II KOE TOHI FAKAMATALA MEA HOKOHOKO 29:1-36 TON1884 - Bible AI

¹1 Koe bule lelei a Hesekaia. 3 Oku ne toe laga‘i ae lotu. 5 Naa ne eginaki ae kau Livai. 12 Oku nau fakamaa akinautolu, o nau fakamaa ae fale oe Otua. 20 Oku atu e Hesekaia ae gaahi feilaulau molumalu, aia nae lahi hake ae tokaga ki ai e he kau Livai i he kau taulaeiki. NAE uofulu ta‘u moe ta‘u e nima ae motua o Hesekaia i he ene kamata bule, bea nae bule ia i he ta‘u e uofulu ma hiva i Jelusalema. Bea koe higoa o ene fa‘e ko Abija koe ofefine o Sakalia.

²Bea nae fai lelei eia i he ao o Jihova, o fakatatau ki he mea kotoabe nae fai e Tevita ko ene tamai.

³I he uluaki ta‘u o ene bule, i he uluaki mahina, naa ne too ae gaahi mataba oe fale o Jihova, o ne gaohi ia ke lelei.

⁴Bea ne omi ae kau taulaeiki moe kau Livai, o ne tanaki akinautolu ke fakataha ki he hala fakahahake.

⁵Bea nae behe eia kiate kinautolu, Ae kau Livai, ke mou tokaga kiate au, koeni mou fakamaa akimoutolu, bea fakamaa ae fale o Jihova koe Otua o hoo mou gaahi tamai, bea mou fetuku atu ae gaahi mea uli mei he botu maonioni.

⁶He nae fai hala e tau gaahi tamai, bea fai aia nae kovi i he ao o Jihova ko ho tau Otua, bea naa nau liaki ia, bea nae tafoki ho nau mata mei he falenofoaga o Jihova, bea fulitua ki ai.

⁷Bea kuo nau tabuni ae gaahi mataba oe huaga fale fakamalumalu, bea tamate‘i ae gaahi māma, bea nae ikai tutu ae mea namu kakala be atu ae gaahi feilaulau tutu i he botu maonioni ki he Otua o Isileli.

⁸Koia nae to ai ae houhau a Jihova ki Juta mo Jelusalema, bea naa ne tukuage akinautolu ki he mamahi, moe fakaofoofo, moe fakaiseisa, o hage koia oku mou mamata ai aki ho mou mata.

⁹Vakai, he kuo to e tau gaahi tamai i he heleta, bea oku nofo bobula i he mea ni ho tau gaahi foha mo ho tau gaahi ofefine mo ho tau gaahi unoho.

¹⁰Bea koeni, oku i hoku loto ia ke fai ae fuakava kia Jihova koe Otua o Isileli, koeuhi ke tafoki hono houhau lahi meiate ki tautolu.

¹¹E hoku gaahi foha, oua eni naa mou taetokaga: he kuo fili akimoutolu e Jihova ke tuu i hono ao, ke tauhi ia, bea ke mou gaue kiate ia, bea tutu ae mea namu kakala.

¹²Bea nae tuu hake ai ae kau Livai, ko Mehati koe foha o Amasai, mo Joeli koe foha o Asalia, i he gaahi foha oe kau Kohate: bea i he gaahi foha o Melali, ko Kisi koe foha o Abiti, mo Asalia koe foha o Jehalili: bea i he kakai Kesoni; ko Joa koe foha o Sima, mo Iteni koe foha o Joa:

¹³Bea i he gaahi foha o Ilisafani; ko Simili, mo Jieli: bea i he gaahi foha o Asafi; ko Sakalia, mo Matania:

¹⁴Bea i he gaahi foha o Hemani: ko Jehieli, mo Simi: bea i he gaahi foha o Jitutuni; ko Simaia, mo Usili.

¹⁵Bea naa nau fakakatoa ho nau gaahi kaiga, bea fakamaa akinautolu, bea ha‘u, o hage koe fekau ae tu‘i, i he folofola a Jihova, ke fakamaa ae fale o Jihova.

¹⁶Bea nae hu ae kau taulaeiki ki he botu i loto i he fale o Jihova, ke fakamaa ia, o nau fetuku mei ai ae gaahi mea uli kotoabe naa nau ilo i he fale tabu o Jihova ki he loto a oe fale o Jihova. Bea nae ave ia e he kau Livai, o fetuku ia ki he mamao ki he vaitafe ko Kitiloni.

¹⁷Bea naa nau kamata i he uluaki aho oe uluaki mahina ke fakamaa, bea i hono valu oe aho oe mahina naa nau hoko ki he huaga fale fakamalumalu o Jihova: koia naa nau fakamaa ae fale o Jihova i he aho e valu; bea i hono aho e hogofulu ma ono i he uluaki mahina naa nau fakaoji.

¹⁸Bea naa nau alu ai kia Hesekaia koe tu‘i, o behe, Kuo mau fakamaa ae botu kotoabe oe fale o Jihova, moe feilaulauaga oe mea tutu, mo hono gaahi ibu kotoabe o ia, moe balebale oe ma oe ao, mo hono gaahi ibu kotoabe oia.

