KOE GAAHI SAME 34:1-22 TON1884 - Bible AI

¹1 Oku fakafetai a Tevita ki he Otua, bea ne eginaki‘i ae kakai ke fai ia. 8 Oku monuia akinautolu oku falala ki he Otua. 11 Oku ne eginaki ke manavahe ki he Otua. 15 Koe lelei oku i he maonioni. TEU fakafetai kia Jihova i he kuoga kotoabe: e tuu mau be ene fakafetai i hoku gutu.

²E vikiviki hoku laumalie ia Jihova: e fanogo ki ai ae kakai agavaivai, bea fiefia ai.

³Ke tau fai mo au ke abai hake a Jihova, bea ke tau fakaogoogolelei fakataha hono huafa.

⁴Naaku kumi kia Jihova, bea ne ogo‘i au, o ne fakamoui au mei he eku manavahe kotoabe.

⁵Naa nau vakai kiate ia, bea māmagia ai: bea nae ikai ma ai ho nau mata.

⁶Nae tagi ae tagata majiva ni, bea nae ogo‘i ia e Jihova, o ne fakamoui ia mei he ene mamahi kotoabe.

⁷Oku nofo ae agelo a Jihova o takatakai akinautolu oku manavahe kiate ia, o ne fakamoui akinautolu.

⁸Mou kamata o vakai oku lelei a Jihova: oku monuia ae tagata koia oku falala kiate ia.

⁹Ke manavahe kia Jihova, akimoutolu ko ene kau maonioni: he oku ikai ha majiva kiate kinautolu oku manavahe kiate ia.

¹⁰Oku majiva ae faga laione mui, mo fiekaia: ka ko kinautolu oku kumi kia Jihova e ikai te nau majiva i ha mea lelei e taha.

¹¹Ha‘u, akimoutolu koe fānau, o fanogo kiate au: teu ako kiate kimoutolu ae manavahe kia Jihova.

¹²Kohai ha tagata oku holi ke moui, o manako ki he gaahi aho lahi, koeuhi ke ne mamata ai ki he lelei?

¹³Taofi ho elelo mei he kovi, mo ho lougutu mei he lea kākā.

¹⁴Afe mei he kovi, mo ke fai lelei; kumi ki he melino, bea tuli ki ai.

¹⁵Oku afio mau ae fofoga o Jihova ki he kakai maonioni, bea oku ogo‘i e hono teliga e nau tagi.

¹⁶Oku houhau ae fofoga o Jihova kiate kinautolu oku fai kovi, ke motuhi ho nau fakamanatu‘i mei mamani.

¹⁷Oku tagi ae maonioni, bea ogo‘i e Jihova, o ne fakamoui akinautolu mei he e nau gaahi mamahi kotoabe.

¹⁸Oku ofi a Jihova kiate kinautolu oku loto mafeji; oku ne fakamou akinautolu oku laumalie mafofoa.

¹⁹Oku lahi ae gaahi mamahi oe maonioni: ka oku fakamoui ia mei ai kotoabe e Jihova.

²⁰Oku ne tauhi hono gaahi hui kotoabe: e ikai mafeji ha taha.

²¹E fakabogi e he kovi ae kau agahala: bea ko kinautolu oku fehia ki he kau maonioni te nau malaia.

²²Oku huhui e Jihova ae laumalie o ene kau tamaioeiki: bea e ikai malaia ha toko taha okinautolu oku falala kiate ia.