KOE GAAHI SAME 107:1-43 TON1884 - Bible AI

¹1 Oku eginaki e he tagata tohi same ki he kakai kuo huhui ke nau tokaga, i he e nau fakamalo ki he Otua, ki he ene bule lelei, 4 ki he kau fonoga, 10 ki he kau bobula, 17 ki he kakai mahaki, 23 ki he kau toutai, 33 bea i he gaahi aga kehekehe oe moui. MOU atu ae fakafetai kia Jihova, he oku agalelei ia: koeuhi oku tologa o taegata a ene aloofa.

²Ke lea behe e he kakai kuo huhui e Jihova, akinautolu kuo ne huhui mei he nima oe fili;

³Bea tanaki akinautolu mei he gaahi fonua, mei he botu hahake, bea mei he botu luluga, mei he botu tokelau, bea mei he feituu toga.

⁴Naa nau alu fano be i he toafa i he hala liaki; nae ikai te nau ilo ha kolo ke nofo ai.

⁵Bea i he fiekaia moe fieinua, nae bogia ai ho nau laumalie iate kinautolu.

⁶Bea naa nau toki tagi kia Jihova i he e nau tuutamaki, bea ne ne fakamoui akinautolu mei he e nau gaahi mamahi.

⁷Bea naa ne tataki atu akinautolu i he hala totonu, koeuhi ke nau hoko ki he kolo nae kakai.

⁸Taumaiā ke fakamalo ae kakai kia Jihova koeuhi ko ene aloofa, bea koeuhi ko ene gaahi gaue fakaofo ki he fānau ae tagata!

⁹He oku ne fakamakona ae laumalie oku holi, mo ne fakabito aki ae lelei ae laumalie oku fiekaia.

¹⁰Ko kinautolu oku nofo i he fakabouli bea moe ata ae mate, kuo ha‘i aki ae mamahi moe ukamea;

¹¹Koeuhi naa nau agatuu ki he gaahi folofola ae Otua, mo nau fehia ki he akonaki ae fugani Maoluga:

¹²Koia naa ne fakavaivai‘i ho nau loto i he gaue; naa nau to ki lalo, bea nae ikai ha taha ke tokoni.

¹³Bea naa nau toki tagi kia Jihova i he e nau tuutamaki, bea ne fakamoui akinautolu mei he e nau gaahi mamahi.

¹⁴Naa ne omi akinautolu mei he fakabouli moe ata oe mate, o ne motuhi ho nau gaahi ha‘i.

¹⁵Taumaiā ke fakamalo ae kakai kia Jihova koeuhi ko ene aloofa, bea koeuhi ko ene gaahi gaue fakaofo ki he fānau ae tagata!

¹⁶He kuo ne maumau‘i ae gaahi mataba balasa, bea ne tutuu ae gaahi ukamea fakamau.

¹⁷Oku mamahi ae kau vale koeuhi koe nau talagataa, bea moe nau gaahi hia.

¹⁸Oku fehia ho nau laumalie ki he mea kai kotoabe; bea oku nau fakaaau ki he gaahi mataba oe mate.

¹⁹Bea oku nau toki tagi kia Jihova i he e nau tuutamaki, bea oku ne fakamoui akinautolu mei he e nau gaahi mamahi.

²⁰Naa ne fekau ene folofola, bea ne fakamoui akinautolu, mo ne fakahaofi akinautolu mei he e nau gaahi mea fakaauha.

²¹Taumaiā ke fakamalo ae kakai kia Jihova koeuhi ko ene aloofa, bea koeuhi ko ene gaahi gaue fakaofo ki he fānau ae tagata!

²²Bea tuku ke nau feilaulau aki ae gaahi feilaulau oe fakafetai, mo fakaha ene gaahi gaue i he fiefia.

²³Ko kinautolu oku alu hifo ki he tahi i he gaahi vaka, mo fai ae gaue i he gaahi vai lahi;

²⁴Oku nau mamata ki he gaahi gaue a Jihova, mo ene gaahi mea fakaofo i he moana.

²⁵He oku fekau eia, bea oku fakatubu ae matagi malohi, aia oku tubu hake ai hono gaahi beau.

²⁶Oku nau alu hake ki he lagi, oku nau toe alu hifo ki he gaahi loloto: kuo vela o vai ho nau laumalie koeuhi koe mamahi.

²⁷Oku nau tajiba, bea luelue o hage koe tagata kona, bea kuo mole ho nau boto kotoabe.

²⁸Oku nau toki tagi kia Jihova i he e nau tuutamaki, bea oku ne omi akinautolu mei he e nau gaahi mamahi.

²⁹Oku ne gaohi ae afā ke tofuki, koia oku ikai gau‘e ai hono beau.

³⁰Bea oku nau toki fiefia koeuhi oku nau fiemalie ai; bea oku ne omi akinautolu ki he taulaga kuo nau holi ki ai.

³¹Taumaiā ke fakamalo ae kakai kia Jihova koeuhi ko ene aloofa, bea koeuhi ko ene gaahi gaue fakaofo ki he fānau ae tagata!

³²Tuku ke nau fakahikihiki a ene afio i he fakataha oe kakai, mo fakamalo kiate ia i he fakataha oe kau mātua.

³³Oku liliu eia ae gaahi vaitafe koe toafa, moe gaahi matavai koe kelekele momoa;

³⁴Moe fonua mahu koe hogea, koeuhi koe agakovi ae kakai oku nofo ai.

³⁵Oku ne liliu ae toafa koe ano vai, moe fonua momoa koe gaahi matavai.

³⁶Bea oku ne bule ke nofo ai ae fiekaia, koeuhi ke nau teuteu ae kolo ke nofo ai;

³⁷Mo tūtū‘i ae gaahi goue, bea to ae gaahi goue vaine, aia oku faa omi ae gaahi fua kuo tubu.

³⁸Oku ne fakamonuia foki akinautolu, koia kuo nau tubu o toko lahi aubito; bea oku ikai te ne tuku ke fakaaau ke jii e nau faga manu.

³⁹Bea oku toe fakaaau ke toko jii mo vaivai akinautolu i he fakamalohi, moe mahaki, moe mamahi.

⁴⁰Oku ne liligi ae manuki ki he gaahi eiki, bea oku ne bule ke nau alu fano i he toafa, aia oku ikai ha hala i ai.

⁴¹Ka oku ne hiki hake ae majiva mei he mamahi, bea oku ne gaohi maana ae gaahi kaiga o hage koe faga sibi.

⁴²E mamata ki ai ae agatonu, bea fiefia; bea e tabuni e he agahala kotoabe hono gutu.

⁴³Kohai oku boto, bea tokaga ki he gaahi mea ni, te nau ilo‘i ae aloofa ogogofua a Jihova.