ave a Jihoiakini ki Babilone, moe fa‘e ae tu‘i, moe gaahi unoho oe tu‘i, mo ene kau matābule, moe kau malohi oe fonua, naa ne fetuku bobula akinautolu mei Jelusalema ki Babilone.

¹⁶Bea koe kau tagata to‘a kotoabe, io ae toko fitu afe, moe kau tufuga kehekehe, moe kau tuki ukamea, koe toko taha afe, akinautolu kotoabe nae malohi mo boto i he tau, nae fetuku bobula akinautolu e he tu‘i o Babilone ki Babilone.

¹⁷Bea nae fakanofo e he tu‘i o Babilone a Matania koe tokoua o ene tamai ke tu‘i ia ko hono fetogi, bea naa ne liliu hono higoa ko Setikia.

¹⁸Nae uofulu ma taha ae ta‘u ae motua o Setikia i he ene kamata ene bule, bea nae bule ia i he ta‘u e hogofulu ma taha i Jelusalema. Bea koe higoa o ene fa‘e ko Hamutali, koe ofefine ia o Jelemaia o Libina.

¹⁹Bea nae fai kovi eia i he ao o Jihova, o hage koia kotoabe nae fai e Jihoiakimi.

²⁰He koe mea i he houhau a Jihova nae hoko eni ki Jelusalema mo Juta, bea koeuhi ke ne liaki akinautolu mei hono ao, nae fai ae agatuu a Setikia ki he tu‘i o Babilone.