KOE GAAHI SAME 106:1-48 TON1884 - Bible AI

¹1 Oku eginaki e he tagata tohi same ke fakamalo ki he Otua. 4 Oku ne kole ae fakamolemole oe agahala, o hage nae fai e he Otua ki he gaahi mātua. 7 Koe fakamatala ki he agatuu ae kakai, moe aloofa ae Otua. 47 Koe lotu moe fakafetai. MOU fakamalo kia Jihova. Mou atu ae fakafetai kia Jihova; he oku agalelei ia: koeuhi oku tologa o taegata a ene aloofa.

²Kohai e faa fakamatala ki he gaahi gaue lahi a Jihova? kohai e faa fakaha ae fakamalo kotoabe kiate ia?

³Oku monuia akinautolu oku tokaga ki he fakamāu, mo ia oku fai maonioni i he aho kotoabe.

⁴E Jihova, ke ke manatu‘i au aki ae ofa aia oku ke ofa aki ki hoo kakai: ke ke aahi mai kiate au aki hoo fakamoui;

⁵Koeuhi keu mamata ki he lelei oia kuo ke fili, koeuhi keu fiefia i he fiefia o ho buleaga, beau vikiviki ai fakataha mo ho tofia.

⁶Ko kimautolu moe mau gaahi tamai kuo mau fai agahala, kuo mau fai ae gaahi hia, kuo mau fai kovi.

⁷Nae ikai ilo e he e mau gaahi tamai hoo gaahi gaue fakaofo i Ijibite; nae ikai te nau manatu ki hono lahi o hoo gaahi aloofa; ka naa nau fakahouhau kiate ia i he tahi, io, i he Tahi Kulokula.

⁸Ka naa ne fakamoui akinautolu koeuhi ko hono huafa, koeuhi ke ne fakailo a hono malohi lahi.

⁹Nae valoki foki eia ae Tahi Kulokula, bea momoa ia: koia naa ne tataki akinautolu i he loloto, o hage koe toafa.

¹⁰Bea naa ne fakamoui akinautolu mei he nima oia nae fehia kiate kinautolu, mo ne huhui akinautolu mei he nima oe fili.

¹¹Bea nae lomaki‘i ho nau gaahi fili aki ae gaahi vai: bea nae ikai hao ha toko taha iate kinautolu.

¹²Bea naa nau toki tui ki he ene folofola; naa nau hiva aki ae fakamalo kiate ia.

¹³Nae galo leva iate kinautolu ene gaahi gaue; bea nae ikai te nau tatali ki he ene akonaki:

¹⁴Ka naa nau holi kovi aubito i he toafa, bea ahiahi‘i ae Otua i he botu lala.

¹⁵Bea naa ne foaki kiate kinautolu aia naa nau kole; ka naa ne fekau ae tutue ki ho nau laumalie.

¹⁶Naa nau meheka foki kia Mosese i he loto abitaga, mo Elone koe toko taha maonioni a Jihova.

¹⁷Nae mafahi ae kelekele bea folo hifo ai a Tatani, mo ufiufi ai ae kakai o Ebilami.

¹⁸Bea ne tutu ai ae afi i ho nau kakai; bea vela ke oji e he ulo afi ae kau agahala.

¹⁹Naa nau gaohi ae fakatātā oe uhiki‘i bulu i Holebi, bea lotu ki he fakatātā koula.

²⁰Nae behe e nau liliu ho nau nāunāu ki he fakatātā oe bulu aia oku kai mohuku.

²¹Naa nau fakagalogalo‘i ae Otua ko ho nau fakamoui, aia nae fai ae gaahi mea lahi i Ijibite;

²²Koe gaahi gaue fakaofo i he fonua o Hami, moe gaahi mea fakailifia i he Tahi Kulokula.

²³Koia naa ne behe te ne fakaauha akinautolu, ka ne ikai tuu i hono ao i he vahaa a Mosese aia kuo ne fili, ke fakatafoki hono houhau, telia naa fakaauha eia akinautolu.

