II KOE TOHI FAKAMATALA MEA HOKOHOKO 21:1-20 TON1884 - Bible AI

¹1 Oku hoko a Jiholami ki he bule bea ne tamate‘i hono gaahi kaiga. 5 Ko ene bule agakovi. 8 Oku agatuu a Itomi mo Libina. 12 Koe toki valoki ia mei a Ilaija. 16 Oku fakafiu‘i ia e he kakai Filisitia moe kakai Alebea. 18 Ko ene mahaki mo ene mate kovi, mo hono tanu. BEA nae mohe a Jihosafate mo ene gaahi tamai, bea nae tanu ia mo ene gaahi tamai i he kolo a Tevita. Bea nae fetogi ia i he bule e Jiholami ko hono foha.

²Bea nae iate ia hono gaahi kaiga koe gaahi foha o Jihosafate, ko Asalia, mo Jehieli, mo Sakalia, mo Asalia, mo Mikaeli, mo Sifatia: ko kinautolu ni koe gaahi foha o Jihosafate koe tu‘i o Isileli.

³Bea nae foaki kiate kinautolu e he e nau tamai ae gaahi foaki lahi oe siliva moe koula, bea moe gaahi mea mahuiga lahi, moe gaahi kolo tau i Juta: ka naa ne foaki ae buleaga kia Jiholami: he koe uluaki tubu ia.

⁴Bea i he hoko a Jiholami ki he buleaga o ene tamai, naa ne fakamalohi ia; bea ne tamate‘i hono gaahi kaiga aki ae heleta, moe houeiki niihi o Isileli foki.

⁵Nae tolugofulu ta‘u moe ta‘u e ua ae motua o Jiholami i he ene kamata bule, bea nae bule eia i he ta‘u e valu i Jelusalema.

⁶Bea nae alu ia i he hala oe gaahi tu‘i o Isileli, o hage koia nae fai e he fale o Ehabi: he naa ne fakamau unoho moe ofefine o Ehabi: bea nae fai eia aia nae kovi i he ao o Jihova.

⁷Ka koe mooni nae ikai fie fakaauha e Jihova ae fale o Tevita, koe mea i he fuakava naa ne fai mo Tevita, bea mo ene talaofa ke foaki ae māma kiate ia bea ki hono gaahi foha o taegata.

⁸Nae agatuu i hono gaahi aho ae kakai Itomi ki he buleaga o Juta, bea naa nau fakanofo ho nau tu‘i onautolu.

⁹Bea nae alu atu a Jiholami mo ene gaahi houeiki, mo ene gaahi jaliote kotoabe; bea tuu hake ia i he bouli, o ne ta‘i ae kakai Itomi nae nofo takatakai iate ia, moe gaahi eiki bule oe gaahi jaliote.

¹⁰Koia nae agatuu ae kakai Itomi mei he bule o Juta o a‘u ki he aho ni. Bea nae agatuu a Libina foki i he kuoga koia ki he ene bule: koe mea i he ene liaki a Jihova koe Otua o ene gaahi tamai.

¹¹Bea naa ne gaohi ae gaahi botu maoluga i he gaahi mouga o Juta, mo ne bule ke fai feauaki ae kakai o Jelusalema, o ne fakamalohi a Juta ke fai ia.

¹²Bea nae ha‘u ae tohi kiate ia mei a Ilaija koe balofita, o behe, Oku behe e Jihova koe Otua o Tevita ko hoo tamai, Koe mea i he ikai te ke alu i he gaahi hala o Jihosafate ko hoo tamai, be i he gaahi hala o Asa koe tu‘i o Juta,

¹³Ka kuo ke alu i he hala oe gaahi tu‘i o Isileli, bea kuo ke fakaagahala‘i a Juta moe kakai o Jelusalema ke feauaki, o hage hoe gaahi feauaki oe fale o Ehabi, bea kuo ke tamate‘i foki a ho gaahi kaiga i he fale o hoo tamai, aia nae agalelei lahi hake iate koe:

¹⁴Vakai, teu ta‘i ho kakai, aki ae mamahi lahi, mo hoo gaahi fānau, mo ho gaahi unoho, bea mo hoo gaahi mea kotoabe:

¹⁵Bea e iate koe ae mahaki lahi i he mahaki i ho kete, bea e mokulu kitua a ho kete koe mea i he mahaki i he aho taki taha kotoabe.

¹⁶Bea nae laga‘i hake foki e Jihova ae loto oe kakai Filisitia, moe kakai Alebea, akinautolu nae vaofi moe kakai Itiobea, ke nau tau kia Jiholami:

¹⁷Bea naa nau alu hake ki Juta, bea naa nau oho ki loto fonua o nau fetuku o ave ae gaahi koloa kotobe nae ilo i he fale oe tu‘i, bea mo hono gaahi foha foki, mo hono gaahi unoho: koia nae ikai hano foha e taha e tuku kiate ia, ka ko Jihoaasi, koe kimui i hono gaahi foha.

¹⁸Bea hili ae mea ni kotoabe nae ta‘i ia e Jihova i hono kete aki ae mahaki tae faa fakamoui.

¹⁹Bea fai ai be o fuoloa bea hoko o behe, hili ae ta‘u e ua, nae mokulu hono gakau ki tua koe mea i he ene mahaki: koia nae bekia ia i he gaahi mahaki lahi. Bea nae ikai ha tutu maana, o hage koe tutu ki he ene gaahi tamai.

²⁰Koe ta‘u e tolugofulu ia moe ta‘u e ua hono motua, i he ene kamata bule, bea nae bule ia i Jelusalema i he ta‘u e valu, bea nae alu ia, bea nae ikai ha tokaga ki ai. Ka naa nau tanu ia i he kolo o Tevita, ka nae ikai i he gaahi tanuaga oe gaahi tu‘i.