KOE GAAHI SAME 37:1-40 TON1884 - Bible AI

¹Oku ako e Tevita ki he faa kataki moe tui ki he Otua, koeuhi koe gaahi mea kehekehe oku i he agatonu moe agahala. OUA naa ke fakamamahi‘i koe koeuhi koe kau fai kovi, bea oua naa ke meheka ki he kau gaue i he agahala.

²Koeuhi e vave ae tuuji hifo akinautolu o hage koe mohuku, bea mae o hage koe akau mata.

³Falala kia Jihova, bea ke fai lelei; koia te ke nofo ai i he fonua, bea koe mooni e fafaga‘i koe.

⁴Fakafiemalie‘i foki koe ia Jihova; bea te ne foaki kiate koe ae gaahi holi o ho loto.

⁵Tuku ho hala kia Jihova; bea falala foki kiate ia; bea te ne fakahoko ia.

⁶Bea te ne fakaha atu hoo maonioni o hage koe māma, mo hoo fakamāu o hage koe hoata oe aho.

⁷Ke ke fakalogo be kia Jihova, bea tatali faa kataki be kiate ia: oua naa ke fakamamahi‘i koe koeuhi ko ia oku monuia i hono hala, koeuhi koe tagata oku fakahoko ae gaahi filioi kovi.

⁸Tukuage ae ita, bea liaki ae lili: oua naa ke fakamamahi‘i foki koe i ha mea ke fai kovi.

⁹Koeuhi e motuhi ae gaahi fai kovi: ka ko kinautolu oku tatali kia Jihova, te nau ma‘u ae fonua.

¹⁰He oku toetoe jii be, bea e ikai ae agakovi: io, te ke tokaga lahi ki hono botu, ka e ikai ilo‘i ia.

¹¹Ka koe agamalu te nau ma‘u ae fonua; o nau fakafiemalie‘i akinautolu i hono lahi oe melino.

¹²Oku fakakaukau kovi e he agahala ki he agatonu, mo gaii kiate ia aki hono nifo.

¹³E kata a Jihova kiate ia: he oku ne afio‘i oku ha‘u hono aho.

¹⁴Kuo unuhi e he kau agakovi ae heleta, bea kuo nau teke e nau kaufana, ke li ki lalo ae mamahi moe baea, bea ke tamate‘i akinutolu oku aga totonu.

¹⁵E aji e nau heleta ki ho nau loto onautolu, bea e mafeji e nau gaahi kaufana.

¹⁶Oku lelei lahi hake ae mea jii oku i he tagata maonioni i he koloa oe toko lahi oku agahala.

¹⁷Koeuhi e feji‘i ae nima oe kau agahala: ka oku boubou e Jihova ae maonioni.

¹⁸Oku ilo‘i e Jihova ae gaahi aho oe kakai agatonu: bea ko ho nau tofia e tologa taegata.

¹⁹E ikai te nau ma i he kuoga kovi: bea i he gaahi aho oe hoge te nau makona.

²⁰Ka e auha ae agakovi, bea e tatau ae gaahi fili o Jihova moe gako oe faga lami: e auha akinautolu; i he kohu te nau mole o oji.

²¹Oku nono ae agakovi, be ikai toe totogi: ka oku fakaha ae ofa e he maonioni, o foaki.

²²He ko kinautolu kuo tabuekina iate ia te nau ma‘u ae fonua; bea ko kinautolu kuo malaia ite ia e motuhi.

²³Oku fakahinohino e Jihova ae gaahi laka ae tagata lelei: bea oku fiemalie ia i hono hala.

²⁴Ne ogo ene to ki lalo, ikai auha ia: he oku boubou hake ia e he nima o Jihova.

²⁵Naaku talavou, bea kuou motua; ka oku teeki teu ilo ae maonioni kuo liaki, be ko hono hako oku kole ma.

²⁶Oku agaofa mau ai be ia, bea faa atu; bea oku monuia hono hako.

²⁷Afe mei he kovi, bea ke fai lelei; bea nofo mau be o taegata.

²⁸He oku ofa a Jihova ki he fakamāu, bea oku ikai te ne liaki hono kakai maonioni; kuo fakamoui mau ai be akinautolu: ka e motuhi ae hako oe agakovi.

²⁹E ma‘u e he maonioni ae fonua, bea te nau nofo ai o taegata.

³⁰Koe gutu oe maonioni oku ne lea aki ae boto, bea talanoa aki hono elelo ae fakamāu.

³¹Oku i hono loto ae fono a hono Otua; e ikai hekea ia i haa ne laka e taha.

³²Oku lamaji e he agakovi ae maonioni, o kumi ke fakabogi ia.

³³E ikai tukuage ia e Jihova i hono nima, be tukuaki‘i ia i hono fakamāu‘i.

³⁴Tatali kia Jihova, bea tauhi hono hala, bea te ne hakeaki‘i koe ke ma‘u ae fonua: bea ka oji hono motuhi ae kakai agakovi, te ke mamata ki ai.

³⁵Naaku mamata ki he agakovi kuo malohi lahi, bea mafola ia o hage koe akau mauiui oku tubu i hono botu oona.

³⁶Ka nae mole atu ia, bea vakai, kuo ikai ia: io, neu kumi ia, ka nae ikai faa ilo‘i ia.

³⁷Vakai ki he tagata haohaoa, mo tokaga ki he agatonu: he koe gataaga oe tagata koia koe melino.

³⁸Ka e fakaauha fakataha ae kau agahala: koe ikuaga oe agakovi e motuhi ia.

³⁹Ka ko hono fakamoui oe maonioni oku ia Jihova: ko ho nau malohi ia i he kuoga oe mamahi.

⁴⁰Bea e tokoni akinautolu e Jihova, mo fakamoui akinautolu: te ne fakahaofi akinautolu mei he kakai agakovi, mo fakamoui akinautolu, koe mea i he e nau falala kiate ia.