²⁴Io, naa nau fehia ki he fonua lelei, nae ikai te nau tui ki he ene folofola:

²⁵Ka naa nau lāuga i ho nau gaahi fale fehikitaki, o tae tokaga ki he le‘o o Jihova.

²⁶Koia naa ne hiki hake ai hono nima kiate kinautolu, ke tulaki akinautolu i he toafa:

²⁷Ke tulaki foki ho nau hako i he ao oe gaahi buleaga, mo fakahe‘i akinautolu i he gaahi fonua.

²⁸Naa nau ului foki kia Beali‐beoli, mo nau kai ae gaahi feilaulau oe mate.

²⁹Koia naa nau fakahouhau‘i ia aki e nau gaahi filioi: bea nae oho mai ae mahaki fakaauha kiate kinautolu.

³⁰Bea nae toki tuu hake a Finiasi, o fai ae fakamāu: bea nae lolomi ai ae mahaki fakaauha.

³¹Bea nae lau ia kiate ia koe maenioni i he gaahi toutagata kotoabe o lauikuoga.

³²Naa nau fakahouhau kiate ia foki i he gaahi vai oe fekeikei, bea hoko ae kovi kia Mosese koeuhi ko kinautolu:

³³Koe mea i he e nau fakatubu hono loto, koia naa ne le aki ae lea taegali e hono lougutu.

³⁴Nae ikai te nau fakaauha ae gaahi buleaga, aia nae fekau e Jihova kiate kinautolu:

³⁵Ka naa nau nofo fakataha moe hiteni, bea nau ilo e nau gaahi gaue.

³⁶Bea naa nau tauhi ho nau gaahi tamabua: aia nae hoko koe tauhele kiate kinautolu.

³⁷Io, naa nau feilaulau aki ho nau gaahi foha mo ho nau gaahi ofefine ki he kau tevolo,

³⁸Mo liligi ae toto maonioni, koe toto o ho nau gaahi foha mo ho nau gaahi ofefine, akinautolu naa nau feilaulau aki ki he gaahi tamabua o Kenani: bea nae fakakovi‘i ae fonua i he toto.

³⁹Bea nae fakauli‘i behe akinautolu i he e nau gaahi gaue, bea nau fai feauaki i he e nau gaahi filioi.

⁴⁰Koia nae tubu ai ae houhau o Jihova ki hono kakai, bea ne fākalilia ai ki hono tofia oona.

⁴¹Bea naa ne tukuage akinautolu ki he nima oe hiteni; bea nae bule kiate kinautolu akinautolu nae fehia kiate kinautolu.

⁴²Bea nae fakamalohi‘i akinautolu e ho nau gaahi fili, bea nae fakamoulaloa akinautolu ki ho nau lalo nima.

⁴³Nae liuga lahi ene fakamoui akinautolu; ka naa nau fakahouhau‘i ia i he e nau fakakaukau, bea nae fakavaivai‘i akinautolu koeuhi koe nau hia.

⁴⁴Ka naa ne tokaga ki he e nau mamahi, i he ene ogo‘i e nau tagi:

⁴⁵Bea ne manatu‘i a ene fuakava mo kinautolu, bea ne fakatomala o fakatatau mo hono lahi o ene aloofa.

⁴⁶Naa ne bule foki ke manavaofa kiate kinautolu akinautolu kotoabe nae ave bobula akinautolu.

⁴⁷Fakamoui akimautolu, E Jihova ko ho mau Otua, bea tanaki akimautolu mei he lotolotoga oe hiteni, ke mau fakafetai ki ho huafa maonioni, bea hanuhanu i he fakamalo kiate koe.

⁴⁸Fakafetai kia Jihova koe Otua o Isileli talu mei mua o a‘u o taegata: bea tuku ke lea behe e he kakai kotoabe, Emeni. Mou fakamalo kia Jihova.