KOE GAAHI LEA FAKATĀTĀ 1:1-33 TON1884 - Bible AI

¹1 Ko hono aoga oe gaahi lea fakatātā. 7 Koe eginaki ke manavahe ki he Otua, mo tui ki he ene folofola. 10 Ke oua naa moua i he tauvele ae kakai agahala. 20 Oku lea valoki ae boto i hono manuki‘i. 24 Oku ne fakamanavahe‘i a hono kau manuki. KOE gaahi lea fakatātā a Solomone koe foha o Tevita, koe tu‘i o Isileli;

²Ke ilo ai ae boto moe akonaki; bea ogo‘i ae gaahi lea oe faa ilo;

³Ke ma‘u ae akonaki oe boto, moe agatonu, moe fakamāu, bea moe fai totonu;

⁴Ke foaki ae iloilo ki he tae boto, bea ki he tagata talavou ae ilo moe faa fakakaukau.

⁵E fie fanogo e he tagata boto, bea e tubulekina ai a ene boto; bea e ma‘u ai e he tagata faa ilo ae gaahi fakakaukau lelei:

⁶Ke ilo‘i ae lea fakatātā, bea mo hono fakamatala; ae gaahi lea ae boto, moe nau gaahi tala ilogataa.

⁷Koe manavahe kia Jihova koe kamataaga ia oe ilo: ka oku fehia ae vale ki he boto moe akonaki.

⁸E hoku foha, fanogo ki he akonaki a hoo tamai, bea oua naa ke liaki ae fekau a hoo fa‘e:

⁹Koeuhi e hoko ia koe teuga lelei ki ho ulu, moe kahoa ke tautau ki ho kia.

¹⁰E hoku foha, kabau e fakatauvele‘i koe e he kau agahala, oua naa ke loto ki ai.

¹¹Kabau te nau behe, Ha‘u ke tau o, ke tau tatali o toitoi ke liligi ae toto, ke tau lama fakafufu tae hano uhiga ki he taehalaia:

¹²Ke tau folo moui hifo akinautolu o hage koe faitoka; bea katoa be, o hage ko kinautolu oku alu hifo ki he luo:

¹³Te tau ilo ai ae koloa kehekehe kotoabe, te tau fakafonu ho tau gaahi fale aki ae koloa:

¹⁴Ke tau inaji fakataha be mo koe; bea te tau kau taha be i he kato baaga:

¹⁵E hoku foha, oua naa ke alu i he hala mo kinautolu; taofi ho va‘e mei ho nau hala:

¹⁶He oku lele ho nau va‘e ki he kovi, o nau fakatootoo ke liligi ae toto.

¹⁷Koe mooni oku tautau taeaoga ae kubega i he ao o ha manu buna.

¹⁸Bea oku nau toitoi ki ho nau toto onautolu be; mo nau lama fakafufu ki he e nau moui anautolu be.

¹⁹He oku behe be ae hala o kinautolu oku manumanu ki he koloa; aia oku ne fakaoji ae moui anautolu oku nau ma‘u ia.

²⁰Oku kalaga itua ae boto; oku ne hiki hake hono le‘o i he gaahi hala.

²¹Oku kalaga ia i he botu lahi oe fakatahaaga, moe ava oe gaahi mataba: bea i he loto kolo oku ne ai mai ene lea, o behe,

²²Akimoutolu ae kau vale, e fefe hono fuoloa o hoo mou manako ki he vale? bea fiefia ae kau manuki i he e nau manuki, moe fehia ae kau vale ki he boto?

²³Mou tafoki i he eku valoki: vakai, teu hua‘i hoku laumalie kiate kimoutolu, teu fakaha eku gaahi lea kiate kimoutolu.

²⁴Koeuhi kuou ui, bea nae ikai te mou tali; kuou mafao atu hoku nima, kae ikai tokaga‘i e ha taha;

²⁵Bea kuo mou liaki eku akonaki, bea nae ikai te mou loto ki he eku valoki:

²⁶Koia teu kata foki au i hoo mou malaia; teu manuki i he to mai a hoo mou manavahe;

²⁷Io, oka hoko mai hoo mou manavahe o hage koe fakaauha, mo hoo mou malaia o hage koe ahiohio; oka hoko mai ae mamahi moe feiga kiate kimoutolu.

²⁸Bea te nau toki ui kiate au, ka e ikai teu tali; te nau kumi tootoo kiate au, ka e ikai te nau ilo au:

²⁹Koeuhi naa nau fehia ki he ilo, bea nae ikai te nau loto ke manavahe kia Jihova:

³⁰Nae ikai te nau ma‘u eku gaahi akonaki, bea naa nau manuki‘i a eku valoki kotoabe.

³¹Koia te nau kai ai i he fua oe nau faiaga, bea fakamakona aki e nau gaahi filioi be anautolu.

³²He koe tafoki atu oe tae boto te ne tamate‘i akinautolu, bea e auha ae vale i he e nau fakafiemalie.

³³Ka koia kotoabe oku fanogo kiate au e nofo fiemalie be ia, bea e ataatā ia mei he manavahe ki he kovi.