KOE GAAHI LEA FAKATĀTĀ 30:1-33 TON1884 - Bible AI

¹1 Koe fakamatala e Akuli a ene tui. 7 Koe mea e ua i he ene lotu. 10 Ke oua naa fakamalohi‘i ae kakai māulalo. 11 Koe toutagata e fa oku agakovi. 15 Koe mea e fa oku ikai ke fiu. 17 Koe oua naa manuki‘i ae mātua. 18 Koe mea e fa oku ilogataa. 21 Koe mea e fa oku ikai ke kataki‘i. 24 Koe mea e fa oku boto lahi. 29 Koe mea e fa oku toulekeleka. 32 Koe ita koe mea ia ke taofi. KOE gaahi lea a Akuli koe foha o Jake, aia koe kikite: nae lea ae tagata kia Itieli, io, kia Itieli mo Ukali.

²Koe mooni oku lahi hake a eku vale i he tagata kotoabe, bea oku ikai teu ma‘u ae boto o ha tagata.

³Kuo ikai akonekina au ki he boto, bea oku ikai teu ma‘u ae ilo oe maonioni.

⁴Kohai kuo alu hake ki he lagi, be alu hifo? kohai oku ne tanaki ae matagi i hono nima? kohai kuo ne fakamaoboobo ae gaahi vai i ha kofu? kohai kuo ne fokotuu mau ae gaahi gataaga o mamani? kohai hono huafa, bea kohai ae huafa o hono Alo, o kabau oku ke faa fakaha?

⁵Oku maa ae folofola kotoabe ae Otua: bea koe ugaaga ia kiate kinautolu kotoabe oku falala kiate ia.

⁶Oua naa ke fakalahi ki he ene folofola telia naa ne valoki‘i koe, bea e ilo ai koe koe loi.

⁷Koe mea e ua kuou kole kiate koe; bea oua naa ke taofi ia iate au o a‘u ki he eku mate.

⁸Hiki ke mamao iate au ae vaiga moe loi: bea oua naaku majiva be koloaia: fafaga aki au ae mea kai oku tāu be mo au:

⁹Telia naaku makona, beau fakafiji‘i koe, beau behe, Kohai a Jihova? telia foki naaku majiva, beau kaihaa, mo takua noa ae huafa o hoku Otua.

¹⁰Oua naa ke fakakovi‘i ae tamaioeiki ki he ene eiki, telia naa ne kabe‘i koe, bea ilo ko koe oku halaia.

¹¹Oku ai ae fānau oku kabe ki he e nau tamai, bea oku ikai ke tabuaki‘i e nau fa‘e.

¹²Oku ai ae toutagata e taha oku nau maonioni i ho nau mata onautolu, ka oku heeki ke fufulu e nau aga fakalielia.

¹³Oku ai ae toutagata e taha, Oi seuke! hono ikai maoluga a ho nau mata! bea kuo nau hiki hake ho nau laumata.

¹⁴Oku ai ae toutagata e taha, oku tatau ho nau nifo moe heleta, mo ho nau gao oku hage koe hele, ke kai o oji ae majiva mei he fuga o mamani, bea oji moe baea mei he kakai.

¹⁵Oku ma‘u e he aluka ae ofefine e toko ua oku tagi, Foaki mai, foaki mai. Oku ai ae mea e tolu oku ikai jii ke fiemalie, io, oku fa ae mea oku ikai ke nau behe, Maua, kuo lahi:

¹⁶Koe faitoka; moe manāva oku baa; koe kelekele oku ikai bito i he vai; bea moe afi oku ikai ke behe, Maua, kuo lahi.

¹⁷Koe mata oku manuki ki he ene tamai, bea ikai tokaga ke fai talagofua ki he ene fa‘e, e kabe‘i ia e he faga leveni oe telea, bea e kai ia e he faga ikale iki.

¹⁸Oku ai ae mea e tolu oku fakaofo lahi kiate au, io, koe mea e fa oku ikai teu ilo‘i:

¹⁹Koe bunaaga oe ikale i he atā; moe hala oe gata i he fuga maka; moe aluaga oe vaka i he loto vaha; moe aga ae tagata ki he tāuboou.

²⁰Oku behe ae aga ae fefine tonotagata; oku ne kai, o ne holoholo hono gutu, o ne behe, Nae ikai teu fai ha kovi.

²¹Koe mea e tolu oku maveuveu ai a mamani, koe mea e fa oku ikai ke ne faa kataki‘i:

²²Koe tamaioeiki kuo fakanofo ke bule; moe tagata vale kuo makona i he mea kai;

²³Moe fefine aga fakalielia kuo mali; moe kaunaga oku hoko ki he koloa a ene eiki fefine.

²⁴Oku ai ae mea e fa oku iki i he fuga o mamani, ka oku lahi aubito e nau boto:

²⁵Koe lo, koe faahiga ia oku ikai ke malohi, ka oku nau tokonaki e nau mea kai i he faahitau mafana.

²⁶Koe faga safana, koe faahiga ia oku vaivai be, ka oku nau gaohi ho nau fale i he gaahi maka;

²⁷Oku ikai ma‘u ha tu‘i e he faga hee, ka oku nau buna fakataha atu;

²⁸Oku buke aki e he hina a hono nima, o ne nofo i he gaahi fale oe gaahi tu‘i.

²⁹Oku ai ae mea e tolu oku lelei e nau alu, io, oku fa ae mea oku matalelei e nau alu:

³⁰Koe laione aia oku malohi i he faga manu, bea e ikai te ne tafoki atu i ha taha;

³¹Koe hose; moe koji tagata foki; bea moe tu‘i, oku ikai faa fai ki ai ha agatuu.

³²Kabau kuo ke fai vale i hoo hiki hake koe ekoe, bea kabau kuo ke mahalo kovi, ke ke ai ho nima ki ho gutu.

³³Koe mooni oku tubu ae bota i he tuki ae hua huhu oe manu, bea tubu ae toto i he mioi oe ihu: oku behe, oku tubu ae fekeikei i he ita fakamalohi.