¹⁹Bea koeuhi koe gaahi ibu kotoabe, aia nae liaki e he tu‘i ko Ehabi i he ene bule, i he ene agahala, kuo oji e mau teu‘i mo fakatabu‘i, bea vakai, oku nau i he mua feilaulauaga o Jihova.

²⁰Bea nae tuu hegihegi hake a Hesekaia koe tu‘i, o ne tanaki ke fakataha ae kau bule oe kolo, bea alu ia ki he fale o Jihova.

²¹Bea naa nau omi ae faga bulu e fitu, moe sibi tagata e fitu, moe lami e fitu, moe koji tagata e fitu, koe feilaulau i he agahala ae buleaga, bea ma ae falenofoaga, bea mo Juta. Bea nae fekau ia ki he kau taulaeiki koe gaahi foha o Elone ke atu ia i he fuga feilaulauaga o Jihova.

²²Koia naa nau tamate‘i ae faga bulu, bea nae fakatali ae toto e he kau taulaeiki, bea nau luluku aki ae feilaulauaga: bea behe be, hili e nau tamate‘i ae faga sibi tagata, naa nau luluku aki ae toto ae feilaulauaga: bea naa nau tamate‘i ae faga lami foki, bea nau luluku ae toto ki he feilaulauaga.

²³Bea naa nau omi kitua ae faga koji tagata koe feilaulau ma ae agahala ki he ao oe tu‘i moe fakataha; bea naa nau hilifaki ho nau nima ki ai:

²⁴Bea nae tamate‘i akinautolu e he kau taulaeiki, bea fai ae fakalelei aki a ho nau toto i he fuga oe feilaulauaga, ke fai ai ae fakalelei koeuhi ko Isileli kotoabe: he nae fekau e he tu‘i ke fai ae feilaulau tutu moe feilaulau ma ae agahala ma a Isileli kotoabe.

²⁵Bea naa ne fokotuu ae kau Livai he fale o Jihova moe gaahi mea bakihi, moe gaahi utete, moe gaahi haabe, o fakatatau ki he fekau a Tevita, bea mo Kata koe tagata kikite ae tu‘i, mo Netane koe balofita: he nae behe be ae fekau a Jihova i he ene kau balofita.

²⁶Bea nae tuu ae kau Livai moe gaahi mea faiva a Tevita, moe kau taulaeiki moe gaahi mealea.

²⁷Bea nae fekau e Hesekaia ke fai ae feilaulau tutu i he fuga oe feilaulauaga. Bea i he kamata atu ae feilaulau tutu, nae kamata foki ae hiva kia Jihova aki ae gaahi mealea, bea i he gaahi mea faiva nae tuutuuni e Tevita koe tu‘i o Isileli.

²⁸Bea nae hu ae fakataha kotoabe, bea hiva ae kau hiva, bea fakaogo e he kau ifi mealea: bea nae fai ai be ae mea ni kotoabe ke oua ke oji ae feilaulau tutu.

²⁹Bea hili e nau fakaoji ae feilaulau, nae bunou ae tu‘i mo kinautolu kotoabe nae iate ia, o nau hu.

³⁰Bea nae fekau foki e Hesekaia koe tu‘i moe houeiki ki he kau Livai ke hiva mo fakafetai kia Jihova aki ae gaahi lea a Tevita, bea mo Asafi koe tagata kikite. Bea naa nau hiva aki ae gaahi fakafetai i he fiefia, o nau bunou hifo ho nau ulu o hu.

³¹Bea nae tali e Hesekaia o ne behe, Koeni kuo mou fakatabu‘i akimoutolu kia Jihova, mou ha‘u ke ofi, bea omi ae gaahi feilaulau moe feilaulau fakafetai ki he fale o Jihova. Bea nae omi e he fakataha ae gaahi feilaulau moe gaahi feilaulau fakafetai; bea omi ekinautolu nae loto ataataina ae gaahi feilaulau tutu.

³²Bea ko hono lau oe gaahi feilaulau tutu, aia nae omi e he fakataha lahi, koe faga bulu e fitugofulu, koe sibi tagata e teau, moe lami e uageau: koeni kotoabe koe feilaulau tutu kia Jihova.

³³Bea koe mea nae fakatabu‘i koe faga bulu e onogeau moe sibi e tolu afe.

³⁴Bea nae toko jii ae kau taulaeiki, koia nae ikai te nau faa fai ke fohi ae feilaulau tutu kotoabe: koia nae tokoni ai akinautolu e ho nau kaiga koe kau Livai, ke oua ke oji ae gaue, bea ke oua ke fakamaa a hono toe oe kau taulaeiki: he nae agatonu lahi hake i loto ae kau Livai ke fakamaa akinautolu i he kau taulaeiki.

³⁵Bea nae lahi aubito foki ae gaahi feilaulau tutu, moe gako oe gaahi feilaulau fakalelei, moe feilaulau inu i he feilaulau tutu kotoabe. Koia nae teuteu lelei ae gaue oe fale o Jihova.

³⁶Bea nae fiefia a Hesekaia, moe kakai kotoabe, koe mea i he teuteu‘i e he Otua hono kakai; he nae fai fakafokifa be ae mea ni.