KAKAI KALETIA 3:1-29 TON1884 - Bible AI

¹Oku ne eke ha mea naa nau jiaki ai ae tui, kae falala ki he fono? 6 Ko kinautolu oku tui oku fakatonuhia‘i, 9 bea tabuekina fakataha mo Ebalahame. 10 Oku ne fakamooni ia mei he mea kehekehe. AE kau Kaletia vale, kohai kuo ne fakamatavalea akimoutolu, koeuhi ke oua naa mou talagofua ki he mooni, akimoutolu nae fakaha tautonu i ho mou ao a Jisu Kalaisi mo hono tutuki ki he akau?

²Koe mea ni be oku ou fie ilo iate kimoutolu, Naa mou ma‘u ae Laumalie i he gaahi gaue oe fono, be i he fanogo i he tui?

³Oku behe koa hoo mou vale? kuo mou kamata i he Laumalie, bea kuo fakahaohaoa eni akimoutolu e he kakano?

⁴Kuo mou kataki taeaoga ae gaahi mea lahi? o kabau oku kei taeaoga.

⁵Ko ia ia kuo ne foaki kiate kimoutolu ae Laumalie, o ne fai ae gaahi mea mana kiate kimoutolu, oku ne fai ia i he gaahi gaue oe fono, be i he fanogo i he tui?

⁶O hage koe tui a Ebalahame, ki he Otua, bea nae lau ia kiate ia koe maonioni.

⁷Koia ke mou ilo ko kinautolu oku i he tui, koe fānau akinautolu a Ebalahame.

⁸Bea i he tomua ilo e he tohi, e fakatonuhia e he Otua ae Jenitaile i he tui, nae malaga aki ae ogoogolelei i mu‘a kia Ebalahame, o ne behe, E monuia iate koe ae gaahi buleaga kotoabe.

⁹Koia ko kinautolu oku i he tui, oku tabuekina fakataha mo Ebalahame agatonu.

¹⁰He ko kinautolu kotoabe oku i he gaahi gaue oe fono, oku moulaloa i he malaia: he kuo tohi, Oku malaia kotoabe oku ikai tuu mau ai be i he gaahi mea kotoabe kuo tohi i he tohi oe fono ke fai ia.

¹¹Ka oku ha mahino mai, oku ikai ha taha e fakatonuhia e he fono i he ao oe Otua: koeuhi, E moui ae tonuhia i he tui.

¹²Bea oku ikai mei he tui ae fono: ka, Ko ia ia oku ne fai ia e moui ai.

¹³Nae huhui akitautolu e Kalaisi mei he malaia oe fono, ko ene hoko koe malaia koeuhi ko kitautolu: he kuo tohi, Oku malaia kotoabe oku tautau ki he akau:

¹⁴Koeuhi ke hoko ae tabuaki a Ebalahame ki he kakai Jenitaile foki ia Jisu Kalaisi; bea ke ma‘u ekitautolu ae talaofa ki he Laumalie i he tui.

¹⁵E kaiga, oku ou lea o tāu be moe tagata; Kabau koe fefuakavaaki ae tagata be, ka kuo mau ia, e ikai ha taha e fakataeaoga ia, be fakalahi ki ai.

¹⁶Ko eni, nae fai ae gaahi talaofa kia Ebalahame mo hono hako. Oku ikai behe eia, Bea ki he gaahi hako, o hage koe mea i he toko lahi; kae hage koe mea i he toko taha be, Bea ki ho hako, bea ko Kalaisi ia.

¹⁷Bea ko eku lea eni, koe fuakava ia Kalaisi, nae fakamooni ki ai i mu‘a e he Otua, oku ikai faa fai e he fono ke fakaikai‘i ia, koeuhi ke ne fakataeaoga‘i ae talaofa, he nae ki mui ia i he ta‘u e fageau ma tolugofulu.

¹⁸He kabau oku mei he fono ae tofia, oku ikai ai i he talaofa: ka nae foaki ia e he Otua kia Ebalahame i he talaofa.

¹⁹Bea ta koe umaa ae fono? Nae fakalahi aki ia koe mea i he agahala, kae oua ke hoko mai ae hako nae fai ki ai ae talaofa; bea nae tauhi ia e he kau agelo ki he nima oe fakalaloa.

²⁰Ko eni, oku ikai ai ha fakalaloa koeuhi koe toko taha be, ka oku taha be ae Otua.

²¹Bea ka koia, bea oku kau kehe ae fono moe gaahi talaofa ae Otua? Ikai aubito: he ka ne fokotuu ha fono e faa foaki ae moui, behe e hoko mooni ae fakatonuhia i he fono koia

²²Ka oku fakaha e he tohi kuo moulaloa kotoabe ki he agahala, koeuhi ae foaki ai ae talaofa i he tui kia Jisu Kalaisi kiate kinautolu oku tui.

²³Ka i he heeki hoko mai ae tui, nae moua akitautolu o moulaloa i he fono, o moua ki he tui aia e toki fakaha amui.

²⁴Bea koia ko ho tau takiaki‘i ae fono kia Kalaisi, koeuhi ke fakatonuhia akitautolu e he tui.

²⁵Kae hili ae hoko mai oe tui, oku ikai te tau kei moulaloa ki ha takiaki.

²⁶He koe fānau ae Otua akimoutolu kotoabe i he tui kia Kalaisi Jisu.

²⁷He ko kimoutolu kotoabe kuo babitaiso kia Kalaisi, kuo mou ai a Kalaisi.

²⁸Bea oku ikai ai ha Jiu be Kiliki, oku ikai ha bobula be ha tauataina, oku ikai ha tagata be ha fefine: ka oku mou taha be kotoabe ia Kalaisi Jisu.

²⁹Bea kabau oku a Kalaisi akimoutolu, bea ta koe hako o Ebalahame akimoutolu, bea koe fānau hoko o fakatatau moe talaofa.