KOE GAAHI SAME 139:1-24 TON1884 - Bible AI

¹Oku fakamalo a Tevita ki he Otua koeuhi ko ene afio‘i ae mea kotoabe, 17 mo ene gaahi aloofa lahi. 19 Ko ene fehia ki he agahala. 23 Oku ne kole ke ne maonioni. E JIHOVA, naa ke ahiahi‘i au, bea kuo ke ilo‘i au.

²Oku ke ilo‘i eku nofo hifo mo eku tuu hake, oku ke ilo‘i eku gaahi mahalo oku kei mamao.

³Oku ke a‘i hoku hala mo hoku tokotoaga, bea oku ke ilo‘i hoku hala kotoabe.

⁴He oku ikai ha lea i hoku elelo, ka ko koe, E Jihova, oku ke ilo‘i kotoabe.

⁵Naa ke kabui au i hoku tua mo hoku ao, o ke hilifaki ho nima kiate au.

⁶Koe ilo behe oku fakaofo lahi kiate au; oku maoluga ia, oku ikai teu faa lava‘i ia.

⁷Teu alu kife mei ho Laumalie? be teu hola kife mei ho ao?

⁸Kabau teu alu hake ki he loto lagi, oku ke i ai: kabau teu gaohi hoku mohega i heli, vakai, oku ke i ai.

⁹Kabau teu too mai ae gaahi kabakau oe bogibogi, bea nofo i he gaahi gataaga oe tahi;

¹⁰E tataki foki au e ho nima i ai, bea ko ho nima toomatau te ne buke au.

¹¹Kabau teu behe, Koe mooni e ufiufi au e he bouli; e hoko ae bo foki koe māma o takatakai iate au.

¹²Io, oku ikai fakafufu meiate koe e he bouli; ka oku malama ae bo o hage koe aho: koe bouli moe māma oku na tatau be kiate koe.

¹³He kuo ke ma‘u hoku koga loto: naa ke ufiufi au i he manāva o eku fa‘e.

¹⁴Teu fakamalo kiate koe; he oku fakamanavahe mo fakaofo hoku gaohi: oku fakaofo hoo gaahi gaue; bea oku ilo bau ki ai e hoku laumalie.

¹⁵Nae ikai fufu a hoku jino meiate koe, i he gaohi au i he lilo, mo teuteu lelei au i he gaahi botu maulalo oe fonua.

¹⁶Nae afio ho fofoga ki hoku jino oku teeki ai fakaoji; bea nae tohi i hoo tohi hoku gaahi kubu‘i jino kotoabe, aia nae fakatubu fakaholo, i he heeki ai ha kubu e taha.

¹⁷E Otua, hono ikai mahuiga a hoo gaahi fakakaukau kiate au! oku fefe nai hono lahi oia!

¹⁸Kabau teu lau ia, oku lahi hake hono lau i he oneone: o kau ka a hake oku ou kei iate koe.

¹⁹E Otua, koe mooni te ke tamate‘i ae agahala: koia mou alu iate au, akimoutilu ae kau tagata bani toto.

²⁰He oku nau lea kovi i he agatuu kiate koe, bea ko ho gaahi fili oku nau takua noa ho huafa.

²¹E Jihova, ikai oku ou fehia kiate kinautolu oku nau fehia kiate koe? bea ikai oku ou mamahi iate kinautolu oku nau tuu hake o agatuu kiate koe?

²²Oku ou fehia kiate kinautolu aki ae fehia aubito: oku ou lau akinautolu ko hoku gaahi fili.

²³E Otua, afio‘i au, bea ke ilo‘i hoku loto: ahiahi‘i au, mo ke ilo‘i eku gaahi mahalo:

²⁴Bea ke vakai be oku ai ha hala kovi iate au, bea ke tataki au i he hala taegata.